¹ Wanaadi jatuuwai emenme´cajä´cä Fidiiteo wäiñe, Ebenezer ñanno cönäädöicho Adod ña. ² Töwanadiiyöcoomo Dagón maichaca cönaamänäjöicho yaawä, Dagón wötaajä nnäcä cönnöicho. ³ Yää jenamma naadöje Asdod ñancomo wä´jäa´comjäcä, Dagón cöneedantäicho Wanaadi jatuuwai je´taca nonojo yeejuccajä. Cönannäjöicho yaawä yeichojo döötä mmaja tödöödö wetä. ⁴ Yää jenamma naadöje mmaja töwä´jä´comjäcä yeichojo taca Dagón do´tadömma cöneedantöicho, Wanaadi jatuuwai o´wawä nonojo yejuccaajä. Töjöncä´e cönä´jaacä, dhamäädö a´nädäncädä tacä´e mmaja, mönaatata o´nä yä´meaajä. ⁵ Yääje yeijäcä eduuwa naadö jo´na tödööene, Dagón weichojo ta´ca töwoomomööda wäiñe, mönaatata o´nä äätaja´da naato Asdod ñancomo sacerdotecoomo, shootoichomo mmaja. ⁶ Yaawä yä´ja´to´comooje Wanaadi töwaawojä´eiñe cöncädä´ñaicho ñanno Asdod ñancomo, ijaatadööcomo awoodhecääcäiñe cönä´jatodö mmaja. ⁷ Yää enea´jäcä töwwäiñe, tönwanno cönä´döa´to; "Israelita wanaadiyööcomo jatuuwai sadä eija´cha na, cöjääcäiñe cone´da yeijäcä, cöwaanadiyöcoomo Dagon jäcä mmaja." ⁸ Tameedä tädhajätoncomo cönijuumaicho yaawä ñanno Filisteos weichö; Cönädöato chäwwäiñe: "¿Aaquene cöödöato Israelita Wanaadiycomo jatuuwai?" Tönwanno cone´cwajäato: "Gat ña adööjätäcä, quee." Gat ña cönaadäicho yaawä Israelita Wanaadiyööcomo jatuuwai. ⁹ Iiña chäwwäiñe adää´jajäcä Wanaadi chääjäcäiñe cone´da jeene cönä´jacä. Tameedä yää jatawäncomo dhanwacomo cönaawojäätöicho yaawä inchoncomo, mudeeshi´chä jadäiñe jödöödä. ¹⁰ Wanaadi jatuuwai cönaadäjoicho yaawä Ecrón ña. Iiña yä´döa´jäcä ñanno Ecrón ñancomo cöncätömuicho, edääje töwädöancädäiñe: "Cödöiñanñe nädöi Wanaadi jatuuwai cöwä´jaatocomoje, tameedä cöjatawoncomo wä´ja´tocomoje mmaja; quee töwädöancädäiñe. ¹¹ Tameedä Filisteos edhaajätoncoomo cöni´juumaicho yaawa. Cönä´döato chäwwäiñe:"Yeichojo ta´ca Israelita Wanaadiyööcomo jatuuwai adääjotääcä, tameedä cäja´to´no, cöjimmätoncomo mmaja;" quee cönä´döa´to. Tameedä yää jataawäncomo jooje tösaade cönä´ja´to Wanaadi töjääcäiñe cone´da yeijäcä. Jooje cönäntunaanö´a´to. ¹² Ñanno dhanwacomo ä´jajo´da cöneiya´todö töwaawojä´eedä cönä´ja´to. Caju ña tödööene yeecadautöödöcoomo cönäätaacä.