¹ Etlhecmos jata mota lheiap actemacja na mota aclheianma jengetlhecmoscama acto nac jawe ngiapac anque'. ² Ncaimelhquec na metno apquetco'oc anac ellapuanac ennawacsec apualho'oc apanquec la'a, etnancoc na apquellai'acja la enenlhet, ncaimelhquec na ncotlhenec apualho'oc amanie apquenmac'acja la ellanancoc caselhaja, etnancoc na meliasqueiam acto nac jengetlhecmoscama acpeiwomo, ellamelemmac na aplhamacjo enenlhet'awoc, etnancoc na apqueliennactema apqueluascapma necsa acuai'a la aquientalhnema. ³ Canjan ncotnotco'oc anac ntasec ncoltacmelcasalhcojo', metca alpaiesaicama ania'a acuesai'a mo'oc la'a, metca njan alieiescama lhma anmen. Ntasec coca ncotlhecmosancoc aplhamacjo cacpota ncollanancoc caselha altacmelo, ⁴ ncotlhecmosancoc na nqueluanat'co'oc anac colhua actengiaicamoc anacteianca'a cacpota ncollawanac ncollamelemmac anacteianca'a, atcac najan. ⁵ Ncollawanac na ncotlhenec au'alho'oc amanie anmajai'a la ncollanancoc caselha m'a, cacpota njan mancotlhenec au'alho'oc ncollanca', canjan ncotnancoc aliamo ncoltacmelquesec acjaiancolha la'a, aliamolhma, alleliejecjo njan anacteianca'a la'a cacpota m'a mancolhec aquiematquesanca ania'a actacmanma aniem'o Engiapom Neten. ⁶ Elleltennasamoc jata njan apquetco'oc anac ncotlhenec apualho'oc amanie apquenmac'acja la ellanancoc lhamacjo caselhaja, ⁷ eluetasques na aptemacja apanque nac lheiap cacpota eluanancoc ma'a, eiplauques jata njan actemacja nac apquetlhecmoscama apancoc, etacmelcasacpo panquec najan cacpota meliascamec enenlhet lheiap, ⁸ eliatama ta njan actacmanma apaioma, metca la nenlheianweiam emmo'oc cacpota enmancanwomoc ma'a apquellelto la apquenmajai'a elammelhec apquetlhecmoscama, mancolhenalhquec jata acuesai'a ncolatsecama jengetlhecmoscama enganco'oc anac. ⁹ Elleltennasamoc jata njan apquellelto nac esclavos ellanac elleliejecjoc apuesque apanco'oc, ellana ta njan etnancoc ellanjoc nalhep'awec apualho'oc ma'a, jawe njan ellatemmonjo'. ¹⁰ Elleltennasamoc jata njan menmenielhe, etnancoc na nengaqtawe mota apqueluescai'e apanco'oc cacpota eluetac actacmanma nema atlhecmoscama apquetlhewai'a aniem'o Engiapom Neten apto njan jengeluonquescama tep ma'a. ¹¹ Jengeluetasquescanque lhta Engiapom Neten apto apiamolhma apanquec jengellaianco nengeluoncasemmalhca tep anac nenlhamacjo lhmanquec jam, ¹² ca nqueniemai'ac ntasec angeluatesancoc nentaicamoc mongeliamolhma, canjan alletsepmacja ennengio'oc anac, colhua coca ntasec angelloca atlhenaicama mota engellualho'oc actacmanma caselha nac, angellanancoc na acpeiwomo, angellamelemmac na emmo'oc, ¹³ anlhenquesec ma'a acuacmo ta acnem acuai'a alpaijenwaiam enwalho'oc aquiawai'a, anwetanwomoc jata ma'a aleljalhneianca mota engellualho'oc, ncote ta actacmanma nque acuetammalhca malha apquelienmaiam apuactamo ta acnema apmopuana apanquec Engiapom Neten canjan Jesucristo apto jengeluonquescama tep, ¹⁴ apcaiancawe lhta njan apmatnamo m'a cacpota jengeluonquesec tep ennenco'o necsa jengenmaicama mangeliamolhma, jengellalhnesquescamo njan engellualho'oc ma'a, jengeltemesquescamo njan apquennemolhema apanque', antengianco angellanancoc actacmanma. ¹⁵ Jai', ca jenque'e ntase mota etlhecmocsec lheiap. Eliatecjoc, ennawes najan aquieplomo apientalhnemo, mengianco njan lheiap ncolhec actemesquesantamo coneng.