¹ Metuh zaman holu, tege nabi-nabi palsu ka antara umat Hatalla, bera botie tie jam tege guru-guru palsu ka antara kolai am dengan mantabu malajar-lajaran am marusak, bahkan manyangkal Tuhan am jadi manobus urang senga manatang mahancur am copat mula tingi diri urang kaniri. ² Akan, tege banya urang am akan mairing cara hirup urang am honta bamoral, lai urang, jalan kabujur akan dihujat. ³ Dengan sarakah urang akan mangalap untung mula kolai dengan paner am ponuh parongka; hukuman bagi urang am jadi disadiakan metuh holu hariah honta akan ditunda-tunda, lalu mahancur urang honta akan talolap. ⁴ Lai, jakai Hatalla honta manahan diri katika kawan malaikat badosa, am bukan mamedak urang ka lalam naraka lalu mayorahkan urang ka lalam rantai kapotang akan ditahan sampai panghakiman, ⁵ jakai Hatalla jam honta sayangkan dunia purba kacuali Nuh, saurang pamarah kabujur barota tujuh urang bukannya, tapi manatang arai bah ka tingi dunia am honta mangenal Hatalla; ⁶ jakai Hatalla manghukum kota Sodom lalu Gomoro dengan cara mahancur kadua kota iyah senga manjadi abu, lalu manjadi urang sabagai contoh tuntang apa am akan tarjadi ka urang-urang jahat am hirup ka masa salanjutnya; ⁷ jakai Hatalla manulungkan Lot, urang bujur iyah, am sia lai cara hirup am najis mula urang-urang am bukan mangenal hukum, ⁸ (akan samantara waktu, Lot hirup ka tongah-tongah urang satiap ari, lalu jiwanya am bujur sia lai maila lalu manongar pangawi-pangawi jahat am inya ila lalu nongar;) ⁹ Maka Hatalla pasti tahu bera apa malopaskan urang-urang bujur mula pancobaan manahan urang-urang jahat akan dihukum mula ari panghakiman, ¹⁰ khusunya urang am mamuaskan tubuhnya lalam kahona cemarnya, am maremehkan pamerintah. Dengan hurau lancang kasombong, guru-guru palsu iyah honta gola mahina makhluk-makhluk am mulia, ¹¹ padahal kawal malaikat, am maskipun jauh lobih kuat lalu lobih bakuasa mula urang, honta magucapkan tuduh am mangandung hujatan taharap urang ka paharap Tuhan. ¹² Guru-guru palsu itie bera lau julu am honta baakal, am kona lahirkan akan ditangkap lalu dipati; urang manghujat apa am honta urang mangerti, akan dipatikan lalam kahancuran urang kaniri; ¹³ urang akan ditimpa kajahatan sabagai upah tingi pangawi urang am jahat. Urang manganggap bamabu-mabu ka siang ari sabagai karami. urang yaham noda lalu cela, barami lalam musila urang katika makan barota-rota dengan kolai. ¹⁴ Urang hompu mata am ponuh nafsu perzinaan am honta bahonti mangaruh dosa, urang manggoda urang-urang am lomah jiwanya, lalu hati urang jadi talatih lalam kasarakah. Urang yaham ana-ana am kona kutuk! ¹⁵ Urang maningalkan jalan am lurus mairing jalan am sosat, iyaham jalan Bileam bin Beor, am suka manarima upah akan pangawinya am jahat. ¹⁶ Amun, inya manapat kona salu am nyaring tingi palanggarannya mula saiku keledai am bisu, tapi am bapaner dengan suara kalunen senga mahonti pangaruh gila nabi iyah. ¹⁷ Urang-urang itie bera mata arai am koring lalu bera kabut am disapu lai badai. kapotang am paling pekat mula disadiakan akan urang. ¹⁸ Dengan paner am sombong, tapi mayan bukti, urang manyeret urang-urang am jadi talopas mula urang am hirup lalam kasosat dengan kahona-hona daging am dengan honta bai. ¹⁹ Guru-guru palsu iyah bajanji kabebasan, padahal urang kaniri yaham hulun mula kamatian. Lai, apa pun am jadi mangola sasaurang ka kolai urang iyah hulun. ²⁰ Lai, jakai urang jadi dilopaskan mula pancemaran dunia am jahat malalu pangenalan akan Tuhan Juru Salamat diri, Yesus Kristus, tapi limah iyah baulang mula ka dunia am jahat iyah lalu dikuasa lainya, maka urang akan manjadi lobih buru mula sahompannya ²¹ Akan lobih bai urang honta basa mangesene jalan kabujur iyah, mula jadi mangesenenya urang babali mula hukum suci am jadi dibori ka urang. ²² Urang yaham gambar mula peribahasa am bujur itie; ''Asu baulang ka putahnya kaniri'' lalu ''Babi am jadi dibarasihkan, baulang mula bakubang ka lumpur.''