¹ Noemí, jalitan, mog: Alou ¿Amshanditda jajewe jin itím jajamolilíprn jaja malig-jee, wrijin maebu-ot canog-jeeya man ijeijet?. ² Dumat Booz, naa bon olawi irig nat ibepetjet, ¿Oshanditte wi bijɤ̃? Maulug, oyá cateshishewe Mojɤ̃mcabig-ot niti jáa shirú-u shai. ³ Ooshrm, maushɤ̃g, jaimauyuijig, ijei-mayui-otda imauyui oyat mauwón niti jáa. Ría mapishimawaɤ̃glig jere bonat onyau jajuiruligca jayewairig oyat jawoglig. ⁴ Oyat maimaujeo,óo japɤ̃shocat-uya jayemauwag dui japrshoye manogjeeya oyem jadica, camauyigya jashibot oyat maupɤ̃shogya jayet. Oyemda jashimoya briɤ̃g imashirg. ⁵ Ruth mogli Noemí-at: Jashimínrgya wríjin otmamog-an. ⁶ Oliwí jawondig nitijáa, oyat jatminrgli jamojani alitan-jan. ⁷ Booz yewaiquétyemdi oya jawogquetyem pɤ̃i oyat jajijeiri, janogli japɤ̃shogjee catjacrtɤ̃gquetyem caija lopdig nat mojrmca-ot. oshrmdi jayú yɤ̃niwi, jashibot iyajigli oyat japɤ̃shog. ⁸ Shaitejamai-uliyau japishijawa naa bonat. Ooli uprt- terig, ¡Oiriwi japɤ̃shoglig itɤ̃m den jashibotjaa!. ⁹ Ooli imag:"¿bɤ̃r man?" ola jayerugwaur-ɤ̃m:"Amwi Ruth, maepinda. Jamaunig mayui-ot maepinda-jaa, mamdawi jajɤ̃ inag-jashrt." ¹⁰ Booz mog: "Alou, Biɤ̃iyawi maishibendiciaɤ̃m. Jamatatɤ̃brgla-an patjei mojayu jabeca naa jayuiwrjushrt, ooshrm mashan- notda itɤ̃mprna cugjin nat mot-tɤ̃lot, ushanbilitjalig-u o dicajalig-ot palatá. ¹¹ Oyat dumat, alou, ¡iira maomdig! Amda jashirm mashrm wrijin otmamog, oshrm pishicawag ayancou-olat itaɤ̃m den ijeya maliglig. ¹² Dumatdapeg ɤ̃jet majɤ̃ja aliglig inagjet mashrt; oshrm, japatjeirig bijɤ̃r ipatjeinag patjei ashrt. ¹³ Namda maulíshirú-u shau, oyat bɤ̃lem pɤ̃i, jatminrbrgjeeyaman patjei mojrja moliyu, jajei, jamaulirgya maminrglig oje majrni. Maupɤ̃shocat bɤ̃lema yau". ¹⁴ Olwi japɤ̃-shoglig jashibot jaa on iwɤ̃juca. oyem jajuimig ijubɤ̃wrligbat. Oyeri jamo Booz: Brjat japishiwagshrt jaliyuglig naa den alica. ¹⁵ Oshrmda Booz mog: Mauɤ̃yug mayuiot oyat oira jamauwao jadminrgbatdi oje jamojani, jatyagli seis japatyuni naa mojɤ̃mca oyat jatpeoli oyatdi janó moyan- shuwaiya. ¹⁶ Ruth minyugbatdi jalitandica, oola imog: ¿Bɤ̃je imaɤ̃, alou? oshrmdi Ruth-lat jaipin wrijin idɤ̃gli naa imanrgli jashrm. ¹⁷ Oola imog: naa seis itog jayayu naa mojɤ̃mca otda ithabɤ̃g-ot-an, oshrmda jamog: Iira manglig malitandica dap-upinɤ̃i. ¹⁸ Oshrmdi Noemí mog: Namda maulí, alou, on japishimawaca brjalig-uya ashiyrgli naa imaɤ̃g, oshrm jashan caiyala naa non on juijaluɤ̃gca naa itɤ̃g shirú-u.