¹ Filisteos kamastojkgolh xmakgtakgalhnanin xpalakata natalachapa. Xlakan tamakxtumikgolh nak Soco, nikuma tapakgsini Judá. Xlakan tilakgtankuwikgolh xlakgstipan Soco chu Azeca, nak Efes Damim. ² Saul chu tachixkuitat xla Israel tastojkgolh chu lakgatankuwikgolh nak xa kaxtum xla Ela, lakaxtum tayakgolh nak xlakatin Filisteos xpalakata natalachapakgoy. ³ Filisteos tachokgokgolh nak xpaxtun sipi chu Israel na tachokgolh nak xakgilhpatu akgtum sipi, chu akgtum niku kaxtum xkamapapitsi. ⁴ Chatum liwakga chixku xla Filisteos taxtucha xla xwanikan Goliat xa lhakj Gat, akgtutu metro xlichalhman. ⁵ xakgnu xcasco xa bronce nak xakhxekga, chu xmakgnuy xcota xamalla. Wa xtamakgnu xtsinkan la tutumpuxam xla bronce. ⁶ Xla xkgalhi xtamakgnu xa bronce nak xkgapinin chu akgtum aktsu lilhtukun nak xpakgxtunin. ⁷ xmakgan xkiwi xlilhtukun lu lhman, na xkgalhi xtasiw nikuma xlimakan, xtasiw la xla litsapan. xakgstin xespada stsinkan akgtujun la stsinkan huierro. Chu xlakatitaya xescudo. ⁸ Xla tayacha chu ka akgtasanilh xmakgtakgalhnanin Israel: ¿Wancho taxtanupintit wixin xpalakata nalachapanatit? ¿Ni akit Filisteo chu wixin xlakskujnin Saúl? Kalaksaktit chatum chixku chu kamaxkitit talakaskin kakilakgmilh. ⁹ Par wa lhan nakintalachapay chu na kimakgniy, chuna cho kinin milakskujni nak wanaw. Chu par akit nak makgalhaja chu nakmakgniy, chuna cho wixin kilakskujnanin nawanatit. ¹⁰ Amakgtum Filisteo wampa: La uku jkataratlaway xmakgtakgalhnanin Israel. Kakimaxkitit chatum chixku naktalachapay. ¹¹ Saúl chu putum Israel kaxmatkgolh tuku Filisteo xkilhwama, xlakan xtaxlajwaninit chu lu xpekuankgonit. ¹² David xkgawasa Efrateo xlak Belén nak Judá, xwanikan Isaí. Xla xkalhi akgnajatsa xkamanan, Isaí kgolotsin xwanita nak xkilhtamaku Saúl, akglhuwata xkata nak xakgstin amakgapitsin tachixkuitat. ¹³ Kgalhtutu lhakg xalaklanka xlajkgawasan kstalanikgonit Saúl nak tapulachapan. Xtakuwinin xkgalhtutu xkamanan nikuma ankgolh nak tapulachapan wa Eliab xa pulana xkgawa, xlichatiy Abinadab, chu xlichatutu Sama. ¹⁴ David lhakg xa kgawasaku. Kgalhtutu tlhakg xalaklanka ksatalanikgo Saúl. ¹⁵ David xan chu xmin nak xlakgstipanin makgtakgalhnanin xla Saúl chu xkgalhnilo xtlhat nak Belén, xpalakata tlhan nakamawi. ¹⁶ Tipuxam kilhtamaku ama tlhiwakga chixku xtalakatsiwiy, tsisa chu kakgotanun, xpalakata xla xmin natalachapanan. ¹⁷ Chuna cho Isaí wanilh xkgawasa David: Kakalipini minatalan Akgpuxamatiy uma xaskawawa taltsi chu uma akgkaw kaxtilancho, chu sliya kakalakgpi minalatalan. ¹⁸ Nakilipi uma akgkaw queso nakamaxkilla xpulananin. kakatsi nikuntlha wilakgolh minatalan chu nakimakatsiniya nikuntlha wilakgolh. ¹⁹ Minatalan tawilakgocha Saúl chu putum tachixkuitat xla Israel nak xakaxtum Elá, talachapamakgolh Filisteos. ²⁰ David lu tsisa takilh chu skinilh chatum makgtakgalhna naxkamakgtakgalhi xkgalhnilo. Xla tiyalh taway chu alh, la Isai xlimapakgsinit. Xla chalh nak lakgtankuwanin lata lachapanin xamakgolh nak jkatalachapan chu xakgtasamakgolh xtalitachapat. ²¹ Chuna cho Israel chu Filisteos tayakgocha nak ktalikachapan, chu lalakatokakgolh. ²² David makgxtakgnilh xtaway ama tiku xmakgtakgalhnan, kgosonalh nak tapulachapan chu kaxakgalhilh xnatalan. ²³ Lata xla xkatachiwinama, wa ama xa tlhiwakga chixku, Filisteo xa Gat, xwanikan Goliat, taxtucha nak jkilhpan tapulachapan, chu chuna wampa la xkawaninita, chu David kgaxmatli ama tachiwin. ²⁴ Lata putum xtachixkuitat Israel akxilhkgolh ama chixku, tsalanikgolh chu xlakpekuankgonit. ²⁵ Lakchixkuitat Israel wankgolh: ¿Akxilhnita ama chixku nikuma taxtulh? Xla minit kataratlhaway Israel. Chu puxku namaxkiy chixku tiku namakgniy lhuwa tumin, namaxkiy stsumat natatamakgaxtokga, chu xckik xtlhat yalh kitilakgaxokgonlah. ²⁶ David wanilh chixku tiku xtawi: ¿Tuku natlhawanikan ama chixku, tiku namakgni ama Filisteo chu napanu xtalipuwan Israel? ¿Tuku uma Filisteo, pi talatlhawama xlachapanin wa xa stakna Dios? Chuna cho lakchixkuwin waniparakgolh tuku xwanikgonita chu wanikgolh: ²⁷ Chuna la uma natlawanikan ama chixku tiku namakgni. ²⁸ Eliab xa pulana xtala kaxmatlhi lata David tachiwinalh ama chixku. Chu Eliab sitsinilh David chu wanilh: ¿Wancho wix tanita uno? ¿Tiku makgxtakgni ama yalh kgalhuwa kgalhnilo nak xa kaskakni tiyat? Akit klakgapasan nikunlha wix likatsiya nak min naku: wix tanita akxila talachapan. ²⁹ David kalhtinalh: ¿Ktlhawanit tuku nitlhan? ¿Ni ka takgalhskin uma? ³⁰ Chuna cho tapanunilh chu lakgampa atanu chu nachuna tachiwinalh. Tachixkuitat nachuna wanikgolh la xwanikanita. ³¹ Lata xtachiwin David takgaxmatlhi, makgtakgalhnanin makatsinikgolh Saúl, chu xla maputsinalh David. ³² David wanilh Saúl: ni kamasta talakaskin tachixkuitat kalipuwankgolh xpalakata uma Filisteo; miskujni na án chu natalachapay. ³³ Saúl wanilh David: Wix ni kitimatayani natalachapaya ama Filisteo xpalakata wix ka aktsujku, chu xla lu tanks katsi talachapanan. ³⁴ Chu wa David kgalhtilh Saúl: miskujni xmakgtakgalha xkgalhnilo xtlhat. Lata tantum lapanit chu tantum oso xmin chu xchapay tantum kgalhnilo, ³⁵ akit xakakstalay chu xaktalachapay, chu xaklakgmaxtuy kgalhnilo nak xkilhni. Chu lata xtakiy chu xakuwaputun, xaklichapay xchixit, xajkgaxiy chu xakmakgniy. ³⁶ Miskujni makgninit tantum lapanit chu tantum oso. Wa uma nixtachukún Filisteo nachuna nakgtlhawani, xpalakata xla kataratlhawama xmakgtakgalhnanin wa xastakna Dios. ³⁷ David wa: Puchina kilakgmaxtunit nak xmakan lapanit chu nak xmakan oso. Wa nakilakgmaxtuy nak xmakan uma Filisteo. Chuna cho Saúl wanilh David: "Kapit, chu Puchina ka ta´an" ³⁸ Saúl limatlhakganilh David xlhakgat makgtakgalhna. Xla mákgnulh aklikan chu tamakgnu xa likan. ³⁹ David tamaknulh xespada nak xtamakgnu. Chu ni lay xtlhawán, xpalakata xla ni xlimakgatokganit. Chuna David wanilh Saúl: "Akit ni lay klitalachapanan uma, xpalakata akit ni kmakgatokganit." Chu cho David tapuxtulh xtamakgnu. ⁴⁰ Tiyalh xlitalatni chu laksaklhi akgkitsis chiwix nak puxkga, kamujulh nak xpuxtokgo. Chapanit xlitalatni lata xtalakatsuwima ama Filisteo. ⁴¹ Wa Filisteo talakatsuwinilh David, chu xlakatin xwi xescudo. ⁴² Lata Filisteo akxilhi xkamakni chu akxilhi David, likgalhkgamanalh, xpalakata xla ka aktsu kgawasa, akxkuyutwa chu lu slan xtasiyay. ⁴³ Wa Filisteo wanilh David: ¿lakpuwana pi akit tantum chichí, chu litana kiwi? Wa Filisteo lixkán wanilh David nak xtukuwini xtawmakgtaxtu. ⁴⁴ Filisteo wanilh David: "kilakgta, chu akit najkalimawiy tsiktsi chu lapanit min makni" ⁴⁵ David kgalhtilh Filisteo: Wix kililakgtampat min espada, chu mi lilhtukun. Chu akit klakgminiman nak xtakuwini Puchina tiku xmakgtakgalhna Israel, tiku wix talatlhawanita. ⁴⁶ Puchina nakimakamaxkiyan, chu nakmakgniyan chu nak makti min akgxekga. Akit najkalimawiy spitu chu lapanit xmaknikan Filisteos, xpalakata katiyatni nakatsiy pi wi chatum Dios nak Israel, ⁴⁷ Chu xpalakata putum tiku unu liyakgolh nakatsikgoy pi wa Puchina ni limakgatlhajanan espada chu lilhtukun. Xpalakata pulachapan wáxla Puchina chu xla nakinkamakgtayayan chu najkamakgatlajayan. ⁴⁸ Lata Filisteo takilh chu talakatsuwilh xpalakata natalachapay David; David tokgoson alh talachapay Filisteo. ⁴⁹ David tamakgajulh nak xpuxtokgo, chapalh akgtum chiwix, chu makalh, chu limutalalh Filisteo. Wa ama chixim tsankgalh nak xmuxtin Filisteo, chu lakáta tamacha. ⁵⁰ David limakgatlhájalh Filisteo akgtum litalatni chu akgtum chiwix. Xla aktalalh Filisteo chu makgnilh. Ni tu xkgalhi xespada David. ⁵¹ David kgosonalh chu laktayalh Filisteo chu tiyalh xespada, makgnilh chu makglhtinilh xakgxekga. Lata Filisteos akxilhkgolh pi wa xchixku xa tlhiwekge xninit, tsalakgolh. ⁵² Chuna cho xlakchixkuwin Israel chu xla Judá akgtasatakikgolh, chu kakstalachankgolh Filisteos nak xa kaxtum chu nak xmalakcha Ecrón. Chu xanin Filisteos xmakgocha nak xtiji Saaraim, putum nak xtiji Gat chu Ecrón. ⁵³ Israel taspitpa nak xlakgantukuwinin Filisteos chu kalhankgolh. ⁵⁴ David tiyalh xakgxekga Filisteo chu lilh nak Jerusalen, chu xtamakgnu walinilh nak xaktsu chiki. ⁵⁵ Lata Saúl akxilhi David pi xama katalachapay Filisteos, xla kgalhskilh Abner, tiku xkapulalin makgtakgalhnin: "Abner, ¿Tiku xkgawasa uma? Abner wa: Lata wix lapat, puxku, akit nijkatsi." ⁵⁶ Puxku wa: kakakgalhskinti tiku katsikgoy, tiku xkgawasa uma." ⁵⁷ Lata David taspitlhi, Abner lilh nak xlakatin Saúl chu xla xlin xakgxekga Filisteo nak xmakan. ⁵⁸ Saúl wanilh: ¿Tiku min tlhat? David kalhtinalh: "Kin tlhat wa miskujni Isaí xalak Belén."