Capítulo 1
1
Co'o Pablo asto apostol jeiapascama Cristo Jesús apto njan nengeljalhnecama ngiapom. Jellaspascama coca m'a Engiapom Neten apto jengelluonquescamo tep canjan Cristo Jesús cacpota apaiacsec ania'a actacmanma.
2
Nlhenquec co ewalhoc Timoteo apto astemo lhemec moiasqueiam anac, apto njan malha eietca. Asqueltawec na Engiapom apto engiapma'ac canjan Cristo Jesús apuesque engancoc eluaiwesenta nengamelaiam, nenmapiose canjan metca acmasca tacjaplhet lheiap.
3
Asqueltawec mocjom altacjenwescacjac astacja lhta ascano lheiap ma'a aquieto jam Efeso necsa asmajai'a angiacja lhta m'a Macedonia, lheiap jatoca ntasec elhec cacpota ennawacsec mancolietemo nac apquetlhecmosecamoc, lhta stajac.
4
Ennawes jata njan cacpota manconmancaqsec acnem aclhengama apquetlheianwecjo na mota lhennenga ania'a, eltaqnewa ta njan cacpota meluenactese mota apquetlhenaicama apquelieijenca'a, coca m'a caselha nac ntepcasque mota apqueliamenammap
jam, mancotepquescamac meliasqueiam canjan apquelianweiacmo aptemacja Engiapom Neten.
5
Asqueltawec na co'o ennawacsec enenlhet'awoc lheiap jam cacpota eliaqmoncasecjac mo'oc aptaiancolha, ncowac na apquellamelaiam po'oc aniem'o alalhnai'o apualho'oc, altacmanma atlhenaicama apualho'oc canjan meliasqueiam iocjalhme.
6
Coca moclhem'a lhta apqueluatesaiancoc ma'a apquelieplauquescama caselha altacmelo lhcaiec, nquenmancascanque lhta acnem aclhengama aniem'o apqueliamenammap ncotno caselha altacmanma apquetlheianma,
7
apquetlhenammacpec apancawec jengetlhecmoscama jenganemacja nac Moisés, coca melianweiacmoc actemacja apquetlheianma, apquetlhecmosecamoc najan.
8
Nengelliawec ennenco'o jenganemacja nac acto actacmanma nento la njan aquietemo nquec nenmaicama,
9
jawe acuai'a ncolliawac nconnawescac apquelpeiwomo nac, coca ma'a melleliejecjo nac, apqueliecai'a nac jenganemacja, meliamolhma nac canjan apquellanecamo nac caselha ncollatsecama, apquellelto nac mellai'o Engiapom Neten cacpota njan jengetlhecmoscama actemacja apuesai'a, apquellelto nac apquennapma' apiapma'ac, ncana'ac, apquellelto njan ntequioma ngiapma'ac.
10
Apquellelto njan apquenmensanweiam alhma, canjan apquenmensawecja aptemo lheme', canjan apquelhaicamoc nema aquianmoma esclavos, canjan apqueltemesquescama iocjalhmec anquec apquetlheianma ncotnec jata coca apquenmopuanca ania'a. Jai, ca acuai'o lhta jenganemacja cacpota nconnawacsec ma'a apquellelto apquellanecamoc caselha ncollatsecama nac, anmelhmacja njan ma'a acto jengetlhecmoscama actacmanma nque nac,
11
actacmanma nque nac ania'a apqueltemo nac na Engiapom Neten apaiacsec co'o, apto njan aquietemo antacnescasanco mota apuesai'a m'a.
12
Gracias co'o astemac Cristo Jesús apuesque engancoc aclheianmo apualhoc anwapuanac jata co'o altennama ania'a actacmanma, jeiaianco njan asiennactema m'a.
13
Niecje lhennenga astacnonconque lhta apuesai'a m'a, asmenlhenaianca lhta, asqueltacnoncomo lhta njan apquellelto apquellasennaicama apancoc ma'a. Coca apiose lhta jelanei'o Engiapom Neten ncanec ma lhta ncoietnemac moiasqueiam Jesús ma'a, ma lhta njan aijamoc ncoietemo astemacja m'a.
14
Jai, awanje lhta jeiamelaiam apuesque engancoc, jeiaianco lhta njan moiasqueiam, jengamelaiam aniem'o m'a Cristo Jesús.
15
Colhua smac'ac alhenec jawe ngiapac anquec apuai'o lhta Cristo Jesús nalhepop anac cacpota eluonquesec tep enenlhet'awoc meliamolhma la'a, co'o lhta njan ma'a asto neten ejenquec moijamolhma, molhnoc aplhamacjo enenlhet'awoc.
16
Coca apietnai'awe lhta neja'at Engiapom Neten, apcapascamo lhta Jesucristo cacpota eluetasquesec enenlhet'awoc apiamolhma apancoie jelanei'o, metca jepecjescama cacpota eiaqmoncasecjac astemacja. Jata nja ncotnec apquellanei'o aplhamacjo enenlhet'awoc apquellelto la meliasqueiam cacpota etlhewancoc aliennactema apnengio'oc ma'a mancotnenwaiam annelha.
17
¡Ntasec angeltacnescasancoc, angellajo mota Engiapom Neten apto apuesque mancotnenwaiam annelha monmopuana njan anweta', wanlha njan lhema apjapac Engiapom Neten! Amen.
18
Timoteo, malha eietca lheiap, ca ascaicamoc lhec aspaioma cacpota elanac lheiap ma'a actemacja apquetlheianmo lhta secjec anquec ncotnec jata apquetsecama ania'a, cacpota ellammelhec lheiap ma'a apquellelto nac apquellammelhmacja mongiasqueiam.
19
19 Meluatescama nquec meiasqueiam, etacmelques jata njan aquietnaicama apaqtec alhnai'o njan, meluanamo nquec aptaiancolha nac ma'a enenlhet'awoc meltacmelquescama nac alietnaicama apaqto'oc, netamen masquenwacmec na meliasqueiam ma'a.
20
20 Ca actonac ma'a apiesecsec anac Himeneo cacpota njan Alejandro, ascanconwacme lhta m'a satanas cacpota melanmelhec mocjom Engiapom Neten apuesai'a.