¹ Buulus Rasuul ta Yesua al-Masiih be wasat mesiah ta Allah, wasat waad ta haya al fi Yesua Al Masiih, ² le Timatayos, jena al mahbub: neima, rahama wa salam min Allah al Abu wa Yesua Al Mesiih Rabana bitana. ³ Ana bi askur Allah, al ana bi kadimu min jududna ma demir al nedif, Ze ana bi zekirak daiman fi salawat bitai lel wa nahar. ⁴ Ze ana bi zekiru dumu taki, ana bi fetisak shedid, ashan ana bi mala be farah. ⁵ Bi Zekiru ana be iman bitak al hagiga, l aish awel be jiditak Lois wa umak Eunice, wa agnauni be inu aish kaman maak. ⁶ De yau sabaab ana be zekirak ashan inta bi rija estamilu hadaya ta Rabana al fi inta be wasat kutu ida tai fogak. ⁷ Allah ma wodi le nihna roho ta khof, lakin ta guwa wa muhaba wa taadib. ⁸ Keli inta ma indak fadia ta shuhuda an Rabana bitana, ma le ana, Bulus, mosjun bito. Lakin, sharik fi taab ashan injil asaab guwa ta Allah. ⁹ Allah yau kalisu nihna wa nada nihna be nadi al mukadas. Huwo amulu de, ma be wasat sokolat ta nihna, lakin be wasat khuta wa neima bito. Huwo wodi le nihna hajat del fi Yesua Al Mesih gabal bidaya ta zaman. ¹⁰ Lakin hasa kulasa ta Allah zahiru be wasat wujut ta mukalis ta nihna Yesua Al Mesih. Yesua yau kutu nihaya le mut wa jabu haya al ma endu nihaya le nur be wasat injil. ¹¹ Le anu ashan de, ainuni mubeshir, rusul wa ustaz. ¹² Ashan sabab de ana kaman taaban le hajat del. Lakin ma indi fadia. Lakin ana aruf huwo al ana bi amin. shejau ana be inu huwo gadir ashan hafisu amana al ana wodi le huwo lahadi akir zaman. ¹³ Hafisu misal ta risala ta amana al inta asma mini, be iman wa muhaba al fi Yesua Al Mesih. ¹⁴ Hajat al kwes al Allah wodi le inta, hafisu be wasat Roho Al Kudus, al gaid fi wusut bitana. ¹⁵ Inta arif de, kulu del al aishin fi Asia galabu beid mini. fi mojmu de phygelos wa hermugenus. ¹⁶ Keli Rabana zahir rahma le bet ta onesiphorous, Ashan huwo daiman bi sheja ana wa ma indu fadia ashan genzir bitai. ¹⁷ Lakin, zaman huwo fi Roma, huwo fetisu ana shedid, wa huwo ligo ana. ¹⁸ Keli Rabana zahir le huwo ashan bi ligo rahma minu fi yom dak. Kulu teriga huwo saidu ana fi Efesu, inta bi arif tamam