Capítulo 2
Nengiamo aniem'o Engiapom Neten
1
Elialheng'ac, necsa asuai'am alhta apiesecsec anac quetlhencap jam asqueltennama lhta ania'a aplhenammap Engiapom Neten, motengiaicama njan actalhnemo nquec la alpelapquescama apquellengai'a asianweiacmo, nlho ca la njan asmopuana aliatama.
2
Wanlha lhta mota asqueleltennascamo aquietemo nquec aclheianma ewalhoc ania'a aplhenammap Cristo apquetsepma neten iamet actennescama
3
Asquetlhecmosque lhta napaqtawec quetlhencap ascapiosecama apanque, asquellai'o njan,
4
astengia lhtoca ncoliacuomoc apancawec aniem'o Espíritu amopuana, jawe aniem'o asianweiacmo ejencoc ejenque nac,
5
cacpota ncoliennac meliasqueiam
aniem'o Engiapom Neten apmopuana, jawe aniem'o m'a nengianweiacmo aniem'o nac enenlhet.
6
Asquetlhecmosque lhtoca apiesecsec anac aliennactema nac meliasqueiam aquieplomo asianweiacmo, jawe coca aniem'o nac enenlhet, nlho ca la m'a apquelemjama apmaniaie nac, acmasquenwaiam anac apquelientalhnema.
7
Asquetlhecmosquec co'o asianweiacmo aniem'o Engiapom Neten, nengianweiacmo nac malha lhnac nanec acposemmalhca ntemac tep nac nanec, amanie nema alentepquescama caselha lhmanquec jam cacpota alhaiec jengeltemesquesec jata neten engancawec ennenco'o.
8
Ma lhta ncoietnemac nengianweiacmo nac apquelemjama apmaniaie engancoc alhta, co lhtema nac aquietnema la apqueliamojo, mennape lhta Apuesque engancoc acnema apmopuana neten iamet actennescama.
9
Ca actemo nac actalhesammalhca waccajac Engiapom Neten apaioma jenque'e:
«Caselha monwetai'o nac, mollengai'o njan, caselha mancoietnaiancolha lhta engaqtec, ca lhamacjo caselha nac apenescamo lhta Engiapom Neten cacpota ellancoc ma'a apquelleto nac apquellamelaiam»
10
Jengelluetascasquec Engiapom Neten lhamacjo caselha nac aniem'o Espíritu, ncanec Espíritu apiáwec ma'a conne canquec apualhoc Engiapom Neten.
11
Nnawec na apualhoc apanque nac enenlhet, apiawec aquietnaicama nac apaqtec enenlhet, cacpota njan Apualhoc Engiapom Neten apancoc, apiawec aquietnaicama apaqtec Engiapom neten.
12
Netlhewanquec ennenco'o Espiritu apancoc Engiapom Neten, moc actema coca apualhoc anac enenlhet, jengelianwesquescacmec Espiritu caselha jengellaicamoc alhta Engiapom Neten aniem'o jengellamelaiam.
13
Necsa nengeltennaicama la ania'a aniem'o Engiapom Neten, nengelpaqmetquec ma'a aniem'o Espiritu, jawe aniem'o m'a nellianweiacmo nac enganco'oc engancawe'.
Jai, necsa negelpeiwescasecja mota aptemacja Engiapom Neten, nelpaqmetquec nelpaqmeiasma aniem'o m'a Espíritu,
14
coca mancollapuanquec elianwomjoc ma'a apquellelto nac metca Espíritu apancoc Engiapom ncanec actaicama anquec apquellanemac ma'a, wanlha coca apuanquec iejanwomjoc apietno la Espiritu apancoc Engiapom Neten.
15
Apquellelto nac acnaicamoc Espiritu apancoc Engiapom Neten, apuanca'ac elianwomjoc lhamacjo caselha, coca mancollapuanquec enenlhet eliecpelcoc ma'a.
16
Ca actemo nac actalhesammalhca Engiapom Neten apaioma jenque'e:
«Mamma enenlhet eliojoc aquietnaicama apaqtec Engiapom Neten, mamma njan ncolhecmocsec ma'a»
ntemac ma'a.
Ennenco'o coca atlhenaicama engellualho'oc nnawec na aclhenaicama nac apualhoc Cristo.