¹ ¡No-Minalri, nocadaa picapi lrico nocafica! ² No-Minalri, nocadaca nocaolre Pinacó. Macadatsa napirsetaca njoa; Macadatsa nacatimatacawa noikjaote njaji nocoema. ³ Macadatsa namacadawalretaca apada nanakjoite njaji icadacape icaolre Pinaco njaji inaiki matsiperi, wade napaimanietacana mikjapantsa. ⁴ No-Minalri, Picananta njoa nofá-carro cayoji pioma capisho; Picañjata nocapa coaji catsa Pioma nonaitjaca matsia. ⁵ Pidee njoa njite Picananta njoa nanaco njaji yácoti ajádalri pinacoapanaperri, ima icatsa Pjia no-Diote imanacotacaita njoa; icamitsa Pjia nowapalri caidalritsa. ⁶ Pidia Piwaopia no-Minalri, coaji piaca kjena picapaca norso njite coaji Piaca Pinaitjaca norso matsia cayotsaji Pinaitja capisho pia yácoti oopi; njite caidalri piatsa Pinaitjaca oopi. ⁷ Ma-waopiatsa nanaco njaji nomatsicana nonaitjaji yempetica lrico o njaca njaji nonaitjaji nomjepacan lrico; Piwaopia nonaco coaji piaca Pinaitjaca iacoti Picaitecawa corrica Pimaca njoa matsiadalri capoa Pjia, Pjia no-Minalri matsiadalri. ⁸ Matsiadalrica Jliaji wa-Minalri njite corridalritsa imatada; niini Lricanantaca coajícarro nanaitjaca cayoji Lrioma capisho njaji camatsicanaperri. ⁹ Jliatsa idee njaji kjenaperritsa iwaopiakje ricó nanaitjá-carro cayoji Lrioma capisho wadee nanaitjaca maatsi. ¹⁰ Caidalritsa wa-Minalrio iomaca fa ima cayo poaca Lrinaitjaca yácoti oopi njite corrin Lrimatadaca pacada cádanaco pacaolre lrinacó, Lrinaitja cayo narso njaji shepacaperri lriaco, njaji yácoti Lricadaji warso. ¹¹ Piipitana kjaidadalri ikjaote, no-Minalri, Pjiyapeta pioyawa pjiomi nomatsicana. ¹² Nocaite pjimi kjaiterrica jliaji atsia ifiolri Dio iwana. Jliaji Iminalriti Lricananta caotsa coamperrica njaji lrirsolritsa lriniwanaca lrirsowao lrinaitjá-carro cayoji Lrioma capisho. ¹³ Matsia atsa lriofacawa jalredaoca lrico njite njaji lrinakjoite-perri icatsaotsa njaji irsolriotsa jliaji jiipai Nocaiterri narso. ¹⁴ Wa Minalri ikitsindajica njaji inaitjacape Lrirso matsia njite nacañjaca Lricapa njeepaca jliaji yácoti Lrinaitjalri pia naapiya. ¹⁵ Caidalritsa notatja Dio iinai lrikitsindatá-carro njoa, ima Lrimanacota caotja njoa matsidalri ioya. ¹⁶ Pidia noikjaolre, kjená picapaca njoa ima pada catsa njoa njite inonadalrica nocaolre. ¹⁷ Aima cayao pja njaji coyolrecalri nocaolre lricope; ajena Picadaca njorrapitaca. ¹⁸ Picapa coajica njorrapitaca njite coajica mapjica njoa; Pjiyapeta Pioyao nomatsicana. ¹⁹ Picapa coajica matsica nacapaca njoa njaji nocoema aimadan, matsidalrica jliaji narsolri nacaolre ricó nokjoete. ²⁰ Piwapa njoa njite Pjita njoa naoya; Macadatsa napirsetaca njoa, ima nocadaca nocaolre Pinaco. ²¹ Piwapa njoa no-Minalri ima corrin nocashataca Pjia njite nonaitjaca Pirso matsia; ima nocadaca nocaolre Pinaco. ²² Piyomjeta njaji Iraelnai naoya njaji jirrapitinaperri narso, Pjia no-Diote matsiadalri.