¹ Mulae Paulus, am jadie rasul Yesus Kristus laie kahona Hatalla, mulae Timotius manyarie saiman dirie. ² Akan urang-urang kudus kawan-manyarie saiman am satiae lalam Kristus amka Kalose. Anugerah akan kolaie tuah rajakie mulae Hatalla Ompaie dirie. (Badoa umakan Ucapan Syukur Paulus) ³ Katikae badoa akan kolaie kamie lalue maucap syukur akan Hatalla, Ompaie dirie Tuhan Dirie Kristus Yesus, ⁴ laie kamie manongar kan imanmu lalam Yesus Kristus kasih am kolaie gorae akan uras urang kudus. ⁵ Iman kasih iyah timul laie maharap am die sadiae akan kolaie ka surga, am jadie kolaie dongar lalam firman, iyaham Injil. ⁶ Injil iyah jadie sampaie ka kolaie bahkan uras saluruh dunia Injil itie tarus mahasil buah banya, samah berae am jadie ka antara kolaie, mulae sula kolaie manongarnya mamaham anugerah Hatalla lalam ka bujurnya. ⁷ Kolaie jadie balajar hal itie mulae Epafras, kawan sapalayanan kamie am kakasih, am jadie palayan Kristus am satiae akan kolaie. ⁸ Inyae yaham jadie mamarahnya akan kamie laie kasihmu lalam Roh. ⁹ Laie iyah, mulae arie kamie manongarnya, kamie hontae basae bahontie badoa akan kolaie am minta supaya Hatalla mamorie kolaie pangatahuan akan kahona-Nya lalam sagala hikmat pangartian rohani. ¹⁰ Berae iyah, kolaie ulih hidup akan cara layak ka paharap Hatalla, manyanangkan-Nya lalam sagala hal, mahasil buah lalam satiap pangawie am baie, batumuh banya lalam pangatahuan akan Hatalla. ¹¹ Samoga kolaie gancang kan sagala kagancang umakan kamuliaan kuasa-Nya supaya kolaie baulih sagala panulat kasabaran umakan karamie. ¹² Basyukurja ka Ompaie am jadie mangaruh kolaie ponuh syarat akan manarimae warisan urang-urang kudus lalam torang. ¹³ Inyae jadie molopas dirie mulae kuasa potang maminah dirie akan Karajaan Ana-Nya am kakasih. ¹⁴ Lalam Inyae, dirie jadie die towus, iyah jam mampun dusa-dusa tinggie dirie. (Kristus am Partama akan Sagala Hal) ¹⁵ Inyae tieam gomar mulae Hatalla am hontae ilae, am tuhae mulae uras karuhannya. ¹⁶ Sabab, laie-Nya, sagala am tege ka surga umakan bumi die karuhnya, am ilae umakan am hontae ilae, baie takhta, kakuasa, pamaretah. honagin panguasa. Uras am tege jadie dikaruh-Nya akan Inyae. ¹⁷ Inyae jadie tege sahompan am tege, uras am tege barotae-rotae akan Inyae. ¹⁸ Inyae tieam kapala mulae tuwuh, iyaham ungkup. Inyae tieam am pasula, am tuhae mulae antara urang matie supaya Inyae jadieam utama mulae antara am tege. ¹⁹ Sabab, Hatalla bakahona laie uras akan-Nya diam lalam Inyae. ²⁰ Malalue Inyae, sagala amtege badamaie akan nirie-Nya, baie am tege ka bumi umakan surga, iyaham badamaie malalue darah-Nya am tabunsang tinggie kayu salib. ²¹ Kolaie hariah taasing, mamusuh Hatalla lalam pikiranmu, lalue mangaruh gawie-pangawie jahat, ²² metuh itie kolaie jadie badamaie akan tuwuh jasmani Kristus malalue pampatie-Nya mamorie kolaie akan pamorie am kudus, hontae cacat, hontae bakunat ka paharap Hatalla. ²³ Jadie tatap mae kolaie diam lalam iman, segah, toguh, hontae baunuie mulae panharapan kan Imjil am kolaie dongar, am jadie dieparah akan karuhan kalowa langit, am laienya aku, Paulus, jadie palayan. (Palayanan Paulus akan Ungkup) ²⁴ Keken itie, aku baramie lalam paoyohku akan kolaie laie kalalam dagingku aku mancukup apae am kurang lalam paoyoh Kristus, akan tuwuh-Nya, iyaham ungkup. ²⁵ Aku jadie palayan ungkup sasuaie kan tugas gawie palayanan mulae Hatalla am die sorah akan aku laie kolaie supaya aku ulih mangabar firman Hatalla umakan saponuhnya. ²⁶ Itieam. rahasia am tatawu mulae zaman ka zaman mulae turunan ka turunan, tapie am metuh itie jadie diepailae akan urang-urang kudus-Nya. ²⁷ Hatalla hona mampailae akan pamanya berae apae sugihnya am mulia itie ka antara bangsa-bangsa bukan, bahwa Kristus tege lalam kolaie, iyaham pangharapan mulae kamuliaan. ²⁸ kamie mangabar akan Inyae am manyaelue malajar satiap urang honie sagala hikmat laie iyah kamie ulih manaing satiap urang jadie tuhae lalam Kristus. ²⁹ Akan iyaham, aku jam baoyoh-oyoh, bajuang laie kuasa-Nya am bagawie gancang ka lalam aku.