¹ Ca waccajac anac nennactalhescama actemacja aclheianma apto nac ma'a Apaioma jengaicamoc aliennactma ennengio'oc, ca Apaioma nac apnenquec tep nac nanec nemacja secja allanei'o lhamacjo caselha lhmanquec jam, nelluetai'a lhta njan ennenco'o m'a, nellengai'a lhta njan acuacmo jengelmanwei'o lhta njan ennenco'o m'a. ² Coca apto njan ma'a ngiapom aliennactema ennengio'oc apnenquec nac nanec apnacja Apiapom, netamen na apuai'o jenque'e nengiesecsa ennenco'o, neluetai'a lhta apiocja apanquec ma'a ca netlheianmo mota aptemacja lhta apcaniemjaicama m'a. ³ Jai, netlheianme mota actemacja lhta nenwetai'a, nellengai'a njan, cacpota quetlhencap jengelpasmecjac ennenco'o m'a, ca ctemo nac ennenco'o jengelpasmecjo Engiapom Neten canjan Apquetca Jesucristo. ⁴ Nennactalhescasquec ennenco'o actemacja caselha neluetai'a cacpota ncolpaijecjac apualho'oc lhemec ennenco'o. ⁵ Nelleltennasquec ennenco'o ania'a actemacja lhta jengelleltennascama Jesucristo, Engiapom Neten nac apto malha aponmatema, mamma lhnac na ienactesacja la lhma m'a. ⁶ Ca netlhenalhco la engancawec ennenco'o nengellelto nelpasmecja Engiapom Neten, coca nelloca njan malha ienactesacja lhma, nenmopuana ania'a coca njan m'a. ⁷ Coca nellawa la atsac'eja lhma malha aptonac Engiapom Neten, nentanquec nelpasmecja m'a, canjan Apquetca Jesús ema apancoc allalhnascama engellualho'oc caselha ncollatsecama. ⁸ Ca netlhenalhco la engancawec ennenco'o metca neltemenweiacmo lhma, nenmopuana ania'a m'a, nennactewaselhcawec na ennenco'o m'a, ⁹ coca netlheno la mongeliamolhma m'a, jengenmecjac jata njan tacja m'a Engiapom Neten, jengellalhnasquesec jata njan mongeliamolhma engellualho'oc ma'a. ¹⁰ Nenmopuana ania'a netlheno la metca neltemenweiacmo lhma, malha njan neliascacmec ma'a Engiapom Neten anac apaioma, canjan nelleltanquec apmopuana ania'a m'a.