¹ Mulae Simon Petrus, hamba umakan rasul Yesus Kristus, akan urang am jarie manarimae iman am samah dengan am kami hompue malalue kabujur Hatalla umakan Juru Selamat dirie, Yesus Kristus. ² Kiranya pamorie lalue damai sejahtera malimpah akan kolai lalam pangonalam akan Hatalla lalaue Yesus, Tuhan dirie. (Urang am Dipangil lalue Dipilih laie Hatalla) ³ Kuasa-Nya am ilahi jarie mamorie akan dirie sagala sasuatu am bakahonae akan hirup umakan kasalehan, malalue kapintar akan Inya am jarie manimaie dirie manujue akan kamuliaan lalue kabaikan-Nya. ⁴ Malalue, Inya jarie mamorie akan dirie janjie-janjie-Nya am bujur-bujur bakan lalue baharga nayaman honie janjie-janjie iyah kolah ulih umae ka lalam keilahian-Nya, lalue tahindar mulae karusakan am tajadie ka dunia, am dikaruh laie macam-macam hawa nafsu. ⁵ Akan tujuan yah, bausaha dengan bujur-bujur akan manambah imanmu honie kabajikan, kabajikan honie kapintar, ⁶ lalue kapintar honie panguasaan dirie, lalue panguasaan dirie honie kasabar, kasabar honie kasalehan, ⁷ kasalehan honie kasih manyarie, kasih manyarie honie kasih am hontae mamentingkan dirie kanirie. ⁸ Laie, amun urasnya tie tege lalam kolai lalue tarus batamah, maka kolai hontae mungkin manjarie sia-sia atau hontae babuah lalam kapintar akan Tuhan dirie, Yesus Kristus. ⁹ Tapie, urang am hontae tege urasnya yah am urang am hontae ulih mailae dengan jelas lalue butae laie inya lupa amun inya jarie dibarasih laie dosae-dosaenya am lalue. ¹⁰ Laie iyah, kawan manyarieku, bausaha lobih giat mula akan mamastikan amun kolai bujur-bujur konae pangil lalue dipilih; laie kolai mangawienya, kolaie hontae akan jatue. ¹¹ Amun bera iyah, pintu ka lalam karajaan kekal Tuhan umakan Juru Selamat dirie, Yesus Kristus, akan tabuka lebar akan kolai. ¹² Iyah am laienya, aku bamaksud akan salalue maingat kolai akan uras tie, sakalipun kolai hontae maingatnya lalue jarie bangun dengan kokoh lalam kabujur am keken tie kolai hompue. ¹³ Salama aku masih hirup lalam kemah duniawi tie, aku maanggap perlu nyaman mandorong kolai honie cara mainggat kolai, ¹⁴ laie aku ingat amun aku honae maningal kan kemah tie macam am jarie ditunyuk akan aku dengan jelas laie Tuhan dirie, Kristus Yesus. ¹⁵ Lalue, aku honae bausaha honie sagonap usahaku nyaman mangaruh kolai tatap maingat urasnya tie salopas panarieku. (Saksi Mata Kamuliaan Kristus) ¹⁶ Laie kami hontae maumae mitos-mitos am di karuh honie kacerdikan katika mamperkonalkan akanmu kuasa umakan kadatangan Tuhan dirie, Yesus Kritus, tapie laie kami yah saksi-saksi mata akan kamuliaan-Nya. ¹⁷ Laie katika Yesus manarimae hormat lalue kamuliaan mulae Hatalla Ompaie, samah bera metuh inya paner akan-Nya laie am Palingmulia, "Itie Anae-Ku am Kukasih, Akan-Nya am Aku bakahonae," ¹⁸ kami jam manongar bungie yah datang mulae surga katika kami basamah-samah dengan-Nya kaingie gunung am barasih. ¹⁹ Kami jam samakin yakin laie paner nubuat, am sabaienya kolai jam perhatikan dengan buju-bujur, samah bera mailae pelita am bacahayae ka homan am golap, sampai pagie datang lalue bintang fajar terbit lalam atiemu. ²⁰ Tapie, hal tautamae lalaue harus kolaie pahami yah am amun hontae tege nubuat lalam Kitab Barasih am baasal mulae penafsiran sikue urang, ²¹ laie hontae tege sutie jam nubuat am tege mulae kahonae kalunen; sabalinya, urang-urang bapaner katingie nama Hatalla manurut pimpinan Roh am Barasih.