¹ Njapodamjite njaji nanaitjalri, yaami keerroaca jliaji talricanaati Asuero, njite lriwaopia Vasti naco njite lrinaco jliaji ronaitjalri lrisho. Lriwaopia tsacja lrinaco jliaji iacoti nadánalri rocjoete. ² Njite njaji atsianai iempetipe toa idenjicape lrisho, naaco lrisho naomá carro inaitjepe matsiadarrope corri perritoa jiyapatoa atsia iapiya wa talricanaa isho. ³ Matsiamtja jliaji talricanaati, lri cadaa carromtja lrisoperri caconaaperri coshoca namaimaca nja yacaalre macacoepe lri ricodape jliaji jiipai lritalricanatacaawa ricó, nawakeetá carro pjiomi njaji inaitjepe iempetipetoa matsiadarrope nadee carrona napananaa Susa rico. Njite lricadaotsana Hegai icaapi ricona lriwapá carrona matsia. Hagai, icatsa jliaji caconaadalri idenjicada lrisho jliaji talricanaati, njite iwapacada nja inaitjepe njite iácada nasho nadataaca shopawa necoa nacó. ⁴ Njiteotsa coca cadaotsa lripeyo jliaji talricanaati nanacjoite njaji inaitjepe iempetipe toa lricadaotsa shoá carroatsa jimai talricanaati shoapodam shoaji Vasti. Njite njaji iacoti nacaiterri talricanaati isho matsiá jlimica, niini lrinaa nanaitjaca cayó. ⁵ Niini pia ape atsia yacaalre Susa rico lriipitana Mardoqueo, Jair irrí, Simei irrí, Cis irrí, Benjamín poco inacjoite dalri. ⁶ Jliaji talricanaati Nabucodonosor, Babilonia ricoda, ideepiani teeco jlipaite ioya pacoacatsa nainai njaji apjetsida lrikitsiñape njite Jeconias tsacja, Judá italricanaa. ⁷ Mardoqueo iwapapiaca sho Adasa, shoa minitsa Ester darro iipitana, jlinirri ikitsin iito, ima corri pienatsa rosho shonirri, shodoa tsacja. Shoaji iempetitoa apama iinarro matsiadarro icapacanaa njite matsiadalrica rodaki pjiomi. Mardoqueo itaoñano cayotsa lriito capishono. ⁸ Namotoeta cádanaco jliacoam jli talricanaati nadananda nanjíi carro, jorre nadeeca nja inaitjepe walridarropetoa talricanaati dapana lricojle Susa ricó. Njaji inaitjepe nacadaana Hegai iwapá carrona. Nadee tsacja sho Ester talricanaati dapana lricojle Hegai iwapá carro tsacjano, icapiatsa jliaji iwapacada njaji inaitjepe. ⁹ Njite Hegai matsiá icapaca Ester isho, njite tsacja ronaitjaca lrisho. Icamina lriaca rosho rodataacashopao lrikitsindatá carrono, njite lricadaa tsacja rosho roinjaope rocoawalreo. Lricadaa tsacja rosho icoadatacapeno siete atsianai talricanaati ishoperri idenjicape lrisho talricanaati dapana lricó, njite lricashetana pafe ricjle rofá carro nainai njaji iwapacapeno matsiawerrico pja naoya nja rokitsiñape atsaji napananáa iwawalricotsa. ¹⁰ Shoaji Ester corri piatsa rocaiteca nasho cjaité darrocano, cjaitenaica nja rokitsiñape, ima Mardoqueo icaite piacano wadee rocaiteca ronaikiva nasho. ¹¹ Jalredaoca icoam Mardoqueo iemaji manao paniapjida icoemjete padanajle lrisho jliaji inaitjepe dapana, lritatjá carro coakenano, njite lritatjá carro jlimio cocadaa lrioma lrianjíica roinai. ¹² Lrioca cádanacoena njenaana nacoana nja inaitjepe naacarro talricanaati Asuero icjaolre, ima nanaitjenina pjiomi jliaji naomalri nainai nja inaitjepe. Nacoanaa nja inaitjepe iempetipe toa nashopoia nawapaacacao doce keerri natapiacacao matsia carro nadaki; sei keerri natapiacao ketiajai mirrape sho, sei keerri tsacja pomeniajai sho njite nasho njaji necoa idaape sho tsacja. ¹³ Apama iinarro iempetitoa ia cadaa talricanaati ideshe, njite coca cadaa rooma, naa rosho nanacjoite njaji nashompe inaitjepe dapana lrico, rodee carro roofacawa sho iinarro talricanaati. ¹⁴ Shoewa mana dainomajle lrideshe, njite tjewaijle piyompinacoena rodiawa pada pana lricojle naofacawa tsacja nja inaitjepe, njite jliaji caaconaite tsolrodao Saazgaz, icatsa jli iwapacadana, jlia minitsa jliaji iwapacada nja inaitjepe talricanaati ininai. Njite corrinatsa rodiá carroketsa lriderse jliaji talricanaati tsenacja icaamitsa jlia cadaatsa iinai tsenacjano, matsia capoa lrianjiacacao roapiya. ¹⁵ Njite Ester jinaana iocacao roá carro shomao talricanaati ipeyajle, shoaji Mardoqueo itaoñanda lriito sho, jlinirri ikitsin Abihail iitom. Corritsa coca rotatja, icaamitsa ronaitja cayoji Hagai icaite capisho rosho, jliaji caaconaite idenjicada talricanaati isho, jliatsa jliaji iwapacada nja inaitjepe. Njite Matsiapjá nacapaca Ester isho pjiomi njaji icapacapeno. ¹⁶ Jliapodamjite, nadee Ester talricanaati ideshe lricapá carrono lrimaacawa lrico talricanaati dapana lricojle, die nacoda keerri lriipitana Tebet, siete oonia naco talricanaatacawan. ¹⁷ Jliaji talricanaati ipeyo pja shoaji Ester naoya nja pana inaitjepe, njite matsiá lricapacano pekirritsa naoya nja pana inaitjepe walridarrope, niini lricadaa talricanaati icoronan showida naco njite lricadaa shoá carroenacja talricanaati Vasti iarromtacao. ¹⁸ Jliaji talricanaati iwakeeta pjiomi njaji caaconaperri idenjicape lrisho njite njaji lrisoperri, lrinja carro nainai ''Ester iipitana naco,'' njite tsoopjatsa jlitaca naoya impuesto njaji yacaalre macacoepe. Lriá tsacja inaaniti macaoña canaapetsa talricanaati iipitana naco. ¹⁹ Njite, nawakeeta cádanaco tsenacja yamapia shopa nja inaitjepe walridarrope, Mardoqueo iofawa talricanaati ipananoma icodapi. ²⁰ Njite Ester corritoa rocaiteca rokitsiñape nacó o ronaikica naco cantja, cayotsa Mardoqueo icaite capisho rosho. Ronaitja minitsa cayoji lricaite capisho rosho, ima cayopiatsa shoepaca lriaco lritaoña cádanacono. ²¹ Jlia wajli pia, Mardoqueo iofáa cádanaco talricanaati ipananoma icodapi, yaame tsolrodaonai cacoaaperri iwapacape talricanaati ipananoma, Bigtán njite Tares, keerroana pekirritsa njite naoma nainoca jliaji talricanaati Asuero. ²² Njite Mardoqueo ioca cádanaco ianjíi nanaco nja yameede, lricaite shomi shoaji talricanati Ester, njite Ester icaite talricanaati isho Mardoqueo iipitana naco. ²³ Jliaji talricanaati ipinieta matsia jliaji iacoti njite lrianjíi ajadañrican, niini njaji yaame atsianai oopina napapi nerroa jaico nacó. Njite jliaji nanaitjalri nasho nadanani lri ricoda jliaji Papérra nadana cawa piomi talricanaati ipeyajle.