Capítulo 2
Nema apqueliamo aptaicamoc amaica'a Jesus apquetcoc
1
Apteiaiacmec nac Jesus ma'a temma apquetcoc Belen aquieto iocjalhma Judea, necsa aptema lhnac na apiau'acja apuesque Herodes ma'a. Ca apqueluai'o lhnac Jerusalen enenlhet nema apqueliamo apquelleniem'o acteiapmacja acnem,
2
ca apquellelmalhneianca lhnac enenlhet'awoc ma'a,
lhna aptaiancoc:
— ¿Co la aquietelha apteianlha nematca apiau'acja apuesque apanco'oc judios, je? Nelluet'ac lhec ennenco'o iau'a aplhenquec ma'a apteiam apjalhnancoc apiau'acja apuesque, ca ncanec angellua'ac jenque'e cacpota angelteclhencoc entapno'oc napaqtec—lhna aptaiancoc ma'a.
3
Ntaicama lhnac apualhoc apiau'acja apuesque Herodes cacpota njan enenlhet'awoc co Jerusalen ma'a apquellengai'o lhnac ania'a,
4
ca apcanquesecjo lhnac ma'a apquellemjama apmaniaie sacerdotes cacpota njan jengetlhecmoscama jenganemacja Moises, ca apquellelmalhneianca lhnac ma'a, lhna aptemac:
—¿Co la lhna lhta etiemoc Cristo?—lhna aptemac.
5
Ca apquellatemmoianca lhnac ma'a, lhna aptaiancoc:
—Belen aquieto Judea. Ca actemacja lhnac nanec aplheianma secama ania'a annenga:
6
«Lheiap na temma Belen, ncomascoc jata aptema temma apquetcoc apiesecsec apqueliau'acja temma aquieto Juda, ncanec etiemoc jata m'a apuesque cacpota eltacmelquesec asnemolhema Israel » lhnac nanec aptemac secama ania'a nnenga.
7
Netamen Herodes ma'a apielhammacpec nac apquellaweianca nema apqueliamo apmajai'a eijo' se lha acnem apqueluetai'o apteiapuei'o neten iau'a.
8
Lhna aptemac apquellanemo Herodes:
—Enmeiacja ta Belen, eltengiamoc ania'a nematca lhnac lhec, jata apqueluetacjo ta, jeleltennasqueta ta njan co'o cacpota amjancoc ma'a alteclhecuomoc etapno'oc napaqtec ma'a— lhna aptemac apquellanemo.
9
10
Ca apquetlhengamo lhnac ma'a, apquelieplomo lhnac iau'a lhta, apmaniaie lhnac aplhengama acuacjo apietnacmo tacjaplhet temma apietnacja nematca, awanjec nac na alpaijecjac apualho'oc ma'a apqueluetecjo mocjom iau'a m'a
11
Ca apquelentalhnenwaiacmo lhnac conne pa'at ma'a, apqueluetanweiacmo lhnac nematca cacpota njan nquen acuesai'a Maria, apquelelteclheianco lhnac na aptapno'oc lhepop ma'a, apqueltacnescaseianco njan apuesai'a ma', apquenmaiesaianco lhnac na iamet aisecsec apanco'oc, apquellaianco caselha metca aquianmoma oro, panactema awa' acmases aimes cacpota njan aimenec acmases aimes.
12
Ca apnaqteianweiacmo lhna na m'a, aluanmescamo lhnac Engiapom Neten aplheianma meltacjec neptamna'ac aquieto apnacja Herodes. Ca apqueltaqjemo lhnac ma'a apquellawacja apanque.
13
Apteianmec nac na Jose m'a, ca apuanmescamo lhnac na lhema Enenlhet Neten, lhna aptemac apcanemo:
—Elhatacja, engiengiasques jata nematca nac ca nja nquen aquieto iocjalhma Egipto, elha ta m'a acuacmo asqueltennascactamo ta mocjom ania'a, Herodes apmac'ac engiaqjec nematca nac— lhna antemac acuanmescama.
14
Pelhasep nac nquengiaiancoc ma'a iocjalhma Egipto,
15
ncacjenweiacmec nac ma'a acuaiacmo apquetsepo Herodes. Nwaiac nac acnem actemacja lhnac nanec aplheianma secama ania'a apmaicama Engiapom Neten, lhna aptemac:
«Ascawema lhta eietca apno nac ma'a Egipto» lhna aptemac.
Apquelienlhaneiam Herodes engiaqjec Jesus
16
Apianwecjawec nac apuesque Herodes apqueliennenquescama apqueliolhma'ac, man na nquescamac acnatjescamo m'a, nietnaicama lhnac na apaqtec apquelietsatemo iantelhcapa actemacja lhta apqueluetaiacjasecja apqueliolhma'ac iau'a, ca apqueltemo lhnac ncolhec annapacjo nematca'ac acuacmo 2 iantelhcapa aquieto na temma Belen cacpota njan nepiawa na temma.
17
Nwaiacmec nac acnem aplheianmo lhnac na nec secama ania'a nnenga Jeremias aplheianmo ncotnec jata m'a:
18
«Nlengammalhquec nac nema aleclhanwecama aquiawai'a nquec aquieto Rama, Raquel nac ma'a acuenemo aniem'o aptequioma atcac, man na ncoltemoc ncolhec acpaiesacjo au'alhoc»
lhna aptemac ma'a.
Anmeiecja Nazaret ncana'ac Jesus
19
Apnenquec nac mocjom Jose m'a iocjalhma Egipto, apquetsepmec nac ma'a apiau'acja apuesque Herodes. Necsa apteianma lhnac Jose m'a, acuanmescamo lhema Enenlhet Neten apcapascama Apuesque,
20
lhna aptemac:
—Elhatacja, eiantemecja nematca nac cacpota njan nquen aquieto Israel, apquenmasquenwacme apquenmajai'a lhta ennapoc nematca nac — lhna aptemac.
21
Ca apquelanecjo lhnac aptacja Jose m'a, apiantemecjo njan nematca cacpota njan nquen aquieto Israel
22
coca apquenmenai'ac nac Jose engiacjac aquieto iocjalhma Judea, ncanec apquetca neptamen Herodes apuesai'a Arquelao lhnac aptaiecjac apiau'acja apuesque m'a. Coca acuanmescama lhnac Jose nema altennascama engiacjac iocjalhma Galilea,
23
ca acjenwecjo lhnac ma'a na temma Nazaret. Nwaiacmec nac acnem apquetlheianmo lhnac na nec apquetsecama ania'a ncolhec jata altanco Jesus co Nazaret.