⁶ Ucutumä jitö ttu̧cuȩttö̧ pärätänä mitö cuȩmä̧tu̧cua̧ja̧, cucuätucua pä'ömä; ja̧'hua̧ta̧'a̧nö̧ jahuätöttötä ajiya'inä pärätänä mitö cuȩmä̧tu̧cua̧ja̧, cahuätucua pä'ömä. ⁷ Isopäi'ömä TÖ̧Ä̧NÄ̧HUA̧ cu̧ ä̧nä̧hua̧ Diosmä cuäditomenämä o'cajuiyönätä̧ adihuomenätä jö̧nä̧ ppädä'ijäcujä̧; de'a jui̧yä̧jä̧nä̧ 'cuä'opö cui̧'chä̧cuȩmä̧ Ja̧u̧mä̧ huo̧jui̧nö̧. Cuarentanö a̧'ȩ jo̧mȩnä̧ TÖ̧Ä̧NÄ̧HUA̧ cu̧ ä̧nä̧hua̧ Diosmä ucutäcu kä̧'i̧jö̧ ja̧'hua̧nö̧ jo̧mȩttö̧ ucuru recuä rö̧jö̧mä̧ o'cajuiyötä ku̧nä̧rä̧'i̧jö̧jä̧. ⁸ Ja̧'hua̧nö̧ ja̧'a̧ rȩjȩ tö̧jä̧hua̧tö̧ ttö̧ja̧cuä̧jä̧ra̧'a̧cu̧ 'cuä'opinä̧tö̧jä̧, Esaú i̧tti̧mö̧ 'cotö ttö̧ja̧cuo̧mȩ Seirnä, Arabá mä̧nä̧ttö̧mä̧ otonä cuä̧o̧pä̧mä̧nä̧ Elat-ttö kä̧mä̧dö̧ Ezión geber jubö. Juhuorömä̧ ppa̧'a̧chä̧chö̧ kara'anä̧ sobötö Moabttö de'a jui̧yä̧jä̧nä̧ 'chä̧mä̧nä̧ 'chi̧nä̧tö̧jä̧. ⁹ TÖ̧Ä̧NÄ̧HUA̧MÄ̧ päinäcu̧sä̧: Moab ttö̧ja̧rö̧mä̧ mȩcuo̧pä̧rä̧, ja̧'hua̧ta̧'a̧nö̧ curänä'inä curohuähuä. Isopäi'önä ja̧huä̧jä̧mä̧ cui̧rȩjä̧ päi'önämä chiyococö cuä̧cua̧jä̧, juhua'amä ja̧u̧ Ar ötahuiyämä Lot i̧tti̧mä̧ ttö̧jä̧cuo̧mȩ päi'önä iyinö̧sä̧. ¹⁰ (Emitas pä̧ttä̧u̧ ttucuo ku̧nä̧rä̧tö̧ recuätömä ä'cojimä ju̧huȩnȩ ka̧cui̧nä̧tö̧ ja̧'hua̧ta̧'a̧nö̧ ttöotomä otopinä̧tö̧ Anac i̧tti̧mö̧ ji̧nö̧ta'anö; ¹¹ jahuätömä refaítascö pä'ö'inä o̧tti̧nä̧u̧ ji̧na̧'a̧, Anac i̧tti̧mö̧rö̧ ottinöta'anö̧; ja̧'hua̧nö̧ ja̧'a̧nä̧ Moab rȩjȩ ttö̧ja̧rö̧mä̧ Emitas pä'ö o'inätö̧. ³⁰ Ja̧'hua̧nö̧ ja̧'a̧nä̧, Hesbón ötahuiyättö ru̧hua̧mä̧, i̧rȩjä̧nä̧ 'cuättopiyarö pä̧'ö̧mä̧ huȩ'o̧cö̧ pinö; Juhua'amä TÖ̧Ä̧NÄ̧HUA̧ Dios ja̧u̧ amiso'quinä ami'quiädäcuäunä jȩo̧mȩttö̧, ja̧u̧rö̧ rohuäu cuicuarö pä'ö ucutä cu̧mö̧nä̧ iyö jitä mo̧ro̧ jȩä̧ji̧ta'anötä̧. ³¹ TÖ̧Ä̧NÄ̧HUA̧MÄ̧ päinä̧cu̧sä̧: Topittö, jitä kä̧mä̧dö̧ Sehónrö chiyäcu̧jä̧ ja̧'hua̧ta̧'a̧nö̧ i̧rȩjä̧'inä cuä'ca jo̧mȩttö̧ chiyäcujä; cui̧rȩjä̧, kä̧mä̧dö̧ 'cho'ipirö, ja̧'hua̧nö̧ jo̧mȩnä̧ cui̧rȩjä̧ jö̧nä̧ cu̧jä̧mä̧dä̧cua̧a'anö." ³² Ja̧'hua̧nö̧ ja̧'a̧ Sehónmä ucutucu urohuähua pä'ö ichinö, chutä'inä juhua'atäcu ahuaruhuä'inä o'catoi'önäcu̧tä̧, Jahaza pä'ö micuomettö̧ urohuähua pä'ö. ³³ TÖ̧Ä̧NÄ̧HUA̧ Diosmä ujuturu iyinö, i̧yä̧jä̧u̧mä̧ rohuäu ticuinäcu; 'coru päi'ome jubö cuäcuätinäcu, i̧tti̧mö̧rö̧'inä ja̧'hua̧ta̧'a̧nö̧ ahuaruhuärö'inä. ³⁴ Ja̧u̧nu̧ mo̧ro̧mä̧ idepiyu ötahuiyämä o'cajuiyötä 'chu'ädinätöjä ja̧'hua̧nö̧ jȩpö̧ ötahuiyämä ji̧yȩcu̧jä̧ si'epö ticuinö̧, uborö'inä isajuru'inä ja̧'hua̧ta̧'a̧nö̧ ppo̧'ä̧tö̧rö̧'inä, ya̧tȩrö̧'inä yorö'iso a̧'cua̧ra̧rö̧mä̧ ku̧ni̧po̧co̧tö̧ pinätö̧jä̧. ³⁵ Tȩmä̧ji̧ jö̧nä̧mä̧ suro pä̧cä̧yu̧rö̧tä̧ ujutumä̧ ȩmi̧nä̧tö̧jä̧, ötahuiyättö 'chu̧tä̧dä̧u̧cu̧mä̧. ³⁶ Arnón aje jäyoto ppämäroppä päi'ome huȩju̧ Aroer ötahuiyättö kä̧mä̧dö̧mä̧ ja̧'hua̧ta̧'a̧nö̧ pä̧mä̧roppä päi'ome Galaad möä'canä̧ huȩju̧ ötahuiyä jubö cä'ädö, ujutu do'ächö turuhuähuäco̧u̧ ki̧'i̧pä̧jä̧tö̧mä̧ toina'a. TÖ̧Ä̧NÄ̧HUA̧ Diosmä taboiyotö o'catoi'önä̧rö̧ rohuäu iso juotepönä iyinäujä tä'canä ka̧cuä̧tö̧rö̧mä̧. ³⁷ Yo̧mȩtȩ Amón i̧tti̧mö̧ 'co̧tö̧ ttö̧ja̧cuä̧jä̧nä̧tä̧ ji̧na̧'a̧ cui̧'chi̧ca̧'a̧ ji̧na̧'a̧mä̧, Jaboc aje pä̧cuä̧dä̧jä̧nä̧mä̧ jä̧ttä̧yä̧jä̧tä̧ ja̧'hua̧ta̧'a̧nö̧ ötahuiyä möä'quiyunä huȩju̧'inä ja̧u̧ o̧du̧ pönä̧mä̧ TÖ̧Ä̧NÄ̧HUA̧MÄ̧ Diosmä ti̧'cha̧ pä'ömä hue'ocö pinö̧.