¹ Israel ttö̧ja̧ ä̧ju̧cuä̧tu̧cui̧: Jitä mo̧ro̧ ucutumä Jordán aje cujähuätucuometä päia'a ttö̧ja̧ recuätörö rohuäu cuicuätucua pä'ö ja̧'hua̧ta̧'a̧nö̧ ucututtö'inä abonänö juruhuätörö juhua'atäcu bäreö ttidepiyu ku̧nä̧rä̧tu̧cu̧ ja̧'hua̧ta̧'a̧nö̧ mo̧ro̧jä̧ra̧'a̧ jubö päi'önä 'quiyönä aditö ku̧nä̧huo̧tö̧cu̧, ² ttö̧ja̧ recuätucu ja̧'hua̧ta̧'a̧nö̧ tä̧mö̧ Anac i̧tti̧mö̧cu̧ jahuätucumä̧ cu̧huo̧juä̧ö̧ ditäjä̧ttö̧ jahuätörö ttö̧ja̧ pätta'a ä̧ju̧cuä̧'i̧jö̧mä̧; ¿Ditä jä̧ttö̧ Anac i̧tti̧ tturohuähuomenä amönä ttoecu'anö hua̧mä̧? ³ Ja̧'hua̧nö̧ ja̧'a̧nä̧ huo̧juä̧tö̧jä̧ jitä mo̧ro̧ TÖ̧Ä̧NÄ̧HUA̧ CU̧ Ä̧HUA̧TU̧CU̧ DIOSMÄ cuä'catucunä 'chö ocurä ku icuarä jä̧'i̧nö̧'a̧nö̧; Ja̧u̧mä̧ cuö'ca jo̧mȩttö̧ si'epö i̧cuä̧cua̧; ja̧'hua̧nö̧ jo̧mȩnä̧ ucumä rä'epö icumä jurunä tottepo'önä jȩ'cuä̧cua̧jä̧, Chutä TÖ̧Ä̧NÄ̧HUA̧ ucuru päinö'a̧cuä̧tä̧. ⁴ TÖ̧Ä̧NÄ̧HUA̧ CU̧Ä̧NÄ̧HUA̧ DIOS cuä'ca jo̧mȩttö̧ jahuätörö rä'epö icuinö o'ca'a cuämi'so'quinä̧mä̧ päcuä: "Ttö adihuäjuei jȩcho̧mȩttö̧ TÖ̧Ä̧NÄ̧MÄ̧ i'cächinäcu̧sä̧ pi̧jä̧ rȩjȩra̧'a̧mä̧", isopäi'önä pitö ttö̧ja̧ suronä̧ jȩtto̧mȩttö̧ TÖ̧Ä̧NÄ̧HUÄ̧MÄ̧ cuä'ca jo̧mȩttö̧ rä'epo i̧cuä̧u̧ jahuätömä̧. ⁵ Ucu adihuäjuäi jȩ'cuo̧mȩttö̧mä̧cö̧ cuamiso'quinä re kä̧cuä̧huä̧ ko̧mȩttö̧mä̧cö̧ cuirȩjä̧ jö̧nä̧mä̧ pä'i'ocöjä cui'chä̧cuä̧jä̧rä̧mä̧, pitö ttö̧ja̧ suronä̧ jȩtto̧mȩttö̧ TÖ̧Ä̧NÄ̧HUÄ̧MÄ̧ cuä'ca jo̧mȩttö̧ rä'epo i̧cuä̧u̧ jahuätömä̧. Ja̧'hua̧ta̧'a̧nö̧ Ja̧u̧mä̧ Abrahamrö̧'i̧nä̧, Isascrö'i̧nä̧ ja̧'hua̧ta̧nö̧ Jacobrö'i̧nä̧, ihuȩnȩ huȩnȩcu̧ päinö̧ ji̧nö̧ isojuoa pä'ötä ²¹ Ucutu surojö jȩcuä̧jä̧tu̧cu̧mä̧ ttötä ȩmi̧nö̧sä̧, päcäyä i̧tti̧ cuäditäjätucuäcurumä, ja̧u̧rö̧mä̧ ku icu, huirö icu ppo̧ö̧nä̧tä̧ päi'önä kärö icuinö̧sä̧, i̧sa̧ppȩ ppo̧a̧ppȩ jä̧'i̧nö̧'a̧nö̧tä̧ päi'önä. Ttömä aje i̧sä̧rä̧ möä'cara'attö huȩrä̧chä̧rä̧nä̧ i̧sa̧ppȩmä̧ ri'ähuinö̧sä̧. ²² Taberattö'inä, Masahttö'inä ja̧'hua̧ta̧'a̧nö̧ Kibrot Hataavattö'inä TÖ̧Ä̧NÄ̧HUA̧RÖ̧MÄ̧ a̧mi̧surächi'önä̧tä̧ ȩpi̧nä̧tö̧jä̧. ²³ TÖ̧Ä̧NÄ̧HUA̧ ucuturu Cades Barneara̧'a̧ hue'ö kä̧nö̧mä̧ pä'inö: Ucuturu chi̧yi̧nä̧ cuȩmä̧tu̧cua̧ 'cha'achätucui," Ja̧'hua̧nö̧ huȩä̧u̧mä̧ TÖ̧Ä̧NÄ̧HUA̧ Dios hueinö huȩnȩmä̧ cucuotätucuoca'a ra̧huä̧ri̧nä̧tö̧jä̧ ja̧'hua̧ta̧'a̧nö̧ ucutumä esetocotö pi̧nä̧tö̧jä̧ juhua'atäcu i̧huȩnȩ ucuocu'inä ä̧ju̧cuo̧co̧tö̧ pinä̧tö̧jä̧. ²⁴ Ucutumä TÖ̧Ä̧NÄ̧HUA̧RÖ̧MÄ̧ ra̧huä̧ri̧nä̧tö̧jä̧ ucuturu u̧huo̧jui̧no̧mȩttö̧ kä̧mä̧dö̧. ²⁵ Ja̧'hua̧nö̧ jo̧mȩttö̧ ttömä TÖ̧Ä̧NÄ̧HUA̧ ä'ca jo̧mȩ chihue'quiyunä pä̧mä̧di̧nö̧sä̧ mo̧ro̧mä̧ 40nö̧ mo̧ro̧ jo̧mȩnä̧ yodo'inä 40nö yodo jo̧mȩnä̧, juhua'amä si'epö chicuäcuotö päjiyäcu. ²⁶ Ttömä TÖ̧Ä̧NÄ̧HUA̧CU̧ ucuocumä pä'inösä̧: CHUÄ̧NÄ̧HUA̧ DIOS pitö ttöja̧rö̧mä̧ si'epömä cuicuätö, cumöhuäyotö päi'önä cujurunä cuȩmi̧nä̧u̧rö̧mä̧, Egipto rȩjȩttö̧ Ucutä cujurunä rä'epö cuicuinä̧u̧rö̧mä̧. ²⁷ Amucuädätucui cuä'otucu minä Abrahamrö'inä, Isaacrö'inä ja̧'hua̧ta̧'a̧nö̧ Jacobrö'inä; jahuätö ttö̧ja̧ ttami 'quittädäcuäumä to'cuä, ja̧'hua̧ta̧'a̧nö̧ surojö ttamöcuädö'inä juhua'atäcu surojö jȩttö̧'inä, ²⁸ ja̧'hua̧nö̧ jö̧ttö̧mä̧ rä'epö cuicuinä̧jä̧ ttö̧ja̧mä̧ pättö'anö ja̧'a̧: isopäi'önä TTÖ̧Ä̧HUA̧MÄ̧ tti̧rȩjä̧ chi̧yä̧cuä̧jä̧ päinäjära'amä i'cächoco̧u̧ pinätö̧ juhua'amä̧ öjö'cöco̧u̧ jo̧mȩttö̧, Ja̧u̧mä̧ de'a jui̧yä̧jä̧ra̧'a̧ttö̧ cuä'äu icuatö pä'ötä rä'epö icuinä̧u̧. ²⁹ Ji̧nä̧ jahuätömä cumöhuäyotö ja̧'a̧ ja̧'hua̧ta̧'a̧nö̧ cui̧tti̧mö̧ ja̧'a̧ cujurunä cui̧'cä̧chi̧nä̧u̧ ja̧'hua̧ta̧'a̧nö̧ cujurunä i̧jȩpö̧tä̧."