¹ Mamatsicaacatsawa naikjaote njaji inaitjacape imatsicanawa; mamatsica tsa picapaca narso njaji inaitjacape matsia. ² Ima kjeyenatsa napjeya merricarrona cayoji malritsi capishontjana, njite metacaotsana paniatidape sho njaji jipolreperri piatoa. ³ Picada picaolre Dio naco njite pinaitja matsiaperri minitsa; piofa matsia jalredaoca lrico njite piwapa njaji matsiaperri piomalri pjatoa pirsowawa. ⁴ Niini piyoitacawa pi-Minalri naco njite Lricadaotsa pirso njaji pioma lriinai picaolre lricoperri. ⁵ Pitatja Dio iinai lrikitsindatácarro pjia nanaco njaji piomalri pinaitjaca; picadaa picaolre Lrinaco njite Lrinaitjaotsa pirso matsia. ⁶ Lricañjataotsa pimatsiaca nacapácarro pacapacaji jérri icananialre njite Lricañjata tsakjaotsa pinaikica matsiadalri cayoji mayacan capisho jérri icananialre sho. ⁷ Piofawa apafetsa Dio ipeyajle, pitarrawata piwapacani wade pikjeyapitaca. Merroatsa picapaca lrirso jliaji matsiadalritsa iacawa pjiomi lridejicalre naco, o lriwaopia cádanaco matsitsa. ⁸ Merroatsa pjia wade matsica piwaopiakje. Mjetatsa picaolre ima icamitsa lrideca pirso matsiperri. ⁹ Corriotsa naofá carroca aima jalredaoca njaji matsiperri, mitsa njaji iwapacape matsiaperri Dio naco icatsaotsa njaji irsolricaotsa jliaji jiipai Lricaiterri narso. ¹⁰ Kjeyatsa jalredaoca lriwayacawa jliaji atsia matsidalritsa, picapaotsa lriofacawa lrico pia, corriotsa picapá carroketsani ima opica lriawa njiteo. ¹¹ Mitsa njaji mamatsicacapetsa naofawatsawa lri-ricoda jliaji jiipai Lricaiterri narso, njite catimaotsa naofacawa. ¹² Jliaji atsia matsidalri lriomaotsa lrinaitjaca matsi lrirso jliaji atsia mamatsicanadalritsa njite lrimjoa caotsa lrietsa lrikjoete. ¹³ Jliaji Iminalriti lricaa lricao, ima lricapaca tsomi kena jlinana iocacawa. ¹⁴ Opi njeta namatsetani njite natiota kena nayawitjiapo njaji matsiperritsa iwaopiakje nakjoete njaji njerrapitetaji njite njaji canacaiperri irso pjiomi, nainó-carro njaji mamatsicanaperritsa. ¹⁵ Namatsetan sho tsaotsa mayamina njite tocomi caotsa nayawitjiapo. ¹⁶ Matsia pjatoa namatsiaca njaji inaiki matsiaperri tsodalritsa narsoca naoya njaji aimadalri imatsicanati narsolri njaji inaiki matsiperritsa iwaopiakje. ¹⁷ Tocomica nainoaca shopawa njaji inaiki matsiperritsa, mitsa wa-Minalri iwapa lricapi sho njaji inaiki matsiaperitsa. ¹⁸ Jliaji Iminalriti Lriwapa jalredaoca icoam njaji matsiaperritsa iwaopiakje njite caidalritsaotsa narsoca jliaji narsolri. ¹⁹ Corriotsa capaiman carrocana jalredaoca matsidalri ioca cadanacoatsa nanaco. Mawitacai cadaotsa nanaco, narsoatsa aima iñjaodati naoya. ²⁰ Mitsa nawayacacaotsawa njaji inaiki matsiperritsa iwaopiakje. Nawayacacaotsa njaji Iminalriti icoema cayoji jérri imjaita caisho njaji potira njite nañácaotsawa lritaca sho. ²¹ Njaji inaiki matsiperritsa iwaopiakje njeta toatsa nakitsinda iyarro mitsa corriotsa nadietá carroca nacoada lrirso, mitsa njaji inaiki capom-perri nadieta watsa narso njite na pjaotsa nanacojle. ²² Njaji inaiki DIo inaitjaji irso matsia narsoatsa jliaji jiipai Lricaitenda narso; njite njaji inaiki Lricaiteji inaco matsi Lriñetacaotsa. ²³ Iminalriti ikjaotetsa lricadaa matsiatsa naofacawa, jliaji atsia matsiadalritsa Dio icapaca njaji lrinaitjalri. ²⁴ Lritoda cada jlipa, corriotsa jliwá carroca, ima Dio catsa yapiatani lricapi sho. ²⁵ Yempeti pia tsakj njoa oopi njite panaya pekirri kena njoa; corrin coancaojli nocapa namacaca jlia apada inaitjacada matsia, corrin tsakja nocapa lrienipe yajica itatetja naiñjao iñjaodati. ²⁶ Jalredaoca icoam lripeyo lricapaca apjetsida njite lriatoa lriyarro nakjoite narso, njite njaji lrienipe nanaitja matsia narso. ²⁷ Pjienawa matsidalri ioya njite pinaitja matsiaperri minitsa; niniotsa piofacawa pimaodacatsa caidalritsa. ²⁸ Jliaji Iminalriti lripeyo lricapaca jliaji inaitjacada matsia njie corrin Lrimaca njaji yacape Jliapodam. Lriwapacana caidalritsa, mitsa Lriwayaketa pjiomi njaji matsiperritsa inakjoiteperri. ²⁹ Njaji matsiaperri naofacaotsa lri-ricoda jliaji jiipai Lricaitenda narso caidalriwenatsa naofácarro niniwa. ³⁰ Njaji inaiki matsiaperritsa icamitsa cacocana matsiadalri nacotsa njite aima pjaca narsoca yajikjeti njite matsiadalri. ³¹ Dio yáco iofacawa lricaolre ricó; nini corriotsa njewácarroca imatsicanati naco. ³² Njaji inaiki matsiperritsa iwaopiakje depjite nawapa nacapa njaji inaiki matsiaperritsa nainó carrona. ³³ Jliaji Iminalriti corriotsa lricadá carroca nacapi rico njaji matsiperritsa iwaopiakje njite corriotsa nacaité carroca nacona Lricaite cádanacoenatsa naacona njaji jalredaoca lricoprri. ³⁴ Piwapa matsia Dio naco, njite piwapa pinaitjá-carro pjiomi cayoji Lrioma capisho pinaitjaca Lrirso, njite Lricadaotsa piofá carroatsa lri-ricoda jliaji jiipai Lricaitenda narso. Picapaotsa coajicaotsa nawayacacawa njaji matsiperritsa iwaopiakje. ³⁵ Nocapa njaji inaiki macadawanai njite cafainaperri coajica njewacawa cayoji jaico jiwacaísho lriemalri pia ioya. ³⁶ Mitsa nopieta caojli pia tsenakja njoyapa niini, corrinatsa nocapani. Nomatja nocapa akjerrecani mitsa corrinatsa noketani. ³⁷ Picapa piicao jliaji inaiki corridalritsa icashata njite jliaji inaitjacada matsia; aima matsiaperri lripiawalre jliaji atsia imaodacacadatsa iofacawa. ³⁸ Nawayacacaotsawa matsiape njaji inaitjacape imatsicanawa; corriotsa lriofa carrocawa aima jalredaoca jliaji matsiperritsa iwaopiakje. ³⁹ Dio-tsa ikitsindata njaji inaki matsiaperritsa; Jliatsa iwapana njeyapa cádanaco jirrapitanaperri naco. ⁴⁰ Waminalri ikitsindatana njite Lriyomjetana. Lriyomjeta naoya njai matsiperritsa iwaopiakje, Lriyomjetana ima nacadaca nacaolre Lrinaco.