¹ Pjia nirri, picaite cadaa pjiacaotsa icaoña picodapidalri icoentoni lrirso jliaji iacada lripalratan lrirso, njite corricadanatsa piajinda cani, ² pinaitja catsa pirsowao matsidalri lrikjaote jliaji picaiterri njite pjiwacatsa iofawa lrisho jliaji matsidalri picaitendapinoma sho ³ Pimatsicaaca cádanaco piacosho-wacatsa, noenipe, picaite pia picaite picoadawa jliaji pimatadanda irso, niniwatsa matsiaca pjia lrioya jliaji pimatsicana. ⁴ Mamaoadacatsa lrioya jlajĩ yacotji nocaiterri pirso, corrin tsoca. ⁵ Pjiwacatsa yoma pirsowao yomjecalri cayojĩ yomje capisho njajĩ iwiniti naoya njajĩ iwinitacape. ⁶ Inodalrim, picapa picaowa coajica nadejĩca njajĩ piiti. Pinaitja cayo nacayosho, pioma pianjikjewa. ⁷ Corrin narso njewidapo mitsa inaacadana, corrin tsakja narso natalricanaa, ⁸ mitsa namatsieta naiñjaope camoi rico njite naniwa napania nawaketá carrona. ⁹ Inodalrim, ¿coshoda pja toatsa pimaaca? ¿Coshoda pjenaotsa caafi pjia pidaini ioya? ¹⁰ Lriaco jliajĩ inodalrim: ‘’kepinena njoa, njopa nocaapi nocoda naco nomáa-carro pjatoa.’’ ¹¹ Keyanaotsa kjenacalri iocaotsa pinaco cayoji keñaitedalri ioca capisho panaco, njite corriotsa cocá carroca itaita iyomjeta pjia lrioya. ¹² Apada inaiki matsitetsa, icamitsa lrajĩca lricashateta apjetsida. ¹³ Matsi capoa lricapa apada irso lrita lritji lrirso, lriwi lripoacani njite lriñjata tsakjan lricapi sho. ¹⁴ Lriwaopia lricaolre ricoite lrinaitjacarro matsi apada irso, njite lripeyo lricadaca nacoemaacacaowa njajĩ apjetsida. ¹⁵ Njite corri cadanacoatsa lriwada lrioca lrinaco njajĩ lrimatsicanatsa, njite corriotsa coca itaita idanataca lrioyana ¹⁶ Nini seida njajĩ marsiperri wa-Minalri icapaca, njite jliajĩ siete shopa, icatsa jliajĩ matsidalri pjatoa lricapaca irso. ¹⁷ Jliajĩ padalredalri apda icapao, cashadalri, iinocada inaiki mikjapantsaa, ¹⁸ Iwaopiacada matsi lricaolre rico lrinaitacarro matsi, yajĩcada icashatetaca kjeya, ¹⁹ Icashatacada apada naco mikjapantsa njite njajĩ icadacada apjetsida nainoacacao. ²⁰ Nirri, pjiepa pjinirri yaco njite mamacoadatatsa njajĩ pjidoa icananta shopa pjia. ²¹ Picada catjinani cayojĩ pacada capisho papatjepi pawedalrico, njite pimatsietani picaolre ricon ²² Njite a kjerrecawajle cada iawa njawatsa ikitsindatata sha; imáa cádanaco njatsaotsa ikitsindatata sha, njite icafia cádacoa njatsaotsa icananta sha. ²³ Ima camarraica warso jliajĩ Dios yaco, cayojĩ lampara sho, pjiomi njajĩ nacanantashopa pja icatsa njajĩ idecape pja jalredaoca mawayacacalri rco njajĩ yacotji icaitecape pamatsicana naco. ²⁴ Lridanataotsa pjia inarro macadadarrotsa ioya, njite rroya tsakja rsoajĩ inarro icaitecada yacoti macada-dalritsa . ²⁵ Makemitsa rsoajĩ inarro caidarro, macapajĩtsa rorso. ²⁶ Piomacapoa pimaaca roinai rsoajĩ inarro cawilredarro icaweñano lrisho jliajĩ piwentashopa piñjao iñjaodati, mitsa lridejĩ capoa apada ino nainocaotsani roikjaote. ²⁷ ¿Capanta apada atsia itaita ideca tiye lricoda naco njite corrinta lrimao lrisho? ²⁸ ¿Capjantja pada atsia itaita yeemanjicao tiyee lrico njite corrintja jliipa imacao? ²⁹ Caitsakja jliajĩ jiyapacada apee ino iapiya, lrirsotsa jlirrapitaca lricoada jliajĩ lrinaitalri. ³⁰ Njajĩ inaiki corrin matsi nacapa lrirso jliajĩ cañaitedari lriñaito capoa lriñjao caiwicadanaco lrirso mawitacai. ³¹ Mitsa njepacadani, nacada watsa lricaoña siete piapje jliajĩ lriñaitolri, atee lriaca pjiomi njajĩ cacoadaperri lrirsojĩ lriipana lrico. ³² Jliajĩ icawilretacada apada iino mawopiakje-dalrin cani; jliajĩ inaitjacada caidalri jliwacatsa imatadacawa. ³³ Lrirsotsa lrideeca jirrapitakjeti njite ipaimanti tsakja lrikjaote, njite jliajĩ lriacona corriwatsa lriñacawa lrioya. ³⁴ Jliajĩ ikerriakjeti lricada kerroaca jliajĩ atsia; corrin kjenaa lricapaca apada irso lrioma cádanaco lricoadao. ³⁵ Corrin jliipaca napjeya nacaoña shopani, corrin tsakja lricatimatacawa nasho njajĩ jlitajĩ macoadatsa.