Capítulo 2
1
Quetlhencap eietcac, asnaqtalhescaso nac waccajac anac asquelleltemacja etnancoc cacpota mellananquec caselha ncollatsecama, ca apquelan'o la ncolatsecama lhema apjapac jam, Jesucristo toca engio'oc ma'a napaqtec Apiapom.
2
Apcaiancawe lhtoca apmatnamo jengeliaqmoiecja ennenco'o nengellelto mangeliamolhma cacpota njan aplhamacjo meliamolhma lhmanquec jam cacpota
jengenmecjoc mocjom tacja Engiapom Neten.
3
Nengelliawec ennenco'o nengelpasmecjo Engiapom Neten ncanec nengelleliejecjawe mota jenganemacja apancoc ma'a,
4
coca apto la enenlhet meliejecjo m'a, acjemo moc apatong coca aplhenammacpo panquec apto apasmecja m'a.
5
Coca apuanquec enenlhet eliejecjoc apaioma nac ma'a aniem'o apuanenquescama jengamelaiam anac apcaicamoc ma'a Engiapom Neten, aniem'o njan apasmecja Jesucristo.
6
Enenlhet apto la aplhenammacpo panquec apto apasmecja Jesucristo, ncaimelhquec na eieploc amai apancoc ma'a.
7
Quetlhencap elialheng'a, jawe alhnancoc jenganemacja asqueleltennaso nac, apquellengai'a lhta secjec anque quetlhencap apquetlhewai'o lhta ania'a actacmanma, asqueltawec coca altacjenwescacjac colhuawe nac alheianma
8
cacpota atnesquesancoc malha alhnancoc la'a. Apqueliejecjawe lhta njan Cristo jenganemacja nac ma'a, apquelleliejecjawec na quetlhencap nenwanlha nac ma'a, ntacmelcasawec na acmasco malha ienactescama lhma nac acuacmo aquiawenco atsai'a lhma.
9
Enenlhet apto la aplhenammacpo apanquec aploma aisecsec atsac'ejlha lhma coca aptaqnewacquec engialheng la'a, apmopuana ania'a m'a, aploca niecje aisecsec ienactesacja lhma.
10
Enenlhet apto la apcamelaiam engialheng la'a, coca apto njan enenlhet aploma aisecsec atsac'elha lhma, metuasoc na po'oc.
11
Coca apto la aptacnoncoma engialheng, malha metca apaqto'oc la m'a aploca njan malha ienactesacja lhma la'a, meijoc na apmancolha la m'a.
12
Quetlhencap eietcac, asnactalhescasquec waccajac anac jengque'e asquellanemacja etnangcoc quetlhengcap ncanec apquellelto Engiapom Neten apquenemolhema, apquenmecjo lhta njan mocjom tacja m'a necsa meliamolhma lhta aniem'o njan Jesucristo.
13
Asnactalhescasquec na quetlhencap apiapma'ac anac ncanec apquelliawec ma'a apnemo lhnac nanec tep nac nanec alanemmalhco secja lhmanquec jam. Asnactalhescasquec na m'a quetlhencap apquetco'oc ncanec apqueltemesquesentanie coneng maniamolhma nquen anac.
14
Asnactalhescasque lhta njan waccajac anac quetlhencap eietcac ncanec apquelliawec Engiapom, asnactalhescasque lhta njan quetlhencap apiapma'ac ncanec apquelliawec apnemo lhnac nanec tep nac nanec ma'a alanemmalhco secja lhmanquec jam, asnactalhescasquec na quetlhencap apquetco'oc ncanec apquenmaianquec tacja Engiapom Neten anac apaioma, apmelleijac apancawec najan, apqueltemesquesentaniec coneng maniamolhma nquen anac.
15
Mellamelemmanquec ncollatsecama nac, moleccasquesama nquec na apualho'oc ncoietemo nac nentemacja. Apto la enenlhet apcamelaiam ncolatsecama, mengiamelacmoc na Engiapom anac.
16
Caselha ncollatsecama nac jawe alleniemacja m'a Engiapom Neten, coca maniamolhma nac nquelleniemai'ac ma'a, actepquescama aquiasponcomacja nac enwalhoc angellanac caselha ncollatsecama, nqueltawec angiasepquescamo nenwetacja la'a, ncacjama njan enwalhoc aniem'o nquescama netsecama.
17
Coca quetse ncaimelhca ncomasquenwomoc jata m'a lhamacjo caselha ncollatsecama nac, ncomasquenwomoc jata njan ma'a aliasponcomacja nac engellualho'oc, coca mancomasquenwomec ma'a apto la enenlhet apquelanai'a apqueltemacja etnec Engiapom Neten, eloca ta njan mancotnenwaianlha nnelha m'a.
18
Quetlhencap eietcac, quetse ncaimelhcac actemonwaianlha nnelha acnem lhma nquec jam, apquellengai'ac quetlhencap aplheiam apto apcammelhma Cristo, colhua coca apqueliepjonwac aplhamacma apquellamelhma Cristo, ca ncanec nengelliawec ennenco'o ncanquetuaiacmec actemonwanlha nnelha acnem alhmanquec jam.
19
Apacjanquec nengiesecsa ennenco'o m'a apquellammelhmacja nac, coca jengeliengiecjec lhta njan ncanec mamma mota jengelpasmoma m'a. Lhta jengelpasmacjo la ennenco'o m'a, manjengeliengiecje lhta njan ma'a, neluetai'a coca iocjalhmec anquec metca jengelpasmoma m'a.
20
Quetlhencap coca malha apqueliancanma la apietsecso'ocs aniem'o m'a apto apiamolhma apanque nac, ca ncanec apquelliawec lhamacjo caselha.
21
Asnactalhescasquec co'o waccajac anac ncanec apquelliawec quetlhencap acto jawe ngiapac anque nac, apquelliawec na acmowana ania'a nac jawe aniem'o m'a acto jawe ngiapac anque nac.
22
Se lha enenlhet aptema la apmopuana ania'a ie, je? Wanlha enenlhet aplheianma la Jesús jawe apto apcapascama Engiapom Neten, apto njan ma'a apcammelhma Cristo ncanec aptacnewacquec Apiapom canjan Apquetca.
23
Enenlhet apto la aptacnoncoma Apquetca nac ma'a, aptacnewacquec na m'a Apiapom anac, coca apto la njan enenlhet apmama tacja Apquetca nac ma'a, apmec na tacja Apiapom anac ma'a.
24
Quetlhencap elialheng'a, meluancamamonquec ania'a apquellengai'a secjec anque lhta, ca acnanco la ania'a apqatco'oc anac quetlhencap ma'a, apquelpasmacjec Apquetca canjan Apiapom ma'a,
25
ncolhnancoc jata njan aliennactema apnengio'oc mancotnenwaianlha nnelha apenescamo lhta aplheianma apquelleltennasecamoc.
26
Asnactalhescasquec waccajac anac asqueltemo ellajoc ma'a jengetlhecmoscama nac apquenmajai'a na mota eliennenquesca,
27
coca mancaimommalhcac etlhecmoscac ma'a ncanec apnanquec quetlhencap Espiritu apquellaicamo lhta Jesucristo, jata etlhecmosancoc lhamacjo actemacja caselha m'a, acto jawengiapac anquec, metca acmowana ania'a njan, apquetlhecmoscamo lhta njan ma'a etlhenquesec na apquelpasmecja Cristo.
28
Quetlhencap eietcac, etlhenques jata apquelpasmecja Cristo cacpota apuanca'ac na eltetescamoc metca apquenmancasecama, metca apquellai'a njan apuactamo ta m'a.
29
Apquelliawec quetlhencap Jesucristo apto apeiwomo, lhamacjo enenlhet apquenmopuanca'a nac ellanancoc caselha acpeiwomo, aniem'o coca njan ma'a Jesucristo.