¹ Icatsa Pjia no-Diote, nodawacalri iapjite; macadatsa napirsetaca njoa njaji nocoema. Piyokjeta njoa Pimatsiaca naco. ² Pkjimi norso, kjeya Piyomjetaca njoa; Pidanataca njoa cayoji padawaaca capisho jiipada macadalri yapjite, patawajle taimídalri yomjecawa lrico njoa. ³ Ima Pjiaca jliaji Jiipada shodalri norso nofacawa lrico nomaodacatsa njite pjiatsa icada njodawa; niini Pimatsiaca ikjaotetsa, Pidee njoa matsiacawa lricotsa. ⁴ Pjita njoa natodalre ioya nacadalri nopia nadawanda nopia, ima Pjiaca iwapacada njoa. ⁵ Picapi ricó nocadaa nocafica; Pjia watsa idieta tsenakjaotsa njoa, Pjia Dio matsiadalri, pacadanda inaco wacaolre pamaodacatsa. ⁶ Matsi nocapaca narso njaji icadacape icaolre nanaco njaji idolonai miperritsa, mitsa njoa nocadaa nocaolre waMinalri naco. ⁷ Njite catinaca njoa njite nojoitacawa corri capoa Pimaodaca Piacoam ioya, ima Picapjentsa coajica njorrapitaca; Piají poiatsa coajica lriticoma shocawa jliaji nocafica. ⁸ Corrin picadaca njoa narso njaji nocoema. Picada nopjoaca noajicawa nomaodacatsa. ⁹ Kjena Picapaca norso, Pjia no-Diote matsiadalri, ima matsui noajiacacawa; njaji icaiyati imjaidataca njaji notji, nodada tsakja njite pjiomi njaji norsolri. ¹⁰ Icaiyati njite inonacalri nainoca njoa. Coyolrecalri imjaidataca njoa; mjaidakena nodada. ¹¹ Naikjaote njaji nocoema, njaji inaiki namenataca njoa; nafiowa pekirritsa njaji inaiki naikjaote njaji coajica njoyapacawa, njite njaji yajicvape coajica njoyapacawa njeta nacaolre. Njaji icapacaperri njoa inipolrico napito nooya. ¹² Cotsa coca iwadaca njoa, cayoca njoaji nacayosho njaji mayamperrimi corripetsa nawada. Cayoca njoaji nairra carroapa nabolrontaji. ¹³ Njite njomica coajica monomonodaca aima inaiki, yacoti matsiperritsa ajaitecatsaji, naoma cawiaca nanaitjaca pada iwaopiakjeti nokjoete. Nawaopioaca coajicaotsa nainoca njoa. ¹⁴ Mitsa njoa nocadaa nocaolre Pinaco, Pjia no-Minalri matsiadalri; cayo noaco Pirso: ''Icatsa Pjia no-Diote.'' ¹⁵ Pjiatsa yají coajicaotsa njoa nopeyajle. Piyomjetaca njoa naoya njaji nocoema njite naoya njaji yajicaperri ipineta njoa. ¹⁶ Picadaa nacapa Pjia catsa lriinai jliaji Pirsodalri; Piyomjeta njoa cayoji Picaite capisho norso, jliaji corridalritsa Pimaodaca ioya. ¹⁷ Macadatsa napirsetaca njoa, Pjia no-Diote matsiadalri; Nowanaca Pikjaolre panaya. Pikjenata njaji matsiperritsa iwaopiakje. Picada macotsana irrirri ricó. ¹⁸ Pimacoita njaji cacoperri padalrekjeti ricó corri capoa naomana, njaji iometacape njaji inaki matsiaperritsa. ¹⁹ Macadalrica jliaji Pimatsiaca, jliaji Pimatsietanda narso njaji iyamjetacaperri Pirso njewida, njaji idawaaca caperri Pjida yapjite, napeyajle njaji icapacapena. ²⁰ Piofacawa ipeyajle, pidawa naoya njaji iomacape inaitjaca maatsi. Pidawacana naoya njaji cacoperri matsitsa iñakjeti ricó. ²¹ Matsiadalrica jliaji Iminalriti, Lricada nocapa lriacoam matsiadalri nadanata cádanaco njoa njaji nocoema ima corrin Lrimaodacaca Lriacoam ioya. ²² Nocaite cadana njoa nokjeyapita capoa cayoji: ''Corritsa pioma ketsa Picapaca njoa.'' Cayo cadana, pjimitsa njoa nowana cádanaco Pjia Pikitsindatá-carro njoa. ²³ Ajaca, icatsa cayorra, njoepaca Pjia no-Diote, pjiomi sha corriperri imacaca jliaji Iminalriti. Jliaji Iminalriti Lriwapa njaji corriperri imacani, mitsa Jlirrapiteta pekirritsa njaji padalreperri. ²⁴ Ikjaidatacawa njite iofa imaodacatsa, pjiomi sha icadacape icaolre Dio naco njite iwapa Lrikitsindatá-vcarro sha.