Capítulo 2
1
Eluatesamoc jata lhamacjo actemacja ncollatsecama nac, nengiennenquescama, janet enwalho'oc, nengiasepquescama emmo'oc apanco'oc cacpota njan nentepquesaicama apuesai'a emmo'oc.
2
Malha aptonac nematca nac colhua apteiam la'a niacsec emajac neme, melles jata njan enmajancoc quetlhencap malha aptecamoc allaicamoc la aliennactema apualho'oc cacpota ncowanamoc meliasqueiam, ncolhec na aluoncaso tep ma'a
3
aniem'o apquelliawec quetlhencap apiamolhma Apuesque.
4
Eltetescacjo ta Apuesque apto metaimong vivo apqueltacnonwecja lhta enenlhet, coca apqueliequiescacje lhta m'a Engiapom Neten metaimog anac ncanec acto lhta niecje neten anquec aquiaspommalhca m'a.
5
Quetlhencap na malha apquellelto metaimong vivas (aliennactema) cacpota enmama Engiapom Neten elanac lhema pa'at aquiawai'a nemacja' la alletsewasquesaiancolha apuesai'a m'a. Quetlhencap na apquellelto sacerdotes apqueliequiescama Engiapom Neten cacpota ellancoc caselha malha aluanlhenmalhca acleclemelha la apualhoc ma'a, apuanca'ac etnancoc quetlhencap ma'a aniem'o m'a Jesucristo.
6
Ca actemo nac actalhesammalhca waccajac Engiapom Neten apaioma jenque'e:
«Aspecquenquec lhema metaimong acto neten anquec actacmanma anmama, asqueliequiescama lhta njan ncanec aquiennactema nquec ma'a, apto la njan mei'asqueiam ma'a mancomancacsec jata m'a»
7
Apquelliawec quetlhencap metaimong anac apto actacmanma nquec ma'a, meliasqueiacmo nac quetlhencap, coca apqueliasqueiacmo nac ma'a ncotnec jata apqueluetai'a actemo nac actalhesammalhca waccajac Engiapom Neten apaioma m'a, ca ntemac jeng: «Ca metaimong alhta apquelhaicamoc apquellanecamoc pa'at, ntacjec mocjom nema acmaicama aniem'o neten anquec actacmanma anmama m'a,
8
ca metaimong anac acmowana ta ncolpelaponquesec ma'a»
Jai', melleliajacjo la ania'a aplhenammap Jesucristo ncotnec jata malha alpelaponquescama m'a, nietawe ncotnec ma'a.
9
Quetlhencap coca apqueliequiesaianquec Engiapom Neten cacpota etnancoc apquennemolhema, apquellelto njan sacerdotes apquellasennaicama apiau'acja apuesque, apquellelto njan lhema apcawacja apquelpocquenammap aniem'o apquenmama apianmonquescama Engiapom Neten, apquelleltemo njan eleltennasancoc lhamacjo caselha jempelapquescama apquelanai'a m'a, aplaqlosenwecjo m'a ienactesacja lhma quetlhencap, aplaqlecjo m'a aquieto malha aponmatmacja.
10
Lhennenga lhta quetlhencap jawe lhta apquennemolhema Engiapom Neten, coca colhuawe nac aptanquec apquennemolhema m'a, ma lhta njan elietnai'oc napaqta'a quetlhencap ma'a, colhua coca apquelietnai'awec napaqta'a quetlhencap ma'a.
11
Quetlhencap elialheng'a asquellamelaiam, jawe apquellawacja jenque'e lhmanquec jam, malha aquiacuatacjo la apsaujecjo apquellaniemjaicama ca ncanec mellelteje ncolhnancoc aliasponcomacja nac apualho'oc, nnactewascasquec sonquec apualho'oc ma'a.
12
Eltacmelcasacpo ta necsa apquellaniemjanca nlho mocjom jenque'e apiesecsec enenlhet'awoc anac apqueliasqueiam Engiapom Neten, eliematquesama ta quetlhencap ma'a elleltancoc meliamolhma, coca netamen ma'a eluetanwomoc jata apquellanecamoc caselha altacmelo quetlhencap ma'a, ncollecasama ta apualho'oc apuesai'a Engiapom Neten acuo'o ta acnem nemacja jengiecpelquemelha.
Actemacja neliejecjo apqueluescai'e
13
Elieplauques jata apcanemacja etnancoc Apuesque actemacja apquelleliejecjoc apqueluescai'e, apiua'acja apuesque nac apto neten apanquec ma'a
14
cacpota njan gobernadores apto apcapasammap cacpota eliaqmoncasquesecjac apquellanecamoc la ncollatsecama apqueltemacja, cacpota etlhenama njan ma'a apqueliamolhma apquellelto la apquellanecamoc caselha altacmelo.
15
Apqueltawec Engiapom Neten quetlhencap ellanancoc caselha altacmelo cacpota meliematquesama enenlhet'awoc anac melianweiacmo mocjom canjan metca apqatco'oc anac.
16
Quetlhencap mmasquec malha esclavo nema anmaicamoc anac, colhua coca apuanca'ac apquenmac'acja la ellanacoc caselhaja,
¡coca ellajo ta m'a, mellanamonquec ncollatsecama ncanec quetlhencap apquellelo Engiapom Neten apquellasennaicama!
17
Eltacmelcaso ta apquellanei'o po'oc, ellamelap najan apiesecsec la apquelialheng'a, ellajo ta njan Engiapom Neten, canjan apiau'acja apuesque la'a.
Nenganemmalhquelha antancoc nema jengellasennaicama la'a
18
Quetlhencap apquellelto nac nema anmacmesaicama, elleliejecjo, ellajo ta njan apqueluescaie' apanco'oc apqueliojo la lhma canjan comprensivo la'a, elleliejecjoc na meliojo la lhma.
19
Niecje ncollatsecama apquellanei'o m'a ncotacmanma njan aptancolha apquellanei'o apqueluescai'e apanco'oc necsa niecje la njan actacmanma apquenmacmesaicama m'a, ¡eluascap jatoca quetlhencap ma'a! ncanec nleccasema apualhoc Engiapom Neten ma'a.
20
Coca apqueluascapo la quetlhencap necsa nema altecpoicama aniem'o ncollatsecama apquellanecamoc caselha, coca metlhewanquec aquianmoma m'a, acjemo njan apqueluascapma m'a. Coca apqueluascapo la necsa aquientalhnema nieje njan necsa actacmanma apquellanecamoc caselha, ncoleccasama ta apualhoc Engiapom Neten ma'a.
21
Necsa apquellawecama lhta Engiapom Neten quetlhencap apiamawe lhtoca njan eluetac jata aquientalhnema aniem'o acnaicamoc apquelleliejecjoc ma'a, ca aptemo lhta njan Cristo aplengaianco aniem'o apquelpasmoma quetlhencap, apquelleltemo lhta njan quetlhencap eluanancoc ma'a aptemacja.
22
Mamma lhta aptemenweiacmo lhma Cristo, mamma njan apiennenquescama la po'oc,
23
ma lhta njan eiacmoncasecjac nema aquiamenaicama la'a, ma lhta njan epocquenaicama po'oc la'a necsa aptewascama, wanlha lhtoca apquenmalhneianca Engiapom Neten apqueltemo eiecpelcoc ma'a ncanec apto apeiwomo m'a.
24
Apatmecje lhta njan mongeliamolhma ennenco'o m'a nemo lhta aquiepetquescamo neten iamet actennescama m'a, jengelpaqnencasquesecjo lhta njan jengenmaicama mangeliamolhma nac, netamen ma'a enwanca'ac angellanancoc caselha acpeiwomo. Jengeltemescasecjo lhta njan enjalhnanco'oc aniem'o lhta apiensema Cristo.
25
Apquellomaca lhta quetlhencap malha nepquesec apquetlheneiam la'a, colhua coca apquenmeiacjec apnacja apquelanecama nepquesec.