¹ Salam mulae Yakobus, palayan Hatalla umkan Tuhan Yesus Kristus, akan kadua balas suku am koyah komae ka saluruh dunia. (Ujian Iman mahasilkan Katabah) ² Kulae manyarieku, anggapja berae suti karamie jakae kolaie jatue ka lalam sagala macam pancubaan*. ³ Sabab, kolaie inggat bahwa ujian tahadap imanmu mahasilkan katabahan ⁴ Biarja katabah mamorie hasil am ponuh supaya kolaie jadi sampurna lalue baie , hontae kakurangan apa-apa. ⁵ Tapie, jakae ka antarae kolaie tege am kurang ka pintar, honanya inya mamita ka Hatalla, am murah hatie mamorie akan uras urang mayan panyalah, lalue iyah akan die borie akannya. ⁶ Tapie, inya mamintanya honie iman lalue hontae gaer laie urang am gaer berae galumang laut,die tiup ribut koyah kotie. ⁷ Urang berae iyah hinang mangirae akan manarimae sagalanya mulae Tuhan. ⁸ Urang am dua hatie hontae akan ranaie lalam satiap jalan hirupnya. (Kasugih am Sabujurnya) ⁹ Biarja manyarie am hidup baya-bayae bangga metuh inya ditinggiekan, ¹⁰ lalue urang sugih metuh inya digorae ka amlowa laie berae kambang rumput, inya akan hila. ¹¹ Sabab, mataarie timul balalue hangat am tongah arie, mangolas rumput, kambangnya jatue, lalue karomisnya gin hila. Berae iyah jam, urang sugih akan hila ka tongah-tongah usahanya. (Am mancubae Hontae Datang mulae Hatalla) ¹² Di tuahkan urang am tahan lalam pancubaan, laie limah inya tahan uji, inya kan manarima upah pahirup am dijanjie akan am mangasih Inya. ¹³ Jakae saurang dicubae, hinang inya bapaner, "Aku metuh dicubae Hatalla." Sabab, Hatalla hontae ulih dicubae laie si Imun lalue Inya kanirie hontae ulih dicubae sapae ja. ¹⁴ Jakae, satiap urang dicubae metuh inya ditunnae lalue di kowat laie kahonaya kanirie. ¹⁵ Kametuh kahonanya babuah, inya maranakan dusa lalue katikae dusae jadi mansa, inya akan mamparanakan pampatie. ¹⁶ Kulae-manyarie am kukasih, hinang sosat. ¹⁷ Satiap pamorie am baie umakan satiap pamorie sampurna datang mulae tinggie, turun mulae Ampoie sagala torang, mulae-Nya hontae arae barubah atauwa tatukar kamayang. ¹⁸ Tinggie kahona-Nya kanirie, Inya mangaruh dirie honie firman* kabujur supaya dirie jadi buah am sulanya mulae uras karuhan-Nya. (Manongar lalue Manulat kahona Firman Tuhan) ¹⁹ Kulae-manyarie am ku kasih, ilakanmah itie: honalah satia-tiap urang copat kan manongar, tapie lamat kan bapaner, lamat jam kan gusar. ²⁰ Sabab, pangusar kalunen hontae mangawie kabujur Hatalla. ²¹ laie iyah, buangkan sagala am hontaesuci umakan banyanya am jahat, lalue tarimakan honie kalomah kalowa hatie firman Hatalla am jadi tatanam ka lalam kolaie, am sanggup mangalapkan jiwamu. ²² Baie bagawiekan firman hinang cumae bayae manongar ja; jakae hontae, kolaie manipu nirie kanirie. ²³ Sabab, jakae urang manongar firman, tapie hontae manulatnya, inya berae urang am metuh mananture muhaenya kacaromin. ²⁴ Limah mananture nirienya lalue badarie, inya laca lupae berae apae muhaenya tarie. ²⁵ Tapie, urang am manaliti hukum am sampurna, iyaham hukum am mamonang, lalue manulat ka lalamnya, inya hontae jadie panongar am palupae, tapie baie bagawie kan firman. Inya akan batuah rajakie tinggie apae am jadie dikaruhnya. (Ibadah am Baie akan Hatalla) ²⁶ Jakae saurang mangira bahwa inya yaham urang am rajin baibadah, tapie inya hontae ulih manahan lilahnya, inya manipu hatienya kanirie. Am ditulatnya iyah sia-siae. ²⁷ Ibadah am baie umakan hontae isa kapaharap Hatalla Ompaie dirie iyaham manguang kawan-ana nule lalue kawan-balue am metuh ka oyoh pamanya, lalue mahaga arepnya kanirie supayae hontae irusak laie dunia.