Capítulo 2
Actacmanma nengenmalhnesquescama aplhamacjo enenlhet'awoc
1
Asqueleltennasquec co'o lhema aspaioma elelmalhna ta Engaipom Neten cacpota eltacmelquesquesec apquellaniemjaicama aplhamacjo enenlhet'awoc, aquieplomo apquellasnecama canjan etnanco mota gracias Engiapom Neten.
2
Elelmalhnesques jata njan eltacmelquesquesec apquellaniemjaicama gobernadores canjan apqueluescai'e cacpota jengeltacmelquesquesec na nengellaniemjaicama m'a, angelloca metca acmasca canjan metca actaicama enwalhoc, angelleliejecjo mota njan Engiapom Neten, angeltacmelcasalhcoc na aquietemo ncoie nentaiancolha.
3
Coca caselha nac altacmelo m'a, acleclemelha njan apualhoc Engiapom Neten apto jengeluonquescamo tep,
4
apqueltemo njan angeluoncasalhcac tep nenlhamacjo, angelianwomjoc na acto jawe ngiapac anque'.
5
Wanlha lhema apjapac Engiapom Neten, wanlha njan lhema apjapac jengeliepetcasquecja Engiapom Neten, apuesai'a m'a Jesucristo aptaiecjo lhta njan enenlhet apanquec ma'a,
6
apcaiancawe lhta njan apmatnamo cacpota jengeljatsoscacjac necsa jengenmaicamoc maniamolhma nenlhamacjo. Ca ania'a nac acuetammalhco m'a, apquelientemonquesquescamo lhta njan aplheianma Engiapom Neten ncotnec jata actacmanma acnem aclheianmacja njan apualhoc ma'a etnejec.
7
Co'o lhta njan nemo jetnesquescamo asecama ania'a canjan apostol cacpota atlhecmocsec actemacja mongiasqueiam acto jawe ngiapac anquec apiesecsec anac metnanco nac judíos. Jawe
ngiapac anquec astacja nac alheianma, jawe asmopuana ania'a.
8
Ca ncanec co'o asqueltawec elelmalhnancoc Engiapom Neten aplhamacjo apquelennawa'ac aquietnacja la apcaqnecjelha, aquieplomo apqueliasecja neten apmeio'oc
, aquieplomo njan alalhnai'o apualho'oc, metca njan apquelloma cacpota njan metca apqueliamenammap po'oc. Costumbre judía para orar
9
Asqueltawec na nqueluana'ac ncolentalhnecja alentalhnema metca anmancascama la apquellelto la apqueluetai'a, nconnatnecja njan annatanma jawe aliecasqueiacmo, ntasec na mancoliecascamjec alalhnascama awa', metca njan aliecasqueiacmo caselha alienmomo oro cacpota njan metaimong actec altacmanma acmennawe nque nac, metca njan aliecasqueiacmo alentalhnema apmennawe nac.
10
Ntasec coca ncolienlhanmancoc ncollanancoc caselha altacmelo ca nqueleltammalhcac ncotnancoc nqueluana'ac la allai'o Engiapom Neten.
11
Ntasec na ncoluanmancoc necsa allailhemo la nema atlhecmosecamoc la'a, nconmancoc na tacja.
12
Moltoc na nqueluana'ac ncotlhecmosancoc napaqtawec la enenlhet'awoc, moltoc na ncoientalhnema apiesecsec apquelennawa'ac la'a, ntasec coca ncoluanmac necsa allailheianco m'a,
13
ncanec Engiapom Neten apquelanai'a apmanie Adan, netamen acuacjo njan alhaiec Eva,
14
jawe lhta njan apmanie Adan nema aquiennenquescama, wanlha lhta nqueluana nemo aquiennenquescamo m'a, netamen aquiecai'o lhta apaioma Engiapom Neten ma'a.
15
Coca nqueluana ncowoncasalhcac jata tep acuet'o la atca, aclhencaso la njan actema ncoi'asqueiam, amelaiacmo la njan mo'oc, alhnai'o la njan au'alhoc, alan'o la mota njan actemacja acpeiwomo.