¹ Pẽinte arape ka'arumima ohorã Pedro hareka Juan oho reta tupaope jurure verãre. ² Haipe'i pẽinte kuimbai oarãvãĩ vatamba, opa ara rahaha hareka ñonohã õche ''Mashyãva'' he'iashuape jururete'ishu kyrypoti opaite tupaope ichevare. ³ Hokava kuimbai vatambava hesha Pedro hareka Juan ichepo oho tupaoperã, jururetẽi'ishu kyrypoti. ⁴ Hãrã Juan hareka Pedro mãĩjyreherã, Pedro heishu: Mãĩ yryrehe. ⁵ Haipe ko kuimbai mãĩkavihe, mõãte mãĩnunga mẽiẽiposhu retarã. ⁶ Pedro heishu: Oro hareka kyrypoti mba'ety are, tẽivã ĩmẽi'areva ãmẽiẽiponde; Hesukristo Nazaretva heepe pũ'ã hareka vata. ⁷ Pedro opa ijetarã pysyshu ipo jakata kyty'õrã mupũã. Haipe vatamba vekua, tymare hareka pytare pyrãtajy. ⁸ Ko kuimbai vatamba vekua oporã õñepyrõ vata. Haivi iche hãndi reta tupaope, opo'i vate omombaishu Tumpa. ⁹ Hãrã opaite kuaretare hesha vatajyrã hareka omombai vasu jyve reta Tumpa, ¹⁰ opa mbyrymãĩ reta hareka kuãã reta mbaivara iko shara kuaa reta ko kuimbai hai vapyse'ia tupao hõchepe ''Mashyãva'' he'iashuape. ¹¹ Ko vatambava kuera vekua hejãã reta Pedro hareka Juan hãrã opaite kuareta tentape õre mbyrymãĩterivare ryheve ñani jyraha õche vasu'õ kyty Salomon he'iashua. ¹² Pedro hesha kovarã heishu reta: Mãrã'ĩrãra pee Israelitare, mbyry pymãĩhe ko ikovare? Mãrã'ĩrãra pymãĩpi yryrehe, ore mynguerahava rãĩmi kova kuimbai mãĩrã ore mbyvatahajya rãĩmi ẽirẽimbaikatu hareka yryrykove mbijicheava Tumpa pevarã rupii? ¹³ Abraham, Isaac, Jacob ñu Tumpa hareka ñanytynondevare ñu Tumpa rãnga, vateiteve ñono hai tay Hesukristo opaite jokueva retaivi, pee pymẽiẽi hareka piñomipyre Pilato hẽinonde, hai heimatẽiã poishi verã. ¹⁴ Tẽivã pee piñomi heko kaviva hareka hekope kavi'ia, haivi hẽindakuepe pirure poiashi verã Barrabas, puruka'ia. ¹⁵ Kyrã pijuka tykove Ija, tẽivã Tumpa mynguerajy manovare mbyteivirã hãrã ore hai hokava mbai heshaha vekua. ¹⁶ Ko kuimbai pyhesha hareka pikuava pyrãtajy shara jyrojahe Hesu hee. Ko jyroja ñonova Hesure myngueraiteshu pee pyheshava rãĩmi. ¹⁷ Hãrã ã'ẽi shyryvyre, aikua kova pee jyve punduruvishare mbai porãmba pijapohe pikuaa kavimbape. ¹⁸ Tẽivã Tumpa kyrã japo opa iko verã Tumpa ĩñẽiẽi mbeu'iare rupii mbeu vekua; Mesia manoñõĩ verã. ¹⁹ Hãrã, opa kavi pymbeu mbai porãmba pijapo vekua hareka peijy Tumpa jykoty, hejareii pyndyhevi verã mbai porãmba, ²⁰ hareka katu Ñandeja mboupe ara vevyva, mbou Hesurã jypyiterãvãĩ Mesia rãĩmi pyhyrõã mbouhape vekua. ²¹ Tẽivã ã'ẽi Hesukristo pytateri'ẽi vate, opa mbai ñonoha kavipeve. Opa mbai heiva, Tumpa ĩñẽiẽi mbeu'ia marãrãngãtumbaa, arykaivare ikoterivape. ²² Moise rãnga hei ñanytynondeva retape: ''Ñandeja Ñanu Tumpa rãnga mupuãpokui tyvyre pãũpe pẽinte Tumpa ĩñẽiẽi mbeu'ia she rãĩmiva, pyhẽindushukui hai heiva, ²³ shara opaite ñẽiẽi hẽindumbashua hokava Tumpa ĩñẽiẽi mbeu'ia mohẽiãpokui jy'yvyivi. ²⁴ Shara Tumpa ĩñẽiẽi mbeu'ia Samuelvive õñepyrõ ijetahahe kova ara. ²⁵ Pee pevarã rãnga ko ñẽiẽi Tumpa ĩñẽiẽi mbeu'iare rupii Tumpa mẽiẽiva, hareka pee pevarãĩjy ñẽiẽi mẽi'ẽiãva Tumpa japo vekua pynytynondevare hãndi. Shara Tumpa heimbashu Abraham: ''Ndyrayre rupiipo she ahovasa opaite tenta yvy ĩãrẽi'iare''. ²⁶ Pee pevarã tynõnde Tumpa mupuãjy tay Hesukristo, hai rupii pipity verã jyhovasa hareka hejaka pyndyhevi verã mbai porãmba pijapopi vekua.