¹ Yemi ayena yarami nisa jiwer Jesukristo jiti echiriká ku´wirsa auche jaré, mapurika binoi natimaka ku mí ku´wirli ayenacho ku´wirsa jaré, alí sineami yemi pirélsa chopi bilebi iwikála jiti alí nakupi natimaka pirelsa, ² aliko echiriká chopi natika pirelsi mapurika nijé ne wabé kanílima, nakupi we natimasi, napawika ku´wirsi alí sineami napawika chopiriká oloká pirélsi. ³ Kie pi binoi ku ku´wira inabo o binoi ku we norli nirá birelbo. Chopi, waminan natimak ka´la kuwirsi auche jaré. ⁴ Ayenacho kuwirsi auche jaré mapu ikí newalé ketasi chopi mapu yemi ibil newalé. ⁵ Echikorika natasi mapuriká nátami nili Kristo Jesús. ⁶ Binoi ko níli chikioyirs mapurika echi Riosi, chopi binoi ketasi ´werl nirali chikoyira níma Riosi yuwa, mapurika bile namuti kie sine ni´yubkuam. ⁷ Chopi, ketasi ni wa´lula nirali binoi kú. Binoi nakili mapurika ku´wírami níma. Binoi najitali mapuyira tamuje ralamuli. Binoi nawali achikorika mapu pi auche bile rijoi nirá. ⁸ Ne wabe jubála nirali binoi kú, alí ka´la nijewami najitali yensi binoi mukuli, ¡mukuli echona kursichi! ⁹ Echi jiti, Riosi we noli ne bachá wa´lula nirá. Binoi i´yali riwalá mapu ne bachá chukuami ju auche riwala yuka. ¹⁰ Binoi ko echirika olali mapurika sineami mapu iki kipusa echi Jesusi riwalá echirika chokobaká wabe nawajinmaré, kara su´waba mapu iki muchuwi mina ripa riwigachi alí jena´í kawir alí rile. ¹¹ Alí binoi echiriká olali mapuriká suwaba ra´ichka animé mapu Jesukristo wa´lula jú, mapuriká sineami nawajinma echi Riosi Onoruami. ¹² Alí ko, yemi mapu nije wé kalé, nopiriká yem wabe ka´la nijewami jú, ketasi chopi mapualí nijé asisá yemi yuwa, chopi waminani jipi ketasi yemi yuwa atí, werli olasi nijewika olá echi mapu mi ku´wirli ka´la machika alí ka´la majaka. ¹³ Mapujiti Riosi jú mapu mi nakiluwa chukú mapuriká yemi ka´la nijewika alí olabo mapurika binoi nakí. ¹⁴ karka namuti olasi kie siti chati ra´ichaka auche jaré jiti alí kie biyir jiti najisaka nakupi. ¹⁵ Echiriká olasi mapujiti ketasi chati olámi nirá alí ma ka´la biwarami nirá nima yemi, Riosi kuchali kie biyir chuluwemi nirá. Echiriká olasi mapujiti omerbo yemi rajína mapurika bile rajerami nirá jena´i kawachi, jena´i nasipa mapu ikí muchuwi wikámi nirá alí we chati siti namuti olami pire. ¹⁶ We ka´la chapisú je´na ra´chali mapu nija ku bitelkuami mapujiti nije ne bichiwa kanilma mapalí ku nawasa echi Kristo. Echalí nije machimé kie pi riyoksi werli oloka bitela nije. ¹⁷ Chopi, nije mi´liruami nisa mapurika bile namuti nijírami nirá echona omowaluachi alí mapurika yemi bichíka pire, nije ko we kanili, alí we kanili karka yemi yuwa. ¹⁸ Achikorika, yemi ayenacho we kanilsi, alí kanilsi tami yuwa. ¹⁹ Chopi nije julama ma ke´ayo echi Timoteo mapualí binoi wa´lula Jesusi echiriká nakisa, mapurika nije jiwerl yarami nima mapalí ma machisa yemi jiti. ²⁰ Mapujiti kie wesi auche jaré yuwa echiriká olá nije, mapu ne bichiwá nira we newaleni yemi. ²¹ Mapujiti auche jaré karka pi abonibi jiti nata pire, ketasi mapurika nakí Jesukristo. ²² Chopi yemi aboni ma machi mapurika olámi jú, mapurika bile ta towi ku´wiri onola ku, echiriká binoi tami ku´wirli nawesa echi Riosi ra´ichala. ²³ Echijiti, ma ke´ayo julamani mapalí machisa churiká ikimeare nije. ²⁴ Chopi nije ni bichiwa atí echi wa´lula Jesukristo mapu nije binoi ayenacho ku simeare ma ke´ayo. ²⁵ Ali nije natani mapu kuwana ku julakuami echi Epafrodito. Echi ko nije rijimala alí tami yuwa iyenami yuwa nocha alí tami yuwa iyena sinibi werli olá, alí echi mapu tami ruye karunti namuti yemi jiti alí tamí ku´wiri mapalí nije namuti newalesa. ²⁶ Mapujiti binoi we omona asalí alí we ku siminala yemi yuwa, mapu yemi ayena machili mapu we nayunali binoi. ²⁷ Ni bichiwa nira binoi ne wabe nayunali alí soki mukuli. Chopi Riosi natimaka ku ku´wírali echi bi, tami ayenacho, mapurika kie minabi o´monama nije mapujiti ma we o´mona atí. ²⁸ Echi we sapu nira julareni, mapalí ku riwisá yemi, we kanilbo alí nije ma kieme natama yemi jiti. ²⁹ Naresi echi Epafrodito we kanílika mapuriká nakí echi wa´lula Jesusi. We kala natimika nijewasi kara mapu iki echikoyira jú. ³⁰ Mapujiti binoi soki mukuli mapali we kala nijewika nóchali Kristo jiti. Binoi ma ke´ayo kie bitelma ruweali tami jiti alí mapalí nijewika olali kara namuti mapu yir yemi ketasi wikirli tamí ku´wira.