¹ Co'o nac Pablo asto jeiasennaicama Engiapom Neten, asto njan apostol jeiapascama lhta Jesucristo cacpota atlhecmocsec actemacja mongiasqueiam apiesecsec ma'a apquellelto nac apqueliequiescama Engiapom Neten cacpota ncowac apquelianweiacmo m'a actemacja acto jawe ngiapac anquec nenganiemjaicama actacmanma, ² cacpota njan ncowac aleljalhnecama apualho'oc etlhewancoc jata mancotnenwaianlha nnelha aliennactema apnengio'oc, apenescamo lhnac nanec aplheianma Engiapom Neten ellancoc jata tep nac nanec ma'a. ³ Nietemawec newanlha nac jeiapascamo Engiapom Neten apto jenwonquescama tep cacpota alianwesquescamjoc ania'a apancoc anac. ⁴ Asmac'ac anwapasquesec waccajac anac astalhescama lheiap Tito, apto njan malha eietca aniem'o njan acnemo mo'oc mongeliasqueiam, asqueltawec Engiapom Neten apto njan engiapma'ac canjan Jesucristo apto jengeluonquescama tep ewaiwesentac jengamelaiam canjan metca acmasca tacjaplhet lheiap. ⁵ Asiamasanwacje lhta lheiap ma'a Creta cacpolhta elanecjac moclhem'a aquientalhnema m'a, aspecquencasacje lhta njan ascaicamoc lhema aspaioma nentemacja angeliequiecsec apqueliamola lhma metno apquetco'oc cacpota etnancoc apquelemjama apmaniaie moclhem'a la apcacnencjelha Jesucriso apquennemolhema m'a. ⁶ Lhema metno apquetcoc la'a ncaimelhquec etnec metca la aplhenammap, canjan lhema apac aptawa, canjan apquetcac ncotnancoc mancoliasqueiam Engiapom Neten, altacmelcasemmalhcojo cacpota njan mancotnanquec mancolleliejecjo'. ⁷ Jai, lhema metno apquetcoc la'a ncaimelhquec etnec metca la aplhenammap ncanec Engiapom Neten aptemesquescama m'a cacpota ellanama tacjaplhet'oc apquellelto nac Jesucristo apquennemolhema, metnec apcammacpojo, metca aploma, metca njan aquieijama lhma, metca apquennapommap, metca njan apielhammacpo elcancoc pataccom aptengia'ia la aquianmoma apmacmecama. ⁸ Coca ntasec etne mota apmama tacja amaica'a apancoc la'a apnemacja, elanac na caselha altacmelo, apmopuana aquietnaicama apaqtec, apeiwomo, apiamolhma apanque' cacpota njan aptacmelcasemmacpo apancoie'. ⁹ Ncaimelhquec na meiaqmoncasecjec mo'oc nema atlhecmoscama lhta aplhewai'a acto jawe ngiapac anque, etnec na apiatecjoc po'oc aquieplomo apquetlhecmoscama actacmanma, etnec na apmopuana epeccanwacjac apquellelto la apquellammelhecja m'a, ¹⁰ aplhaniec melleliejecjoc m'a nqueniemai'ac ma'a apiesecsec anac judios, wanlha mota apquelpaqmetecama actaicama nquec, aptengiaicama mota eliennenquesec enenlhet'awoc ma'a. ¹¹ Mengianco nquec lheiap etlhecmosancoc ma'a ncanec aplhaneic apqueliennenquescama acnema nac apquennemolhema, wanlha mota aptengiaicamoc pataccom ma'a. ¹² Malha actonac enenlhet'awoc anac apquelloma nac Creta, apquenmopuanca ania'a lhnac ma'a aplheianma coca apaiomo lhema apanquec secama ania'a apiesecsec anac ma'a, malha lhnac caselha neujac la acloma, mellescama lhnac na etawancoc aptecamoc, manconmajai'a lhnac na enmacmama m'a, lhna aptemac secama ania'a apquetlheianmo m'a. ¹³ Jawe ngiapac anquec ma'a actemacja aplheianma m'a, ca ncanec ntasec eliennajoc lheiap aplhamacjo apquellelto la apqueluanenwaiam ma'a cacpota eltacmelcasecjoc aptaicamoc meliasqueiam ma'a, ¹⁴ mellanco nquec na ellailhoc ania'a nema altennaicama acmowana ania'a la'a coca aniem'o m'a apquelentepquescama apancawec alietnaicama apaqto'oc. Eliennacjo ta njan cacpota mellailhec jenganemacja aniem'o enenlhet apanque' apquellelto nac apqueliamasanweiam jengetlhecmoscama acto nac jawe ngiapac anquec. ¹⁵ Apquellelto la alalhnai'o apualho'oc nqueluetalhquec na lhamacjo caselha alalhnai'o apquellanai'a m'a, coca apquellelto la alpaiseiam apualho'oc manconmac'ac enmancoc tacja mongiasqueiam anac, nqueluetalhquec na lhamacjo caselha alpaiseiam ma'a ncanec nquelpaisacmec alietnaicama apaqto'oc canjan alianwecjo apualho'oc, ¹⁶ apquetlhenque panquec apquelianweiacmo aptemacja Engiapom Neten coca apquellanenque mota caselha apcammelhmacja antec Engiapom neten ma'a, neten anquec meliamolhma m'a canjan melleliejecjoc, manconmajai'a nja mota ellanancoc caselha altacmelo.