¹ Manyari-manyari, hinang manunyu imanmu lalam Tuhan dirie am mulia, Yesus Kristus, umakan mambeda-beda urang. ² Jaka tege urang datang ka sinagogemu umakan mahonie cincim amas umakan pakaian am mahal, katika iyah datang jam urang susah am babaju pakaian isa, ³ umakan kolai mori katahu akan urang am bapakaian am mahal iyah umakan bapaner ka inya, "Palus duru ka homan am baie itie," tapie ka urang am susah iyah kolai bapaner, "Badiri koyah!" atau "Duru ka damping kakiku!" ⁴ Apa honta kolai jarie mambeda-beda ka antara kolai umakan jarie hakim umakan pikiran-pikiran am jahat? ⁵ Manyari-manyari am kusayang, dongar! Apa honta Hatalla jarie mamilih urang am susah ka mata dunia akan jarie sugih lalam iman umakan mawaris karajaan Hatalla am jarie Inya janyie ka urang am sayang akan Inya? ⁶ Tapie, kolai jarie mangacala urang susah. Apa honta urang sugih am mamonya umakan mamita kolai ka pangadilan? ⁷ Apa honta urang am mamuru nama Yesus, am laienya kolai di timai? ⁸ Jaka kolai mangawi hukum kasih pas umakan Buku Barasih, iyah am "Sayang samah kalunen bera kolai kaniri," kolai jarie mangawi am bujur. ⁹ Amun jaka kolai mambeda-beda urang, kolai mangaruh dusa umakan ditotap jarie palangar hukum laie hukum. ¹⁰ Sapa jam am mamatuh uras hukum, tapie honta ulih mamatuh suti bahagian meh, inya basalah ka uras hukum iyah. ¹¹ Sabab, Inya am bapaner, "Hinang ngawi am honta bateknya," bapaner jam, "Hinang mampatie." Jarie, jaka kolai honta mangawi am honta bateknya, tapie kolai mampatie, kolai jarie malangar hukum iyah. ¹² Bapaner umakan bagawie jarie urang-urang am akan dihakim honi hukum am malapang. ¹³ Sabab, pahakim honta manyihae ka urang am honta manunyu siha; siha akan monang katingi pahakim. (Iman am Mayan Ara Pangawi iyaham Matie) ¹⁴ Manyari-manyari,apa gunanya urang mamaner iyah am inya bagora iman, tapie inya honta bagora pangawi? Ulih honta iman iyah manyalamat inya? ¹⁵ Jaka siku manyari kalakie umakan labinie honta bagora pakaian umakan perlu pamakan pamuseh saarie-arie, ¹⁶ umakan siku urang ka antara kolai bapaner ka inya, "Ingkas lalam ranai sanang, samoga tuwuhmu dihangat umakan dikonyang," tapie kolai honta mamori ka inya apa am diperlu tuwuhnya, apa gunanya iyah? ¹⁷ Bera iyah jam iman, jaka iman honta dipauma gawie-gawie, samah jam iman iyah matie. ¹⁸ Amun, asanya tege urang am bapaner, "Kolai tege iman, umakan aku tege gawi." Aku akan manimat, "Tunyu imanmu honta honi am digawi, umakan aku manunyu imanku honi gawie." ¹⁹ Kolai yakin iyah am Hatalla iyah suti. Iyah bujur. Hantu jam yakin umakan rang kakiti. ²⁰ Uii urang paleng! Hona honta kolai bareneng iman mayan ara gawi iyaham sia-sia? ²¹ Hontanya Abraham, ompai dirie, dikona laie gawi-gawi katika inya mamori Ishak, ananya, ka tingi meja? ²² Ila ja iyah am iman bahanep umakan gawi-gawinya, umakan laie gawi-gawinya, iman disampurna. ²³ Diputus am dipaner Buku Barasih, "Abraham yakin ka Hatalla, umakan iyah dihitung kainya jarie kabujur," umakan inya dijoku "Kawal Hatalla". ²⁴ Jarie, kolai maila iyah am mula gawi urang dibujur, honta mula iman gona. ²⁵ Bera iyah jam, Honta Rahab, labinie am honta bateknya, dikona laie gawi katika inya maalap mata-mata Israel umakan marompuh urang badari malalu jalan am bukan? ²⁶ Jarie, samah bera tuwuh mayan ara roh iyah am matie, bera iyah jam iman mayan ara gawi iyaham matie.