¹ Talricanaati Asuero jiawajli pia (Asuero italricanaata pia India ricjoite teeco jlinaa Etiopia ricojle, ciento vente yacaalre macacoepe naco), ² jalredaoca icoam, jliaji talricanaati Asuero lriofáa manao lrinaco jliaji lriofaa carroda lritalricanaata lriipana lrico cadaana dalri Susa ricó. ³ Njite madalriwalria kena lrishoca lritalricanaata cawa, lriwaketa njaji caconaaperri idenjicape lrisho njite njaji lrishóperri tsacja lrinja carro naapiya. Njite tsolrodaonai iapiyawanai Persia lricope njite Media tacja, talricanaatina caconaaperri njite njaji italricanaatacape njaji yacaalre macacoepe naofaa tsacja lriinai lripeyajle. ⁴ Ciento ochenta jalredaoca naco lricañjata nacapa nja lrinaani cacoadá perri, lrimatsiaca njite lrimacadalrica jliaji panti lritalricanaata carroda. ⁵ Ciento ochenta jalredaoca jiapodam, talricanaati Asuero iwaketa tsenacja pjiomi njaji inaiki Susa ricope, caaponaaperri njite njaji kjenaaperri tsacja lrinjá carro naapiya, lriofáa naapiya siete jalredaoca. Lriwakeetana talricanaati iyacalrecoa rico nincawa paniati dape. ⁶ Jliaji paniapjida talricanati dapana iyacalrecoa ricoda namatsieta nacapao yamacati nanaitjanda pjirrintsida-maka jaalredalri sho njite jipolré perri sho tsacja, njite napapina jeeriwai irraicjape matsiáperri sho, napapina nanacjoite njaji pacaapirro shoperri nanaitjaji palraatape nacjoite nerroetaji pantipje naco namatsietanda jiipada taarradalri jaalredalri. ⁷ Naa nairrao nairra carrodape rico owirrodape. Njite teecojlepe pia naoyawaca njaji nairra carrodape, njite aima pia nja jaicotjeda ianaa lriyadape catsa jli talricanaati lricadaalri nairrao matsia capoa naapoiya. ⁸ Njite nairra pia nja jaicotjeda ianaa cayotsa lricaite capisho jliaji yacoti nadananda talricanati rico: ''Corri pataita papiajletaca jiidati ricó.'' Jliaji talricanaati inaa pia nja idenjicape lrisho talricanaati dapana ricó pjiomi nacoadatá carro nja lriwananipe coca nacocatsa naoma nacoana cayoji naoma capisho. ⁹ Njite shoaji talricanati Vasti, rowakeeta tsacja nja inaitjepe ronja carro naapiya talricanati Asuero italricanaata cawa ricotsa. ¹⁰ Njite die jalredaoca nacó, juiwi cádanacoena lricaolre jli talricanaati jaico tjedaa iana lriirranda icjaote, lriaco Mehuman isho, Bitza isho, Harbona isho, Bigta isho, Abagta isho, Zetar isho, njite Carcas isho tsacja (njaji sietede atsianai idenjicaperri lrisho tsomíi lriofacawa rico), ¹¹ nadee carro lripeyajle shoaji talricanati Vasti pjiomi lriapiya jliaji corona talricanaati carrodano. Lrioma piatja lricadaa nacapaca romatsiaca nja caconaape idenjicape lrisho njite nja lrinaikite pjiomi, ima matsiadarro pia icapacanaa. ¹² Mitsa, sho talricanaati Vasti corri shoepa jli iacoti lrimenacanda rosho jli talricanaati nadeerri njaji sietede caconaaperri lrishoperri rosho. Niini kerroaca maatsinjajliaji talricanaati, jliajii lrima capisho tiyee ricó lridaki rico lriirroa ikjaote. ¹³ Niini jliaji talricanaati lritatja jlimiwa nainai njaji atsianai nanjinda canjiikje perrica, njaji ianjiicape jalredaoca naco (ima cayo manaca lrinaitjaca jliaji talricanaati nainai njaji ianjicape lrinaco jliaji iacoti ianjiicada panaco njite coan carro nanaitjaca). ¹⁴ Njite icatsa neepitanaca njaji idenjirri tsoomi talricanaati ioya: Carsena, Setar, Admata, Tarsis, Meres, Marsena njite Memucán, icatsa njaji sietede atsianai neenipe njaji talricanatinai persia lricope njite Media. Icaamitsa njaji itaitalri iacawa talricanaati iofaalri nirse njite icatsa njaji isholrica nja idenjikjeti jirrapitinaaperri pja talricanati dapana lrico. ¹⁵ Lriaco naasho: ''¿Coan lriaco jliaji iacoti ianjiicada panaco, ima shoaji talricanaati Vasti oopi romjepata jliaji iacoti nomeenacalri rosho nainai njaji caconaaperri noshoperri''? ¹⁶ Njite Mumucan iaco talricanaati ipjeya njite napjeya tsacja nja caconaaperri lrishoperri: ''Shoaji talricanaati Vasti corri jliacatsantja romjepata jli talricanaati Asuero, mitsa romjepata tsacja njaji caconaaperri iofaacape nerricoda nja yacaalre macacoepe lritalricanaatalri inaco jliaji talricanaati Asuero njite pjiomi njaji lrinaikitena tsacja. ¹⁷ Ima nacapaca naicawa njaji inaitjepe ronaitjalri sho talricanaati Vasti. Corriotsa njeepá carroca nainirri iaco. Nacaiteotsa cayoji: ''Talricanaati Asuero lrinaa pia nadee carro lriderse shoaji talricanaati Vasti, mitsa corrim shoepacan. ¹⁸ Njite lripeyatoa lriwayacacao jliadaa jalredaoca cajliaji, cayo tsacjaotsa nanaitjaca naninai njaji caaconaaperri Persia lricope njite Media tsacja jimicaperri ronaco shoaji talricanaati, cayoatsa nanaitjaca naninai njaji capecaconaaperri idenji talricanaati isho. Namjepataotsa naaco njite jorreotsa irroati nashowaaca.'' ¹⁹ Njite Memucan iaco pja talricanaati iso: Njite matsia cadaa pjimica, pjia talricanaati, pimeenaca iacoti, njite nadaná carro lrirroa napaperran ricó tsacja nja Persanai njite nja Meda tsacja corridalriotsa coca itaitantja iñeetacan coancaojlica, lricaitecawa corriketsa Vasti itaita inoca pipeyajle. Njite pjia talricanaati picadaotsa jliaji shoa cawa pia talricanaati apama isho matsiadarro pja rooya. ²⁰ Njite picadaa cádanacoatsa lriawa jliaji iacoti nanjíi carro pjiomi njaji inaiki lrimacaiteca naco jliaji jiipai pitalricanaatalri inaco, pjiomi njaji canirrinaiperri corriotsa mamacoadatá caotsa nainirri iaco, coshoca njaji caconaaperri njite njaji kjenaaperri.'' ²¹ Jliaji talricanaati Asuero njite neenipe njaji talricanaatinai napeyo njemica Memucan lricaitenda, niini jliaji talricanaati inaitja cayoji Memucan icaite capisho. ²² Lrimeenaca iacoti lridananda paperra lrico nasho pjiomi njaji yacaalre lritalricanaatalri inaco, coanca caacocana yacaalre icoam cayotsa lridanaca nasho. Lridana nasho njaa carro imeenaca naapana lrico nacoanaa nja atsianai. Jliaji iacoti lridana nasho naaco lricjoite yacaalre icoam lritalricanaatalri inaco.