¹ Njite Elifaz, jliaji temanita tairri shepani, lriaco lrirso: ² ''Apada ioma cádanaco caacoca piapiya, ¿capjaotsa picadaa caacoca pirsoni? Mitsa, ¿Cocaotsa itaita imacoitaca pjia wadee caacoca pjia? ³ Picapa, aima njaji picanantanji; aima tsakja njaji mjaidaperrimi pikjaidatanji. ⁴ Piaco sho pjirreta nawaopiakje njaji wadepe pienatsa jiwacawa, picadaa nemácarro kjaida tsenakjawa. ⁵ Mitsa panaya pjia cádanaco jirrapita, aima jirrapitinaperri pinaco; njite naikjaote inonaaca pjia. ⁶ Pjiomi naja inaiki nawaopia pinaitjaca matsia Dio irso, corridalritsa imatada Lrirso. Mitsa corrica ajádalrica jliaji pinaitjalri, ima corriketsa picadaa picaolre dio naco. ⁷ Pinaitja matsiacalri, piwaopia nanaco njaji: ¿Cocao jliaji jirrapitalri mikjapantsa? o ¿coancadanaco naino njaji inaitjcape matsia? ⁸ Ima cayoji nocapa capisho, njaji inaitjacape maatsi, inaitjacape imatsicanao, icatsa njaji jirrapitalrica icoadao. ⁹ Dio iwayaketa pjiomi njaji inaiki cayoperri, Lripjia catsa nanaco lrinocarrona ¹⁰ Lriwana cadaa kjaida jliaji yaawi, njite neenipe tsakja, icamitsa lriwayaketaca neetsa. ¹¹ Jliaji yaawi pekirritsa mayamicani corricapoa cawinini; niini napocotacawa macadatsa njaji lrienipe. ¹² Pada yacoti iocawa norso dawacalri ricotsa, njonacolrico jlimi padapena yacoti memáperritsa pjemica. ¹³ Njite nocapa nowaopiakje ricó deepi ricoena, ima pemaaca matsina pja inaiki. ¹⁴ Nofiowa deepi ricó njite ikena notetjecawa, njite kjema norso pjiomi noapi ricó. ¹⁵ Njite pada caolriti jiyapawa noecoa naco njite noiyo yemawa. ¹⁶ Jliaji caolriti lrirroa mananitsa, njite corrin notaita nocapa coanji-dalricani. Nocapa pada yemawa nopeyajle; maaco pjiomi, njite njomi apapeco yacoti njite lricaite norso cayoji: ¹⁷ ''¿Capja apada atsia mayamioda itaita matsia pjaca Dio ioya? ¿Capja ape atsia itaita mamatsicanatsa lrioya jliaji Inaitjacadani? ¹⁸ Corrin Dio icadaa icaolre nanaco njaji lrirsoperri njite lricapa coajica nanaitjaca namatsicanao njaji angelenai, ¹⁹ niini kjaida pja, lriwayaketana pawayaketa capisho camarrada iofacape panti ricó caalri dapana lrico, njaji yemalriwa jiipai naco. ²⁰ Piyompinaco nakjoite atee dainoma nacojle lriwayaketa pjiomina; mawayacawa piketem, njite corritsa coadacana coca irso. ²¹ ¿Capja corrica njeta lripanaita ioya njaji jaico napapishopa lripana poco? mayamina njite corrin naoketa narsowao nanjikjewa.