¹ Akhirnya, Kawan manyarieku, baramie ka lalam Tuhan. Aku hontae kaboratan manulis hal-hal am samah akan kolai laie hal itie ulih manjaga kolai. ² Bahatie-hatie taharap asu-asu, bahatie-hatie taharap kawan urang jahat, lalue bahatie-hatie akan urang am manyunat tuwuh, ³ laie dirie tie urang-urang am basunat yah am sajatie, am manyomah lalam Roh Hatalla, mamuliakan Yesus Kristus, umakan am hontae parcaya akan hal-hal am lahiriah ⁴ walau aku sabujurnya tege alasan akan bamegah kan hal-hal am lahiriah. Amun tege urang am bapikir amun inya tege alasan akan bamegah akan hal-hal am lahiriah, talobih mula aku : ⁵ Ari kadelapan aku kona sunat, bangsa Israel tulen, mula suku Benyamin, urang Ibrani am babahasa Ibrani, manurut Hukum Taurat, aku yah urang Farisi. ⁶ Lalam hal samangat, aku tie panjera ungkup, lalu lalam hal kabujur aku kaloba Hukum Taurat, aku hontae cacat. ⁷ Tapi, sagala sasuatu am huran mauntungkan aku, keken tie ku anggap rugi laie Kristus. ⁸ Bujur, sagala sasuatu ku anggap rugi dibandingkan dengan pangonalan aku dengan Yesus Kristus, am jauh lobih baharga mulae apa pun. Demi Kristus, am ku hompue urasnya hilae, laie urasnya yah jarie ku anggap rogang! nyaman aku baulih Kristus. ⁹ Aku baulih ka lalam Kristus hontaenya ka lalam kabujur am mulae dirieku kanirie am ku ulih mulae Hukum Taurat, tapi am datang mulae iman lalam Kristus, yah am kabujur mulae Hatalla am badasar mulae iman. ¹⁰ Sakiranya aku ulih mangonal Inya umakan kuasa hirup-Nya, lalue basatu lalam ka sakit-Nya akan jarie macam Inya lalam pamatie-Nya ¹¹ sahingga akhirnya aku baulih pahirup mulae antara urang matie. (Bagarak Maju Akan Panggilan Surgawi) ¹² Tapie, hontae nya aku jarie baulih atawa jarie sampurna, tapie aku manguang nyaman aku ulih manangkap inya bera kan Kristus Yesus am jarie manangkap aku. ¹³ Kawan manyarie, aku hontae maangap amun aku manangkapnya. Tapie, sutie hal am ku gawie: aku malupakan apa am tege ka lakangku lalue ma arahkan dirie ku akan apa am ka paharapku. ¹⁴ Aku tarus maju akan tujuan nyaman baulih hadiah, yah am panggilan surgawi mulae Hatalla lalam Yesus Kristus. ¹⁵ Ayo am dirie am sampurna tie bapikir bera iyah. Amun kolai hontae bapikir bera iyah, Hatalla akan manunyukan dengan jelas akan kolai. ¹⁶ Amun bera iyah, ayo dirie hirup sasuai dengan kabujur am jarie tege akan dirie. ¹⁷ Kawan manyarie, uma kan karajinku lalu ilae dengan bujur-bujur urang am hirup sasuai dengan karajin am kolai ilae mulae kami. ¹⁸ Laie, tege banya urang am hirup manjarie musuh-musuh salib Kristus. Tentang hal itie, aku jarie rajin mangesahkannya kan kolai lalue keken tie aku mangesahnya mulae dengan araie mata. ¹⁹ Akhir hirupnya urang yah kabinasaan, laie hatalla rang yah am porut rang yah, tuntang pujian rang yah hal-hal am mamalukan. Pikiran rang yah baya hal-hal am duniawi. ²⁰ Tapie, kawargaan dirie yah am surga, ka manih dirie dengan ponuh samangat manunggu kan Juru Selamat, yah am Tuhan Yesus Kristus. ²¹ Inya maubah tuwuh hina dirie manjarie samah kan ruwuh kamuliaan-Nya. Dengan kuasa-Nya yah, Kristus ulih manaing sagala sasuatu tunduk akan-Nya.