¹ Metuh arie Pentakosta datang, urang uras barota tege ka homan am samah. ² Lalue, salenga tege tadongar mula langit, bungie bera tiupan riwut onya, lalue bungi iyah mamonuh saisi dangau homan urang metuh duru. ³ Lalue, tampa ka urang lilah-lilah bera nyala api am manyamar lalue hingap ka tingi urang kaniri-kaniri. ⁴ Maka, urang uras diponuh laie Roh Barasih lalue nampara bapaner lalam macam-macam bahasa, bera am dibori Roh Barasih akan urang paner. ⁵ Metuh iyah, tege urang Yahudi am diam ka Yerusalem, urang-urang saleh mula tiap-tiap bangsa ka loba langit. ⁶ Lalue, metuh bungi iyah tadongar, sakumpulan urang banya datang barota-rota lalue heran laie satiap urang metuh manongar urang iyah bapaner lalam bahasa urang kaniri. ⁷ Urang takjub lalue heran, samil bapaner, "Bukan kah urang uras am metuh bapaner iyah am urang-urang Galilea? ⁸ Lalue, apa mungkin dirie manongar urang honi bahasa homan diri dilahirkan? ⁹ Urang-urang Partia, lalue Media, lalue Elam, lalue Penduduk Mesopotamia, Yudea, lalue Kapadokia, Pontus, lalue Asia. ¹⁰ Frigia, lalue Pamfilia, Mesir, lalue daerah-daerah Libia damping Kirene, lalue panatang-panatang mula Roma, baie urang-urang Yahudi lalue para proselit, ¹¹ urang-urang Kreta lalue Arab. Dirie manongar urang bapaner honi bahasa dirie tuntang pangawi-pangawi bakah Hatalla." ¹² Lalue, urang uras takjub lalue bingung samil bapaner suti kan am bukan, "Apa arti uras itie?" ¹³ Tapie, urang bukan mangorah lalue bapaner, " Urang dimabukan laie anggur baharu." Petrus Bapaner ka Urang Banya ¹⁴ Tapie, Petrus badirie barota kasablas rasul, maangkat suaranya lalue bapaner ka urang, "Uii urang-urang Yahudi lalue uras am tingal ka Yerusalem, nauh nya diingat laie kolai lalue dongar panerku. ¹⁵ Laie, urang-urang itie hinta mabu, bera am kolai kira laie arie baharu jam ka tolu, ¹⁶ tapie itie am dipaner malalu Nabi Yoel: ¹⁷ 'Lalue, metuh arie-arie terakhir akan tajadie' Hatalla berfirman: amun Aku akan mancurahkan Roh-Ku ka tingi uras kalunen. Lalue, ana-anamu kalaki lalue ana-anamu labini akan banubuat, lalue ana-ana muramu akan maila paila, lalue urang-urang tuha ka antaramu akan mampikan mimpi-mimpi. ¹⁸ Bahkan, ka tingi hamba-hamba-Ku kalaki lalue hamba-hamba-Ku labini metuh arie-arie iyah, Aku akan manurahkan Roh-Ku, lalue urang akan banubuat. ¹⁹ Lalue, Aku akan manunyu mukjizat-mukjizat ka langit, ka tingi, lalue tana-tana ajaib ka bumi, ka loba, darahlalue apie, lalue kabut asap. ²⁰ Mataarie akan di ubah jadie kapotang lalue bulan jadie darah, sahompan arie Tuhan am bakah lalue mulia datang. ²¹ Lalue akan tajadie, satiap urang am manimai nama Tuhan akan diselamatkan."' Yoel 2:28-32 ²² "Uii urang Israel, dongar paner itie. Yesus, Urang Nazaret, siku am dinyatakan ka antara kolai laie Hatalla akan hal-hal ajaib, mukjizat-mukjizat, lalue tana-tana, am jadie Hatalla tunyukan ka antara kolai malalu Inya, bera am kolai kaniri ingat. ²³ Yesus itie, am di sorahkan manurut rencana am jadie ditentukan lalue paingat Hatalla sahompan nya, kolai mamatie lalue manyalib-Nya malalu jarie urang-urang durhaka. ²⁴ Tapie, Hatalla mahuas-Nya, lalue malopas-Nya mula penderitaan maut laie hinta mungkin akan-Nya dikuas laie pamatie. ²⁵ Laie, Daud basa bapaner tuntang Yesus, 'Aku maila Tuhan tarus tege ka paharapku, laie Inya tege ka sorap kananku lalue aku hinta akan digoyahkan. ²⁶ Laie iyah, hatiku barami, lalue lilahku basorak-sorak. Tuwuhku jam akan diam lalam pengharapan, ²⁷ laie Kolai hinta akan maningalkan jiwaku am tege ka dunia urang mati, atau maubah tuwuh Urang Barasih-Mu maila kebinasaan. ²⁸ Kolai jadie mamarah ka aku jalan pahirup. Kolai akan mangaruhku ponuh sukacita honu muha-Mu.' ²⁹ Kawan manyari, aku tahu bapaner ka kolai honi kayakin tuntang ompai laluhur dirie, Daud, amun inya jadie matir lalue dikubur, lalue kuburannya masih tege barota akan dirie sampai arie itie. ³⁰ Jadie, laie inya iyah am siku nabi lalue maingat amun Hatalla kadie bajanyi honi sumpah ka inya akan manuru suti mula katurunan Daud ka tingi takhtanya. ³¹ Laie iyah, Daud am maila hal itie sahompannya, inya bapaner tuntang pahuas Kristus amun: 'Inya hinta akan ditingal ka dunia urang matie, lalue tuwuh-Nya hinta maila kebinasaan.' Mzm. 16:10 ³² Yesus itie am Hatalla huaskan lalue kamie uras nya iyah am saksi tuntang hal iyah. ³³ Laie iyah, sajadie ditingal laie jarie kanan Hatalla lalue manarima janyi mula Bapa tuntang Roh Barasih, Inya jadie mancurahkan, baie apa am kolai ila lalue am di dongar. ³⁴ Laie, Daud hinta nai ka surga, tapie inya kaniri baparah, "Tuhan baparah ka Tuanku, 'Duru ka sorap kanan-Ku, ³⁵ sampai Aku mangaruh musuh-musuh-Mu jadie tumpuan kaki-Mu."' Mzm 110:1 ³⁶ "Laie iyah, nauh nya uras dangau Israel ingat pasti amun Hatalla jadie mangaruh-Nya TUhan lalue Kristus, itie am Yesus am jadie kolai salibkan." ³⁷ Metuh urang manongar hal itie, tatusu hatie urang, lalue baparah ka Petrus lalue para rasul bukannya, "Kawan manyari, apa am harus kamie karuhkan?" ³⁸ Lalue, Petrus baparah ka urang, "Batobatlah lalue baptiskan kanirimu kaniri-kaniri lalam nama Kristus Yesus akan pengampunan dosa-dosamu, lalue kolai akan manarima Roh Barasih. ³⁹ Laie, janyi itie iyah am akan kolai lalue ana-anamu, lalue akan uras urang am masih jauh, sabanya am Tuhan Hatalla dirie akan manimainya." ⁴⁰ Lalue, honi pamanya paner bukan, Petrus basaksi honi kabujur-bujur lalue baseru ka urang, ujanya "Selamatkanlah kanirimu mula generasi am bengkok itie!" ⁴¹ Urang-urang am manarima paner Petrus dibaptis lalue metuh arie iyah jumlah urang ditamah sakitar tolu ribu jiwa. (Persekutuan Urang-Urang Percaya) ⁴² Urang batekun lalam pangajaran rasul-rasul lalue lalam persekutuan, lalam mamocahkan roti, lalue lalam badoa. ⁴³ Lalue, pangola datang ka tingi satiap jiwa, lalue banya hal ajaib lalue tana-tans am tajadie malalu para rasul. ⁴⁴ Uras am percaya bakumpul barota lalue hompu uras sasuatunya barota-rota. ⁴⁵ Lalue, urang manyual harta bana lalue hompunya, limah iyah mamagi-maginya ka utras urang sasuai keperluannya kaniri-kaniri. ⁴⁶ Saban arie,bahatie bulat urang bakumpul barota Bait Hatalla lalue mamocah-mocahkan roti mula dangau ka dangau. Urang manarima pamakan urang honi karami lalue tulus hatie, ⁴⁷ samil mamuji Hatalla lalue urang di kahona laie banya urang. Lalue, satiap arie Tuhan manamah jumlah urang, iyah am urang-urang am diselamatkan.