Capítulo 3
1
Quetlhencap elialheng'a, asnemo lhta apiesecsec anac asmac alhta niecje atnec asquetlhecmoscama aquientalhnema actemacja la aliennactema nac meliasqueiam angellanjo, coca ma lhta amopuanac ma'a ncanec mancolliennac mocjom meliasqueiam Cristo. Malha actonac mocjom ma'a nematca
2
apquetcoc aicamoc anac neme ncoc la nquen, mancapuanquec etuoc aptoma aliennactema, nnawec na quetlhencap ma'a, mancoliennactema nac meliasqueiam Cristo ca ncanec asquetlhecmoscamo lhta alhiewai'a nquec asquetlhecmoscama. Colhua meliojoc mocjom actemacja aquientalhnema jengetlhecmoscama
3
aniem'o mancolliennactema meliasqueiam ncanec nietnec apqueliasepquescama po'oc, apqueliamenammap najan, malha enenlhet la meliecpelco mocjom
Engiapom Neten.
4
Moclhem'a apquetlhenque lhta mota jenque'e:
—Ennenco'o nelieplaucasquec jengetlhecmoscama Pablo— Coca napocja na aptancoc:
—Ennenco'o nelieplaucasque jengetlhecmoscama Apolos—
Apqueliamenacpe lhta quetlhencap apquenmajai'acja la elieplauquesec negetlhecmosecamo lhta aniem'o mancolliennac mocjom meliasqueiam Cristo.
5
Coca Apolos canjan co'o Pablo nengellelto jengellasennaicama Engiapom Neten cacpota angetlhecmosancoc quetlhencap meliascamec Cristo. Moclhem'a lhta ennenco'o nellan'ac nenmacmecama apqueltacja la Apuesque engancoc.
6
Asquenque lhta co'o, netamen Apolos alhtoca apiasquesaicamoc, Engiapom Neten alhtoca njan apcactenquescama m'a.
7
Coca jawe apto neten apanquec apiaspommap apto lhta apcanma, apto lhta njan apiasquesaicamoc ma'a, coca m'a Engiapom Neten apto neten apanquec apiaspommap ncanec apcactencasquec anammalhca.
8
Apto apcanma nac cacpota njan apto apiasquesaicamoc apnemo po'oc ma'a, moclhem'a etlhewanco ta aquianmoma actemacja la apquenmacmecama.
9
Jai, ennenco'c nengellelto nenmacmesaicama Engiapom Neten, quetlhencap coca malha aniep, malha njan pa'at la aquiawai'a Engiapom Neten apancoc.
10
Jeliequiesquec Engiapom Neten aniem'o jeiamelaiam cacpota atnec asmopuana alanac pa'at angiapom, asquellanac co'o aquiennactescama aujac pa'at, po'oc coca apto apcacjescama ietapjaimatco'oc
. ¡Ellajo ta m'a nema alanai'a pa'at anac!
11
Mancolatsecma ncolhec aquiaqmoncasacjo mo'oc actemacja nema alanai'a lhta aquiennactescama nac pa'at, Jesucristo coca apuesai'a m'a.
12
Ca tacjalhet'oc anac ma'a aliennactescama enwanquec nenmac'acja la angellanac anmama oro, alienmomo acmopai'a, metaimong altacmana anmennawe ncoie', iamet necja'ac alpaijema, au'oc, iompa'at
.
13
Netamen, acuo'o ta acnem neliecpelcammalhquelha, talha ta ncoliecpelcoc actemacja apquellanecamoc pa'at, actacmanma alanemmalhca, nlho ca la ncolatsecama.
14
Ca alianmolhco la'a pa'at alanemmalhca, elhcac jata aquianmoma apto apquelanai'a,
15
coca mancolianmolhco la'a pa'at anac ma'a, eietepoc jata njan apto apquelanai'a, ncotlhenquesec jata njan mewoncasacpec tep ma'a.
16
Cotlheng jata apualho'oc quetlhencap elialheng'a, malha Engiapom Neten apnemacja la
acpocquenammalhca quetlhencap, apnec Espiritu apancoc engiapom Neten apualho'oc quetlhencap.
17
Jai, quetlhencap apquellelto malha pa'at alpocquenammalhca aniem'o Engiapom Neten, ca acno la actewasquesco'o pa'at anac, etuacsec jata njan Engiapom Neten apto aptewascama pa'at.
18
Apno la apiesecsec quetlhencap apcanema la ncoietnac apianweiacmo apancoc apanque', apiennencasecpe panquec na m'a enenlhet anac, ntasec eijanwanjo apancoc apanque apto meijanweiacmo, netamen jata m'a ncowac aptema apianweiacmo m'a.
19
Actaicama nquec ma'a napaqtec Engiapom Neten nengianweiacmo nac aniem'o engancoc enganque. Ca ctemo nac actalhesammalhca Engiapom Neten apaioma jenque'e:
«Aptemescasquec Engiapom Neten nema nac apquelianweicmo nconmoc aljanemmalhca aniem'o apquelianweiacmo apanco'oc apancawe»
20
Ca ntemac na mocjom actalhesammalhca waccajac Engiapom Neten apaioma:
«Apiawec Engiapom Neten actaicama nquec ma'a alietnaicama apaqto'oc nema nac apquelianweiacmo apanco'oc apancawec»
21
Ca ncanec ntasec mellacpec apquelianweiacmo apancawe nac enenlhet.
22
Coca lhamacjo nac asquellanai'a co'o Pablo, Apolos cacpota njan Cefas allelto altacmelquesquescama ta apquellaniemjaicama quetlhencap ma'a. Ca nenganiemjaicama nac, nengetsepma nac, caselha nenwetai'a nenwanlha nac, can jan emmanie ta, lhamacjo caselha nac allelto njan altacmelquesquescama ta apquellaniemjaicama quetlhencap ma'a.
23
Cristo apanco'oc quetlhencap, Cristo njan apto apancoc Engiapom Neten ma'a.