¹ Co'o Pedro asto apostol jeiapascama Jesucristo, nlhenquec ewalhoc apquellelto apquellenteiapma apquellawacja apanque, apquelhpanmo njan apquenmaianco apqueliau'acja temma Ponto, Galacia, Capadocia, Asia canjan Bitinia. ² Engiapom Neten alhta apqueliequisaicamoc ma'a cacpota etnancoc apquennemolhema apancawec ma'a, Espiritu lhta apquelpoccanma m'a cacpota elleliejecjoc ma'a, ncolalhnacsec na ema apancoc Jesucristo. Asqueltawec na co'o Engiapom Neten ewaiwesentac tacjaplhet'oc quetlhencap aquiawai'a nquec jengamelaiam cacpota njan metca acmasca apquellaniemjaicama. ³ Angeltacnescasancoc jata Engiapom Neten apto apiapom apuesque engancoc Jesucristo ncanec apietnai'awec nengaqta'a ennenco'o m'a, jengeltemesquesecjo njan malha la nempalleiam alhnancoc aniem'o njan aplhatecjanweiam Jesucristo. Colhua njan nnaiancoc ennenco'o aquiawai'a nquec alelhjalnecama engellualhoc ⁴ angetlhewancoc jata caselhaja aplheianmo lhta Engiapom Neten jengellancoc, apqueltacmelquescamo m'a caselha nac aquieto neten, mamma acnactewasemmalhca, mamma alpaiseianlha la njan, mancomasquenwomec na m'a. ⁵ Meliasqueiacmoc quetlhencap Engiapom Neten ca nqueniemai'ac apqueltacmelquescamo m'a aquieplomo apmopuana cacpota etlhewancoc jata lhema caselha apenescamo aquietnaicama apaqtec ellancoc jata acuacmo ta actacja nnelha acnem, acuesai'a nac ma'a nenwoncasemmalhca tep. ⁶ Awanjec alpaiesecja apualho'oc quetlhencap ania'a nac, niecje apqueluetai'a mocjom nquescama aliepconma, coca iacuatacjo nquec ma'a. ⁷ Coca aliepconma nac acmajai'a ncotalhca acnanco nlho aliennactema meliasqueiam, nlhco ca la ncoliennactema meliasqueiam. Malha talha nac acmajai'a ncoiecpelcoc oro nque nlho ca la njan jawe oro nque. Jai, apqueluascapo la quetlhencap necsa acuai'a aliepconma, coca nnanquec quetlhencap meliasqueiam acto neten anquec acmennawe ncoie' mancolhnoc ma'a oro nac acmowana ncomasquenwomoc. Jata apuactamo ta Jesucristo etlhenec jata apqueliepjonweiacmo quetlhencap, eltemesquesec jata neten apancawec, ellajoc jata njan ma'a. ⁸ Meluetai'o quetlhencap Jesucristo, apquellamelaiacmec coca quetlhencap ma'a, mang nac eliasqueiacmoc najan, awanjec anquec na alpaijecja apualho'oc ⁹ ncanec apquelliawec ncolhec jata aluoncaso tep. ¹⁰ Apquetsecama ania'a nneng'a apquelleliaicama lhnac nanec apquenmajai'a eliojoc aclhenammalhca apmaniaie m'a, netamen apquelleltennaseianque lhnac nanec enenlhet'awoc ma'a ncowac jata caselha metca aquianmoma nema acpenescamo, ca apquetlhewaianco nac quetlhencap nenwanlha nac ma'a acuesai'a nac nenwoncasemmalhca tep. ¹¹ Cristo apualhoc apanquec nac alientemonquescamo lhnac nanec aleltemesquescama eliojo apquetsecama ania'a nneng'a actemacja aplengaianco ta aquientalhnema Cristo, netamen etnec jata njan neten apanquec apiesecsec enenlhet'awoc ma'a. Apquelienlhanmeiancawe lhnac nanec apquetsecama ania'a nneng'a apquenmajai'a eliojoc acnem ncowac jata, canjan actemacja caselha acuetammalhca ta m'a. Coca Apualhoc anac ¹² nqueluetasquescanquec nac nanec ma'a mang coca eluetaiancoc ma'a, ennenco'o coca nenwanlha nac neluetaie ania'a actacmanma nenwaiam tep anac. Jai, apquellengai'o nac quetlhencap ania'a nac apqueleltennaicama acnema apquenmopuanca'a aniem'o Espiritu Santo nema apascama aniem'o neten. ¡Ca nenwanlha nac acto actacmanma ncoie caselha apqueluetaianco nac quetlhencap, acuacjo niecje njan enenlhet neten apquenmajai'a elpalhacuac ma'a! ¹³ Ca nqueniemai'ac na ntasec ncolquetamancoc apualho'oc actacmelo cacpota ellanancoc caselha acpeiwomo, mellanquec na nconmama aliasponcomacja nac apualho'oc, elleljalhnama njan apuectanlha ta Jesucristo ellancoc jata m'a quetlhencap caselha altacmelo metca aquianmoma. ¹⁴ Engiapom Neten apquetcac quetlhencap, ca ncanec ntasec elleliejecjo mota ma'a, melieplauquesec mocjom aliasponcomacja lhta apualho'oc aptaiancolha lhta mota njan lhennenga meliamelha lhta Engiapom Neten. ¹⁵ Apquellawecama lhta Engiapom Neten quetlhencap cacpota etnancoc apqueliamolhma, ca aptemo nac ma'a apiamolhma m'a. ¹⁶ Ca actemo nac na actalhesammalhca waccajac Engiapom Neten apaioma jenque'e: «Etnamo ta apqueliamolhma, ca astemacja nac co'o asiamolhma» ^{1 17} Eliecpelcoc jata Engiapom Neten aptancolha la enenlhet apquellanecamoc actacmanma nlho ca la ncolatsecama, mellanjec aptemacja enenlhet, apnescamo po'oc coca apquellanei'o m'a. Ca apquetlheno la quetlhencap apiapma'ac Engiapom Neten, ncaimelhquec na ellajoc ma'a necsa apquellaniemjaicama jenque'e nalhepop anac, ¹⁸ ncanec apqueliengioscacje lhta necsa apqueltemacja lhennenga malha alpatjetma la'a alleniem'o lhta m'a apqueltemacja apquellieijenca'a. Ncaimommalhque lhtoca secjec ei'anmonquesec ma'a cacpota eliengioscacjac ma'a, jawe coca oro nac canjan pataccom alienmomo plata apianmonquescamo m'a ncanec apawoc ncotnec ma'a, ¹⁹ coca apianmonquescamac ma'a ema apancoc acnema acmowana Cristo, nemo lhta anconwaiacmo cacpota ematong malha actemo nac nepquesec apquetcoc la'a metca apiaqteicamaja. ²⁰ Tep nac nec Engiapom Neten apenescamo aclhenaicama apualhoc engiapacsec jata Cristo, mellaneiacja lhnac lhamacjo caselha lhmanquec jam, coca nenwanlha nac apuai'ac ma'a cacpota jengeltacmelquesquesec nellaneimjaicama, quetsec na ncaimelhcac acnem actemacja ta nnelha. ²¹ Engiapom Neten aplhatecjasqueiam Cristo, aptemesquescamo njan neten apanquec ma'a, ca meliasqueiacmo njan quetlhencap Engiapom Neten aniem'o njan apqueltemesquescama Cristo, nnanquec na aleljalhnecama apualho'oc eltacmelquesquescamoc jata apquellaniemjaicama m'a Engiapom Neten. ²² Colhua coca quetlhencap malha alalhnai'o apualho'oc aniem'o apquelleliejecjo ania'a acto jawe ngiapac anque, apuanca'ac na ellamelemmac apquelialheng'a iocjalhmec anquec. Jai, ntasec ellamelacpo mota apancawec ²³ ncanec malha apalleiam la alhnancoc mocjom, jawe actonac ma'a enquen anac jentenquescama, quetlhencap coca apalleiam aniem'o Engiapom Neten apaioma nac acto njan mancotsepma m'a, mancotnenwaiam na nnelha. ²⁴ Ca actemo nac na actalhesammalhca Engiapom Neten apaioma jenque'e: «Enenlhet la'a aquiacuatacjo nquec aptacmanma, malha actonac panactema amjamacjanque nac iocjalhma, iacuatacjo njan actacmanma, niemac'ac na elhnemoc anac cacpota ncopallenmac ma'a, ²⁵ coca Engiapom Neten apaioma nac metca actemonwaiam annelha» ² Ca apaioma nac acuesai'a ania'a actacmanma nema aleltennascama lhta mota quetlhencap.