¹ Njaji israelnai yenipenai napieta tsenakja nanaitca maatsi wa-Minalri ipeyajle, Njite lricadana filisteonai icapirico cuarenta camoi. ² Ninipia apada atsia Zora-dalri, nakitsinda njaji Danitanai, lripitanapia Manoa, rsoaji lrino corim rotaita kewedancano nini corim kenipecano. ³ Jliaji wa Minalri iangeleni lrimotoa roikjalre rsoaji inarro njite lriaco rorso: ''Picapa, corim pitaita kewedanca pjia njite coritoa kenipeca pjia, mitsa kewedan watsa pjia njite jiico watsa pioya pienipe. ⁴ Niini picapa pioyawa wadee pirraca jaicotjeda capoanjai o iraodati capoanjai cadaa, njite mainjatsaotsa injaodati macadadalritsa. ⁵ Panayaotsa kewedanca pjia njite pjipaotsa pienipe atsiada. Corriotsa iyoa-carroca lritsicolre, ima jliaji yempeti Dio irsodalricani jlidoa iwawa-lrikjoite toa, ima jliawatsa imanacota njaji Iraelnai naoya njaji Filisteonai.'' ⁶ Njite rono rsoaji inarro roinirri iderse rocaite jlimi: ''Ape atsia Dio njité-dari imoto noderse njite cayoca lricapacanaa pada Dio iageleni-sho, niini nofioca lriiwana pekirritsa. Corrin notatja njomi kjaiteca lrino, corrin tsakja Lricaiteca norso lriipitana. ⁷ Niini Lriaco norso: ''¡Picapakje! kewedan watsa pjia njite jiico watsa pioya pienipe. Niini corrin pitaita pirraca jaicotjeda capoanjai o irraodati capoanjai, njite mainjatsaotsa injaodati macadadalritsa jliaji Moise idananda icaiteji maatsiperricatsana, ima Dio jienitandaca lrirsowao jliaji yempeti lriniita cádanaco ikjoetetsa piwawalrico atee kjerreca mayamini. ⁸ Ikena Manoa itatjaca Dio iinai, lriaco: ''Pjia no-Diote, pinaitja matsiacalri picadaa lrinoca waikjaolre jliaji atsia Pinakjoite dalri Pimenacanda, lricanantá-carro faa cocaca njaji warsolritsa wanaitjaca lriapiya jliaji kirraitalri jicolriotsa.'' ⁹ Njite Dio jiepa jliaji Manoa itatjalri lriinai, niini jliaji Dio iageleni imoto tsenakja roikjaolre rsoaji inarro rofaa cadaana awacadaapji rico. Mitsa corrin pacapa roinai jliaji roinirri Manoa. ¹⁰ Niini rsoecoca kjeya roinirri iderse rsoaji inarro, roaco lrirso: ''¡Picapakje! A tsenakja lrimoto noikjaolre jliaji atsia imotocaji noikjaolre meyamnaa!'' ¹¹ Niini Manoa jinico iawa lriino jiapodam. Lrioca cádanaco lriderse jliaji atsia, Manoa iaco lrirso: ''¿Icatsa pjia atsia caacolri pia noino irso?'' Njite jliepani, lriaco lrirso: ''Njoatsa.'' ¹² Njite Manoa iaco lrirso: ''Ajádalricaotsa warso njaji yacoti picaiterri. ¿Coajeotsa yacoti wataoña carro jliaji yempeti, njite cocaotsa lridejicalre?'' ¹³ Wa-Minalri iangeleni iaco Manoa irso: ''roshotsa ronaitjaca cajikjeta njaji nocaiteri rosho. ¹⁴ corim rotaita roinjaca jaicotjeda njite corim tsakjaotsa pidaca roiraca jacotjeda yanaa o iraodati capoanjai, corim tsakjaotsa picada roinjaca injaodati coridalri wataita wainjaca. roshotsa ronaitjaca pjiomi njaji nonalri ronaitjaca. ¹⁵ atsiacalri pioafapjatoawa , njite picadapjatoa wamatsietacaro cabra yenipena pisho. ¹⁶ Manoa ,iaco lriso lriaji waminalri iangeleni. pianaitja m ljiaji waminalri iangeleni lriaco Manoa irsho,nofacadantjawa coritsacjata noinjacaroni, mitsa pimatsietacada pada ofrenda pimjaitanda, picaite waminalri irshoni, ljiaji Manoa corim lriaji waminalri iangelencani. ¹⁷ Manoa iaco lrirso jliaji Dio iageleni: ''¿Cocao piipitana, wataitá-carroatsa wacaiteca pina coancaojli-kenaotsa lriocaca jlinaana jliaji picaiterri warso.'' ¹⁸ Njite Dio iageleni iaco lrirso: ¿Coadao pioma piajica noipitana? ¡Matsiadalri calretsa noipitana, corritsa pa piajii-carroca coanshodacan!'' ¹⁹ Njite Manoa jipa apana cabra ienipena nainaitsa njaji comaana ofrendawa lricadaa carrona wa-Minalri ialtarni naco. Niini jliaji Dio iageleni inaitja pada matsiadalri Manoa icapa cádanaco lriino yaapiya. ²⁰ Tiyee jirra cádanaco altar nakjoite eeno ikjaolre, jliaji Dio iageleni jirra tsakja lriinai jliaji tiyee imotolriwa altarnakjoite. Manoa icapa lriino yaapiya niini njewa naorsoao jiipai nacojle neecoa sho. ²¹ Njite-dlri jliaji Dio iageleni corrinatsa lripieta lrimotocawa Manoa icapao o lriino irsocan. Cayotsa Manoa iajíi Dio iageleni-cani jliaji nacapalri. ²² Manoa iaco lriino irso: ''Mayamicaotsa-pa faa, ima wacapaca Dio.'' ²³ Mitsa roaco rso lriino lrirso: '' Wa-Minalri ioma cadantja iinoca faa, corri piatsantja lricoadataca waoya jliaji ofrenda wamjaitanda lrirso njite nja comaana wají Lrirso. Corri piatsantja Lricadaa wacapaca njaji wacapalri, njite panayaapi corritsantja lricadaa femica njaji lricaiterri warso. ²⁴ Jliapodamina keenipena rsoaji iinarro pada atsiada, rocdaa lriipitana Sansón. Lritaoña jliaji yempeti njite Dio icadaa matsiadalri lrinaco. ²⁵ Wa-Minalri Icaolrini iinita icatjinaatacawa lrinaco jliaji yempeti Majané Dan rico, Zora njite Estaol ioyawaaca.