¹ Wa Inta, jena bitai, Keli gowi inta fi neima al fi Yesua Al Mesih. ² Hajat al inta asma mini wusut shuhudin ketir, wodi le nas al muominin al bi agder ashan bi derisu nas tanin kaman. ³ Keli inta ataab ma ana, ze askeri alkwes fil Yesua al Mesih. ⁴ Mafi askeri bi istakal wa kaman huwo moskul mahajat ta haya de, ashan huwo bi wodi farah le dabit tou almusuwul. ⁵ Aidan, lo zol tani bi amulu musabagat ta jere jere, huwo ma bifus ile kan huwo hafisu kawanin ta musabagat. ⁶ Huwo dururi le muzari al bi istakal shedid bi akudu nisba ta shimar tou al awel. ⁷ Fekir an haja al ana bi wonusu, Rabana bi wodi le inta fihim ta kulu haja. ⁸ Zekir Yesua Al Mesih, min shamar ta Daud, al gowumu min bein al meitin. De be asab risala ta injil tai, ⁹ de yau nukta ta taab bitai al genziru ana ze mujirim. Lakin kilma ta Allah ma genziru. ¹⁰ Le zalik ana ithamal kulu hajat le al mukhtarin, ashan humon kaman bi ligo kulasa al fi Yesua Al Mesih, ma mejid al abadi. ¹¹ Kalam de mantik: Kan nihna mutna ma huwo, nihna bardu bi na ish mau. ¹² kan ithamalna, nihna kaman bi na hukum mau. kan nihna anguru huwo, huwo kaman bi anguru nihna. ¹³ kan nihna ma aminin, huwo bi afdal amin, le anu huwo ma bi anguru nefsu. ¹⁴ Estemir zekiru le umon an hajat del. Anziru humon gidam Allah ma bi shakil ma kalamat. be sabaab de mafi haja mohim. Be sabaab de fi kasair le del al bi asma. ¹⁵ Hawil shedid ashan inta bi wori nefsak le Allah ze wahid al mogbul, Amil al mafi sabaab al bikun indu fadia, huwo bi derisu kalam al hagiga be dikha. ¹⁶ Sibu wanasat al wasaka, al bi wosulu ketir wa ketir le haya geir Rabania. ¹⁷ Wanasat tomon bi entesir ze Jara al ma indu ilaj. Beina humon yau Hymenaeus wa philetus. ¹⁸ De yau rojulen al jeli hagiga. umon bi gul al giyama kalas hasal. humon gadir gilibu iman ta nas tanin. ¹⁹ Lakin kaman, asas al gowi ta Allah bi wogif. huwo indu kitaba de: '' Rabana arufu nas tou'' wa ''Ai zol al bi semehu isim ta Rabana lazim keli tala min hajat al ma hagiga.'' ²⁰ fi usra al ghani, ma inak bes maunat bita dahab wa fidah. Kaman fi maunat ta kasab wa tin. juzu min del le istimal al muhtaram, wa juzu le geir al muhtaram. ²¹ kan zol nedif nefsu min istikdam geir muhtaram, huwo yau maun al muhtaram. kasisu huwo, mohim le Seid, wa jahisu huwo le sokol al kwes. ²² Jere min shauwat al shababiya. Dowuro geni adil, iman, muhaba, wa salam ma nas al bi nadi Rabuna bara ma geliba nedif. ²³ Lakin abaa asila ta balada wa hamaka. Ita aruf humon bi weledu nekash. ²⁴ Kadam ta Rabana lazim ma bi kore kore. Lakin huwo lazim bi kun kerim le kulu, ger ye allimu, wa indu subur. ²⁵ Huwo lazim bi kun kerim le taalim ta delak al bi arridu huwo. ²⁶ Awu Allah bi wodi le humon iterab ta ilim al hagiga. Humon bi .kun waihin tani wa bi sibu sharik bita ibilis, badu gobudu humon ma huwo fi irada tou