¹ Hinam manyalue kalakie am lobih tuhae hurau karas, tapi hormatkan iya beraekan ompaimu lalue akan kalakie am paling babiya mulae kolai salue iyae samah kan manyarie. ² Lalu akan labinie am lobih tuhae hormatkan iya berae kan inai mu, lalue akan labinie am babiya salue iyae berae kan aring mu umaekan ponuh kabaikan hatie. (Mampahati Kaban Balue Randae) ³ Hormatlah akan kaban balue randae am buju-bujur balue randae. ⁴ Tapie,amun balue masih bagorae anak atau cucu, uranglah am paling holue harus balajar manunyukan bakti nyae akan saisie dangaunyae kanirie. Justru berae iyah, rang jadi mambalas budi akan urang tua nyae rang, sabab hal itielah am mangaruh sanang Hatalla. ⁵ Sadangkan balue am buju-bujur balue randae lalue hirup kanirienyae,iyae harus mangorae harapannyae akan Hatalla umaekan tarus manaikan parmohonan lalue badoa siang malam. ⁶ Tapie, balue am hirup bayae bafoya-foya, iyae jari matie walaupun iyae masih hirup. ⁷ Parintahkan ja hal-hal itie akan ungkup supayae rang urasnyae hontae basalah. ⁸ Akan tatapie, amun siku urang hontae mamaliharae sanak kaluaganyae kanirie,am pasti kaluarganyae am damping,barartie iyae akan manyangkal imannyae lalue iyae lobih buru mulae urang am hontae pacaayae Hatalla. ⁹ Balue am ditamaekan ka lalam daftar bayae am labinie am baumur paling hontae onam puluh tahun, manjadi binie mulae siku lakie, ¹⁰ lalue dikasenei laie pangawie am baie, iyah am mamakah kawan-ana, mamorie homan diam, mamasu kakie urang-urang barasih, marompuh urang am lalam kasusah, lalue bahimat lalam satiap pangawie am baie. ¹¹ Tapie, kawan balue am lobih biya hinam di tamaekan ka lalam daftar, sabab mun kahona hasrat nyae balakie mangaruh pamanya bajauh mulae Kristus, pamanya diayah hona kawin mulae. ¹² Hal itie tahue manatangkan hukuman laie rang banya jari kalupae janyie sulanyae am rang banya ngaruh gawie sahompannyae. ¹³ Di samping iyah jam, rang banya nampara tabiasa hontae pahias-hias,lalue bakoca mulae dangau suti ka dangau am bukan. Hontae iyah gonae, rang jam mangutu mangonam lalue umae campur urusan urang bukan, mamaner hal-hal am saharusnyae hontae rang panerkan. ¹⁴ Sabab iyah,aku hona supayae kawan balue am masih biya kawin mulae, nyaman baulih ana, lalu maurus rumah dangaunyae supayae hontae arae kasompatan musuh akan marusak rang. ¹⁵ Sabab, babarapae urang jari babali umae setan. ¹⁶ Amun tege siku urang labinie pacaya am tege bagorae kaluarga atau babuhannyae am balue, nauhnyae rang mamalihara kawan balue iyah supaya ungkup hontae tabeban,lalue ungkup ulih marompuh kawan balue randae bukan am bujur-bujur harus di tulung. (Masalah Tuhae Ungkup lalue Hal-Hal am Bukan) ¹⁷ Kawan tuhae ungkup am maurus ungkup puna baik patut manarima panghormatan dua kali lipat,tarutama akan rang am bagawie bahimat kalalam manorang bungie Hatalla tuntang malajar. ¹⁸ Sabab, Surat Barasih jari tatulis, ''Hinam mangobat nyawae sapie am metuh mairi gandum,''lalue urang am bagawie bahak baulih upahnyae.'' ¹⁹ Hinam manarima tuduhan am dijatuekan akan tuhae ungkup kacuali tege dasarnyae atau bukti mulae dua tolue urang saksi. ²⁰ Rang am mangaruh dusa harus di salue ka paharap saluruh urang supayae am bukan jadi gola mangaruh dusa. ²¹ Kapaharap Hatalla, Yesus Kristus, lalue kawan malaikat am tapilih, aku mamitae kakolai supayae buju-bujur mairing tanae-tanae itie hontae mandahawa atau bapihak-pihak. ²² Hinam hurau laca maomah jarinyae katingi sapajam atau hinam umae ngalap bagian lalam dusa urang bukan. Jagalah arepmu supayae masih barasih. ²³ Hinam bayae marai arai putih,tatapie gunaekan koci anggur supyae porutmu lalue tubuhmu am halajur sakit. ²⁴ Dusa mulae sabagin urang puna jelas tailae sampai manuntut urang akan pangadilan. ²⁵ Berae iyah jam tege pangaruh am baie am jelas tailae. Tatapie pangaruh baie am hontae tailae jam, hontae akan tarus mantawu.