¹ Aacä amoojato (7) nuunä wanaadi jatuuwai cönä´jacä Filiisteo noonodöcomo de´wä. ² Yääjemma yaawä ñanno Filisteocomo, cönadejaicho ñanno Wanaadi wä töwadeuwamo chötanmenamo mmaja; Edääje cöna´dö´a´to: ¿Aaquene cöödöato eduuwa Wanaadi jatuuwai jäcä? Iiña wä ecammatäcä aquene inñacajain iñanai yeichojo dönña mmaja. ³ Ñanno Wanaadi wä töwadeuwamo chötameenamo mmaja edääje cönädöato: "Wanaadi jatuuwai äwwäiñe adääja´jäcä, tasse´da mma manadojotäiche, aashiichato äntuuducoomo je´damma manadojotäiche. Iyää conemjönö ännöjo´coomo chäjäcä, mädääje änwanno mäjiichö´tato´de, odhoowanäcäiñe nö´döa´de yaawä ane´cäämö e´nei amaaminchaato ñäädä iwanadiiyöcoomo." ⁴ Tönwanno cönä´döa´to: "¿Aane´cäämö ashiichato ujai caato conemjönö cönnöjoocomo jaatuwa jäcä inña´cada´wä tadojoomö?" tönwanno cöneccujä´ato: "ijatodea tumor odooje tödö´ajä, ijatodea asööcö cu´ta´a´jä odoje tödöajä mmaja, ijatodea Filiteo edhajätoncomo weichö cutä´döje cönä´jacä, määdä oodo döajä que cönä´dö´ato määdä cädäichedea cönwanno Filisteo edhajätoncoomo mmaja cäätämaminchajaato. ⁵ Yääje yeijäcä änwanno äcunnöjä´tojocoomo chu´tätäcä asööcäcoomo cutajä mmaja mädä soto chädäñaneichämoje nadö ashiichato uancädä Israelita Wanadiiyöcoomo wä. Mädääje äjimmätoncoomo maminchadööcoomo töwö e´nomjajai naichö jääcä, onoonodöcoomo awaanadiyöcoomo maminchadööcomo mmaja. ⁶ ¿Ane´cätoojoje adhewanöcomo mäntäijanöca tädödeade, Egipto ñancomo, Faraon nöngenñe mmaja? Yaawä Israel wanaadiyöcomo wwä cönätämamichajoi choda´wä; ¿Yaawäne; chäwwä töwäätä´maminchajoodöcomo quee cömjacanöjoicho jönca?. ⁷ Tadaada anaamode´nätääcä tödöenöne adännamooje i´wadö´tääcä´de yaawä aacä jaaca tönneca´como, nono shaca´nödö onoonejaajöncomo, iiña cöntonto adätä´cäde chäwötö´como taca chojonnoiñe amunche. ⁸ Yaawä Wanaadi jatuuwai annu´täcäde tadaada de´wä. Iiñäcä aneeja jatuuwa´cä aca conemjönö ejeematoojo oodo ewaacancädä unmichatäcä´de yaawä. Ennojatäcä´de yaawä chämadö tai. ⁹ Ene´madööje eichäcä´de yaawä; Yeichojo wadäädä jatuuwa chäwwäiñe adää´a´jäcä, yää Bet Semes ñano eemadötai, cowanäcäiñe na´de yaawä woijatooje edä cädäi weichö. Aneiñaja icha´comjäcä mmane, cowaanäcäiñe na´dede yaawä jönaawänooje yeichö, quee cönä´döa´to jöwaiñamo Filiteocoomo. ¹⁰ Ñe´cammajocoomo nönge ñanno dhanwaacomo cönnöicho; Aacä jaaca cöniwadö´täicho iiñacoomo cä´jacomo quiniwadötoicho yaawä cadeeta jäcä iinñacontoncomocä chä´sa´caiñe yeichöcomo taca cönaduicho. ¹¹ Wanaadi jatuuwai tadaada de´wä cönannucuicho yawwä, aneeja jatuuwa´cä aca wawoojänä cu´taajä mmaja. ¹² Bet Semes ñadäädä cönäma´toicho yaawä. Yää äämätaichea ñanno jaaca sa´donna cöntonto, töweecadaujä´ancädäiñe, ämu´dato dö´se ääseca´da, ämu´demjönö dö´se ääseca´da mmaja. Filisteos inchäcäiñe cöntonto dea Bet Semes ña tödööene. ¹³ Yäätä ñanno Bet Semes ñancoomo trigo cönaamu´ca´to. Tönwanno cönanmäicho cönäje´dennacaicho jatuuwa eneedö weetä cönau´cwaichaicho yaawä. ¹⁴ Iyää tadaada wä´döa´jäcä Josué nonoodö´jödö Bet Semes ñanno aaca yomon´a´jäcä, yäätä cönedennai yaawä, tooja adaijoto döötä tadaada cönaacä´jätöicho wa´toje Wanaadi wwänooje jaaca sacrificio je tödödö we´tä. ¹⁵ Wanaadi jatuuwai Levitacoomo cöneenötoicho, iyää jatuuwa´como chäjadä cönä´jadö oodo tödööjä´a´jä ewöötö´como tooja adaijoto de´wä cönnö´jätöicho. Ñanno dhanwacoomo Bet Semes ñancomo yää anootodeamma ashichaato cuntuicho täjemjönö yacwadöque Wanaadiwä. ¹⁶ Yää eneeajä´cä, ñanno ijaatodea´como Filisteo edhaajätoncomo Ecron ña cönennacaicho. ¹⁷ Edä yää ñanno Filisteocoomo ädha´mo oodo döajä Wanaadiwä cuntuicho´dö conemjönö tödö´jödö eje´jödööje: Tooni Asdod nutuuduje, tooni Gaza nutuuduje, tooni Ascalón nutuuduje, tooni Gat nutuuduje, Ecrón nutuuduje mmaja. ¹⁸ Chädhajäätoncoomo waadäi yää asööcö cu´taajä oodo döa´jä cönäja´dea Filisteo jataadöcoomo ä´wäncomo ejiichö´täjooto´como yää jaata tumu´duduicha´como, tumu´duduicha´como mmaja. Yää tooja, Josúe nonoodö´jödö awä Wanaadi jatuuwai a´teije cönä´ja´dö, Bet Semes ña dea na, eduuwa naadö jona tödööene. ¹⁹ Yää´jeje Wanaadi woije cönä´jajoicho 50.070 dhanwaacomo Bet Semes ñancomo, Wanaadi jatuuwai aca töwwäiñe ene´ma´jödö weijäcä. jooje soto cönamoicho Wanaadi wä wanna soto töjajo´como weijäcä. ²⁰ Ñanno Bet Semes ñancomo dhanwacomo cönä´döa´to: "'¿Änä´caamo shinchäjai naicho Wanaadi ashichaato jadä weiñä?¿Änä´cö wadädäädä ijaatuwai adojojai caato e´tonno quee cönä´döa´to?" ²¹ Tönwanno tanoonöcoomo cönennojaicho soto Quiriat ñancoomo, Jearim ña´ncoomo dinñanñe, edääje cönä´döa´to: "Sadä Wanaadi jatuuwai Filisteo´como cönnejoicho; enötätääcä ajadäiñe ajatacäiñe madäätäiye quee cönä´döa´to.