¹ Jai', awanjec nengelleltemo antancoc mocjom amaica'a jam coca nne lhta jengeliasenco lhma m'a, lhta nqueniem'ac nelpaqmetquesalhco nengaqjenwacjo aquieto Atenas. ² Ca nellapaso lhta lhema engialheng Timoteo jam, apmacmecama lheme' Engiapom Neten apaiescama ania'a actacmanma aplhenammap Cristo, nellapasque lhta jam cacpota eliatecjo, elpasmoc najan ncoliennac meliasquiam quetlhencap ³ necsa acuai'a aquientalhenma cacpota mancoltemesquesantaniec na coneng quetlhencap jam. Apqueliawec na aquientalhnema nac mancawanquec jengieca'. ⁴ Necsa nengacjenweiam alhta apiesecsec anac quetlhencap jam nelpenesawe lhta nelleltennascama ncowac jata aquientalhnema, ntemenquec na lhta m'a apqueluetai'a quetlhencap. ⁵ Nlhenaicama ewalhoc nquetlhencasque lhta mancolianmolhquec asleng'o ania'a apquellengaianco aquientalhnema quetlhencap jam, ca nqueniemai'ac ascapascamo lhta Timoteo cacpota jesantenquesec ania'a asmajai'a aijoc ania'a actemacja meliasqueiam quetlhencap jam. Awanje lhta co ascai'a jengeljanmo nac ncolpalesenma quetlhencap jam, lhta acto la m'a, acjemo lhta ncotnec nengetlhecmosecamoc quetlhengcap jam. ⁶ Apuactame lhta Timoteo jenque'e apquengiactamo jam Tesalónica, apsantanie lhta ania'a actacmanma, awanjec na lhta aquietnema meliasqueiam quetlhencap, nengamelaiam, awanjec nac na apquenmajai'a jengeluetecjac quetlhencap ennenco'o, ennenco'o njan ntac ma'a awanec nenmajai'a angeluetecjac quetlhencap. ⁷ Quetlhencap elialheng'a, awanje lhta apquelpaiesecja engellualho'oc nelleng'o aquiennactema meliasqueiam, niecje lhta aquietnema mota aquientalhnema neluetai'a ennenco'o, ⁸ coca jengeliennactesacjawe lhta nelleng'o ania'a aquiennactema mocjom meliasqueiam Apuesque quetlhencap. ⁹ ¡Nquetlhencasquec mamma nelpacmeiasma antancoc gracias Engiapom Neten aniem'o jengeliecanweiacmo apquelpaiesecja engellualho'oc quetlhencap! ¹⁰ Nengelmalhnecama negasnecama njan Engiapom Neten lhamacjo acnem cacpota angeluetecjac mocjom, ampasmoc etsaujonwomjo' meliasqueiam alaimommalhcac quetlhencap. ¹¹ Jai, nengeltawec Engiapom Neten cacpota njan Apuesque engancoc Jesús jengellancoc lhema acnem antancoc amaica'a jam. ¹² Nengeltawec na Apuesque engancoc eluanenquesquesec meliasqueiam lhamacjo acnem quetlhencap, eiawencasancoc na apquellamelammap apiesecsec anac jam, cacpota njan ellamelemmac po'oc enenlhet, ca nentaiancolha nac na ennenco'o nellamelaiacmo nac quetlhencap. ¹³ Nengeltawec na eliennactesquesec meliasqueiam, ellalhnasquesec na apualho'oc cacpota mancolhec atlheno apqueluesai'a quetlhencap napaqtec Engiapom Neten apalhacuactamo ta apuesque engancoc Jesús aptanco nac apquennemolhema apanque'. Amen.