Capítulo 2
Aclheianwecjo apualhoc Pablo aptemo amaica'a m'a Tesalónica
1
2
Elialheng'a, apquellengai'ac na lhta quetlhencap ania'a neltacnommalhco cacpota njan nemo jennactewascamo m'a natemma Filipos, coca jengellaianque lhta Engiapom Neten nenmacmosac'a cacpota angelpaiacsec ania'a actacmanma apiesecsec anac quetlhencap jam, niecje lhta apentalhnema jengellammelhma jam, ncacjoc coca nellaneianquec actacmanma nenmacmecama, apqueluetai'a lhta quetlhencap jam.
3
Netlhecmoseianque lhta mota njan acto jawengiapac anquec, ma lhta njan ncolhnaiancoc engellualho'oc malha alposcama la caselha cacpota njan manconmajai'ac angeliennenquesec.
4
Engiapom Neten coca jengelleltemesquescama cacpota ampaiacsec ania'a actacmanma jam apiesecsec anac, montengiaianco' ennenco'o ncoleccasama apualho'oc enenlhet'awoc nentaianquelha, wanlha coca nentengiaiancoc ma'a ncoleccasama apualhoc Engiapom Neten apto apiamo enwalho'oc.
5
Apqueluetai'a lhta nentaianquelha metca nellannenwaiam actacmanma nelpaqmeiasma angellanjoc quetlhencap, ma lhta njan antengiaiancoc pataccom apanco'oc la quetlhencap, apiawec coca Engiapom Neten acto jawe ngiapac anquec astacja nac alheianma.
6
Ma lhta njan antengiaiancoc jengeltemesquesec quetlhencap canjan po'oc enenlhet la'a neten engancawec ennenco'o.
7
Enwanca'a nlho lhta niecje angeliatancoc jengelleliejecjoc ennenco'o quetlhencap, ncanec nengellelto apostoles jengellapascama Cristo, coca ma lhta ntaiancoc ma'a, malha alhta nentaiancoc actaiancolhna nac nematcac. Neltacmelquescanque lhta mota malha actona nquen altacmelquescama nac atcac.
8
Awanjec anque lhta nellamelaiam
quetlhencap, nellanconwaiacmo ania'a actacmanma, niecje lhta atlhenquescama angelletsepoc aniem'o jengellasennaicama quetlhencap.¡Ca m'a awanjec anque lhta acnaicamoc nengellamelaiam quetlhencap ma'a!
9
Nquetlheianwacjawec quelha apualho'oc quetlhencap aquiawai'a nenmacmecama acuaiacmo lhta neliampei'o lhamacjo acnem apiesecsec anac quetlhencap jam, necja emmeio'oc alhtoca nelpaiescama ania'a aplhenammap Engiapom Neten, necja emmeioc alhtoca njan aquiawai'a nenmacmecama cacpota mancolientelhec apualho'oc quetlhencap jengellanco nlho lhamacjo caselha alaimelhquelha la'a ennenco'o.
10
Apqueluetai'a lhta quetlhencap canjan Engiapom Neten actacmanma acpeiwomo nentaiancolha apiesecsec quetlhencap meliasqueiam anac, nellanenque lhta njan caselha acpeiwomo, mancollapuanque lhta njan jengetlhenec enenlhet.
11
Apqueluetai'a lhta njan neliatecjo quetlhencap canjan nelpaiescaiacmo apualho'oc moclhem'a quetlhencap malha apto nac lhema apiapom nematca aptacmelquescaiam la apualhoc apquetca, nengelleltennaso lhta njan etnancoc aptaiancolha acpeiwomo ncanec apquellelto Engiapom Neten apquetcac quetlhencap, apto lhta njan apquellawecama cacpota elpasenwomoc actemacja la awesque apmopuana m 'a.
12
nelienlhanmeiangquec eltejec apqueliamolhma' ca apqueltamacpelha eltejec Engiapom Neten apquetcac ma'a, ncanec apquelelto njan apanco'oc reino gloria.
13
Jai, nengelleltanque mota ennenco'o gracias Engiapom Neten aniem'o apquellengai'a, apquenmaicamoc na tacja ania'a aplhenammap Engiapom Neten netsauquescama lhta jam. Apquelianweiacme lhta ania'a actacmanma jawe aniemai'o enenlhet apanque, coca aniemai'o m'a Engiapom Neten. Jai, jawe ngiapac anquec ma'a aniemai'o Engiapom Neten ania'a actacmanma nac, alentepquesquescamo lhta njan aquiawai'a caselha altacmelo apquellelto lhta meliasqueiam.
14
Apaiomolhema apancawe lhta njan apquenmenlhenaicama quetlhencap ma'a, lhta njan ntemac ma'a apquellelto meliasquieam Engiapom Neten aquieto m'a Judea aniem'o meliasqueiam Cristo, apaiomo lhema apancawe lhta judíos apquenmenlhenaicama m'a.
15
Ca judios alhta m'a apquennapmo lhta njan apuesque Jesús ma'a, apmanie Jesús apquennapeianco lhta njan apquelletsecama ania'a nnenga, ennenco'o lhta njan jengellentepquescamo apquellawacja apanque apiau'acja temma. Ma lhta njan ncolleclemoc apualhoc Engiapom neten, wanlha lhta njan aptengiaicamoc apquellammelhma.
16
Ma lhta njan jengellaiancojo angelpaiacsec ania'a actacmanma nenwoncasemmalhca tep apiesecsec metnanco judíos, coca m'a niaweianque lhta njan meliamolhma m'a, coca ncowac jata njan aquiawai'a nema aliaqmoncasquesecja apqueltemacja ncollatsecama ma'a.
Apmajai'a etnec amaica'a mocjom Pablo aquieto Tesalónica
17
Quetlhencap elialheng'a, neluactanie lhta ennenco'o nentanco lhta amaica'a quetlhencap jam, jengeliepuamenque ennenco'o, awanjec nenmajai'a angeluetecjac mocjom quetlhencap.
18
Nenmac'a lhta niecje angelelhiemoc apiesecsec anac quetlhencap jam, co'o Pablo nlhanie ntemac asquelienlhaneiam asmajai'a niecje anwelhiemoc jam, coca satanas mangcoltemojo.
19
Awanjec nenmajai'a angeluetecjac mocjom quetlhencap ncanec apquelpaiesecja mota engellualhoc, jengellaianco njan aleljalhnecama engellualho'oc enwanca'ac jata njan ncolalhcoc engellualho'oc napaqtec apuesque Jesús apuactamo ta jenque'e.
20
Jai', quetlhencap jengeltemesquescama alammalhco engellualho'oc, apquelpaiesacjec na engellualho'oc.