¹ Po u Korah umwana wa Izhar u mwana wa Kohath umwana wa Levi, pambali pa Dathan nu Abiram umwana wa Eliab, sona nu Oni umwana wa Peleth, uwa lunyungu lwa Reuben, bakabunganika abanthu abanalume. ² Bakamunyamukila u Moses, poka na banalume abanji aba kufuma mu banthu ba Isreal, abalongozi 250 ukufuma muchikaya mo bakaba abanalume pakuzInga ichikaya. ³ Bakabungana abane poka pakulimbikisya u Moses nu Aaron. Bakababuzya bakati, ''Mwabuka kubutal! Ichikaya chonsi chili pachene, wensi mumwambo, sona u Yahweh ali m'mwambo. choni mukwikwezya mwebene kuchikaya cha Yahweh?'' ⁴ Bo u Moses ivwa ichi, akisya icheni pansi. ⁵ Akanena kwa Korah sona na bakamu bache bonsi, '' Pandabindabi u Yahweh akwiza ukwilangizya bo bali kumbali yache nayo musayiwa kukwache. Ukumubika umunthu uyo kupipi kukwache. Uyonyene akwiza ukuba papipi nawe. ⁶ Bomba chino, uwe Korah ni chibukatila chako. Belenga imbumba yako ⁷ indabi ukubika umoto ni vyakununkhila mulanyene panthanzi pa Yahweh. Umwenecho yo u Yahweh amusebite, ukwiza ukuba musebiwa kwa Yahweh. Mwaya kubutali, mweba lunyungu lwa Levi.'' ⁸ Sona, u Moses akanena kwa Korah, '' Ilero ivwa, mweba lunyungu lwa Levi: ⁹ koti ichinthu ichi chinandi he kukwinu pakuti u Chala wa ba Isreal abalesania ukufuma ku chikaya cha Isreal, ukwiza numwe papipi nawe, ukubomba imbombo mu chitembe cha Yahweh, sona pakwimilila panthanzi pa chikaya pa kubabombela? ¹⁰ Ababika papipi, sona na bakamu binu bonsi, nu lunyungu lwa Levi, uwe, nangabuli nuwe ukulonda ukuti! ¹¹ Polelo uwe na banthu bako mwabungana nu kumunyamukila u Yahweh. Wewenu u Aaron yo mukulimbana nawe?'' ¹² Po u Moses akamwitizya u Dathan nu Abiram, abana ba Eliab, loli bakati, ''Tutakwizako. ¹³ Koti chinthu chipepe pa tufumia ku chisu ko kukaba ulukama nu buchi, nu kutukoma mu nkholongo? Ilero ulonda utulamulile! ¹⁴ Pakonjezyapo, utatubikitepo mu chikaya cho chili nu lukama nu buchi sona utatupile umunda wa kulimamo ivyakulya. Nivyakubyalamo ngati vyamphyana. Ilero ulonda utupusike navimo vyo vitakuboneka? Tutazukwizako kukwako.'' ¹⁵ U Moses akakalala he nukwanda panena kwa Yahweh, ''Mutakavichindike ivyabupi vyabo. Nthasenditepo imphunda yabo nayimo sona nthamunangilepo nayumo.'' ¹⁶ Po Moses akamubuzya u Korah, akati, ''Indabi uwe nabanyankho mubaghile mufike panthanzi pa Yahweh----uwe na bene , sona nu Aaron. ¹⁷ Umunthu wensi ize nivya mupayizya u Yahweh imbale, nukubika ivyakununkhila. Umunthu wensi akwenela ukwiza ni mbale yache panthanzi pa Yahweh, imbale 250. Uwe nu Aaron, numwe, wensi abaghile ukwiza ni mbale ¹⁸ Po umunthu wensi akasenda imbale nukubikamo umoto, nukubika utwakununkhila papo, nukwimilila pamulyango wa chisakasa cha lukomano poka nu Moses nu Aaron. ¹⁹ U Korah akabunganika abanthu ba muchikaya nukunyamukila u Moses nu Aaron pamu lyango wachisakasa cha lukomano, sona ubuchindamu ba Yahweh bukaboneka ku banthu ba chikaya. ²⁰ Po u Yahweh akanena kwa Moses nu Aaron: ²¹ ''Ifumiapo pa banthu abo aba muchikaya pakuti ningabalya lonsi lunonyene.'' ²² U Moses nu Aaron bakinamila pansi bakati, ''U Chala, uChala wa mizimu iya banthu bonsi, pala umunthu weka ananga,, po ungachikalalila ichikaya chonsi?'' ²³ U Yahweh akamula kwa Moses. Akati, ²⁴ ''Nena kuchikaya. ukuti, ' Fuma muvisakasa vya Korah, u Dathan, nu Abiram.''' ²⁵ Po u Moses akanyamuka nukuya kwa Dathan nu Abiram; abasongo bamu Isreal bakamukonkha. ²⁶ Akanena mu chikaya akati, ''Ilelo fumamo muvisakasa vya banthu bambibi sona mutakakolepo ivinthu vyabo, sona mungize mulyeke chifukwa cha mbibi zyabo.'' ²⁷ Po abanthu bamu chikaya kumbali ya chisakasa ya Korah, u Dathan, nu Abiram bakabaleka. U Dathan nu Abiram bakafuma panzi nukwimilila pamulyango wa visakasa vyabo, nabakazi babo, na bana abanalume, na banandi . ²⁸ Po u Moses akati, ''Ukuyana nivi inthi munanye pakuti u Yahweh anthumite pakubomba imbombo zino, pakuti ntha kuvibomba pa bwighane bwane awe. ²⁹ Pala abanthu bafwa imphungo yabwile ngati mo yikubela bwile, bo U Yahweh atanthumite. ³⁰ Loli u Yahweh akupela ichinthu ichipya, po ichisu chikwiwuka chikwighula umulomo nukuvimila, navyonsi vyo vili navyo, sona vikubuka pansi vipuma, po mubaghile ukumanya ukuti abanthu bamunangile u Yahweh.'' ³¹ Bo u Moses amala bwaka pakunena amazyu ghano, ichisu chikighuka munthende mu banthu balanyene. ³² Ichisu chikiwula umulomo wache nukubamila, ni mbumba zyabo, na banthu bonsi bobakaba kumbali ya Korah, nivyuma vyabo vyonsi vyo bakaba navyo. ³³ Po vyonsi vyo bakaba navyo vikaya pansi vipuma. Ichisu chika bighalila bonsi, bakamala bonsi muchikaya. ³⁴ Bonsi aba Isreal bobakazyungulila bakafumapo nukulila kwabo. Bakachenukila, ''Ichisu chingatumila nuswe bwaka!'' ³⁵ Po u moto ghukamekuka ukufuma kwa Yahweh nu kubamila abanthu 250 bobakabika ivyakununkhila ³⁶ Sona u Yahweh akanena kwa Moses nukuti, ³⁷ ''Nena kwa Eleazar umwana wa Aaron umuputi sona umubuzye anyamule utwakununkhila ukufuma ko u moto ghukulilima, pakuti utumbale tukaba twakubombela une. Pomuleke apalasanie u moto wa makalazibwe pabutali. ³⁸ Senda utumbale utwabala bo bafwa chifukwa cha mbibi zyabo. Vileke bavisyane ngati mbale zyakukupikila pachighemo. Abanthu abo bakipa bene panthanzi papane, po bipatwile ukuba bane. Bazukuba chimanyisyo ku banthu ba Isreal.'' ³⁹ U Eieazar umuputi akasenda imbale zyaba bronzi iyakubikilamo abanthu bobakozya ba kazileka bo bakochiwa, sona bakazitinza zyaba zyakupikila pachighemo, ⁴⁰ ukuba chakumbukila ku banthu ba mu Isreal, ukuti nayumo yumo uwa kunzi yo itafumile kwa Aaron atakizenge pakocha utwa kununkhila panthanzi pa Yahweh, ukuti batakize babe ngati we Korah na banthu bache--bonsi ngati mo Yahweh akalamulila ukwendela mwa Moses. ⁴¹ Loli kundabindabi yache ichikaya chonsi icha banthu ba Isreal bakadandaula kwa Moses nu Aaron. Bakati, '' Mwakoma abanthu ba Yahweh.'' ⁴² Po chikabombiwa, bo ichikaya chabungana pakulimbana nu Moses nu Aaron, pakuti bakalinga kunthanzi kuchisakasa cha lukomano sona, lingisya, ibingu likachikupikila. Ubuchindamu bwa Yahweh bukabonekela, ⁴³ sona u Moses nu Aaron bakiza ku nthanzi ku chisakasa ichakomanilamo. ⁴⁴ Po u Yahweh akanena kwa Moses. Akati, ⁴⁵ ''Fumako kunthanzi kuchikaya icho chifukwa ni ngabamila lonsi lunonyene.'' Po u Moses nu Aaron bakinamila pansi ni vyeni vyabo, pa chisu. ⁴⁶ U Moses akanena kwa Aaron, '' Senda imbale , bikamo umoto mukasi ukufuma pa chighemo, bika utwakununkhila mukasi, nyamala lubilo buka navyo kuchikaya, sona mubapepesye chifukwa ubukali bukwiza ukufuma kwa Yahweh. Imphungo iyi yandako.'' ⁴⁷ Po u Aaron apanga ngati mo u Moses akamulinganizya. Akasamala nukuya mukasi mu chikaya. Imphungo moyandite kale pakwambukila ku banthu, po akabika utwakununkhila nukubapepesezya abanthu. ⁴⁸ U Aaron akimilila pakasi pa banthu bakufwa na bapuma; panzila yino imphungo yikaleka. ⁴⁹ Bobakafwa ni mphungo bakaba 14,700 pakubabelenga, ukupatula bala bo bakafwa aba kwa Korah. ⁵⁰ U Aaron akanyokela kwa Moses pamulyango bwa chisakasa ubwakomanilamo, sona imphungo yikamalanga.