¹ Samuel icaite Saúl isho cayoji: "Dio imenaca njua nuniwana carro pjia talricanatio nanaco njaji yacalre Israel ricoperri. Panaya pjimi jliaji Wa Minalri icaitelri piso. ² Icatsa tsolrodaonai aimadan Talricana icaiterrica pisho jliaji: " Noajintsa jliaji Amalec inaitjalri Israel isho lridanata cadanaco inipo naoya njaji nonaikite aimadan, nano cadanaco Egipto ricjoite. ³ Panaya piawa njite píino jliaji Amalec njite piwayaketa pjiomi nashonda. Makjenacatsa picapacana, píinoatsa iamadape na, atsia njite inarro tsacja, iempetida njite kerraitale, buey njite oveja, camello njite burro. ⁴ Njite Saúl iwakeeta njaji inaiki aimadan yacaalre Telaim ricó lriniweetá carrona: Njite lriniweeta dociento mil tsianai iemawa, njite die mil atsianai Jodá inacjoite perri minitsa. ⁵ Njitedalri, Saúl ioawa yacaalre Amalec ricó lriwapá carrona pacuacaitacaawa rico jiipai. ⁶ Njite Saúl iaco nasho njaji Quenita ricóperri: ''Washa imoto iawa naoya njaji Amalecitanai, corricadaa ioma nowayakeetaca jia nainaitsa. Ima ikitsindata piaca njaji Iraelitanai nano cayao pia inipolrico namoto caojli pia Egipto ricjoite.'' Niini njaji Quenitanai namoto naawa teeco naoya njaji Amalecitanai. ⁷ Ikeena Saúl iawa nacjoete njaji amalecitanai lriinó carrona Avila nacjoite Shur nacojle, jeerri omoto keemjeteo Egipto isho. ⁸ Saúl jípa caafitsa Agag, Amalecitanai italricanaa; lriwayakeeta padeenirri njaji lricoema aimadan matseeta shó. ⁹ Saúl njite njaji inaiki aimadan corri naino jliaji talricanaati Agag, coshoca njaji na ovejan matsiaperri, na vacan nadenjeshopa, na vacan keepepe, na corderon tsacja. Pjiomi njaji matsiaperri nacapaca, corri nawayakeeta. Mitsa njaji corriperritsa matsiaca nacapa, njaji miperrimtsa nawayakeeta pjiomina. ¹⁰ Njite caacoca Diu Samuél isho, lriaco: ¹¹ ''Matsiatsantja corrica nocadaaca talricanaatí carró jliaji Saúl, ima opica jliena Nooya corricapoa lrinaitja cayoji nonaacapisho lrinaitjaca.'' Samuél jimi cádanaco njaji iacoti Diu icaiteri lrisho, iinona lricaolre pekirritsa, atee lriiyaca Diu isho deepjite. ¹² Samuél iawa deepi pjatoa lrioketaacá carro Saúl iapiya. Njite naaco Samuél isho: ''Saúl iawa Carmel ricojle, jlireeta nirse jiipada lriipitana nacó lriaconao carron, njite lridia lriorrocoa Gilal ricojle.'' ¹³ Samuél iocawa Saúl icjaolre, níini Saúl iaco Samuél isho: ''¡Matsiadalrica pjia wa Minalri icjaote! Nonaitjenina cayoji wa Minalri icaite capisho.'' ¹⁴ Samuél jiepani: ''¿Cocao tsacjao njaji oveja imaolrena njemirri nja njonacolrico, njite namaolrena nja vaaca nadenjishopa njomirri tsacja?'' ¹⁵ Njite Saúl jiepani: ''Nonaikite ideena, nayapem njaji Amalecitanai. Ima njaji inaiki aimadan nacadaa caafitsa njaji oveja, njite nja vaaca nadenjishopa matsiaperritsa nainó carró wa Minalri Diu Ishó. Njite nja paana oopi wawayekeeta matsiapé.'' ¹⁶ Niini Samuél iaco Saúl ishó: ''Piwapatoa, nocaiteotsa pjimi njaji iacoti wa Minalri icaiterri nosho opica deepi.'' Saúl jiepani: ''Picaite'.' ¹⁷ Samuel icaite pjaa: ''¿Tsoodalri sho pia picapaacacao, capja corripiaca pjia njewidaapo njaji Iraelnai? Diu jienitanda piaca pjia natalricanaa carro njaji Iraelnai; ¹⁸ Njite wa Minalri iaco pia pisho cayoji: '' Panaya piawa piwayakeetá carró njaji maatsíperri, njaji Amalecitanai, pinoaca nacjoete atee piwayakeeta matsiapena''. ¹⁹ Coada corrim pjiepa Diu iaco, coada pjipa nayaaropem njaji maatsiperri wa Minalri icapaca isho.'' ²⁰ Njite Saúl iaco Samuél isho: ''Njoepjen Diu iaco icaite capisho, noawa lrirricodatsa jliaji inipó Lrinaalri noacawa. Njopa jliaji Agag, Amalec italricanaa, njited nowayakeeta pjiomi njaji Amalecitanai. ²¹ Mitsa njaji inaiki aimadan njepa padapena nayaarro inacjoitepem, na ovejan, vaaca nadenjishopa, nayaarom matsiaperri inacjoitepe pawayakeetaope, wainó carró wa Minalri Diu isho Gilgal ricó.'' ²² Njite Samuél jiepani: ''¿Capja wa Minalri ijoitaca pjaacawa nasho njaji maaficalri painoji njite pamjaitaji lrisho lrioya jliaji pjeepacadaa coanca lrinaa panaitjaca? Matsia pjaa wa Minalri isho pjepacadaa lriaco lrioya jliaji maaficalri painonda lrisho, pjemicadaa lriaco, matsia pjaa lrioya jliaji maaficalri pamjaitanda iwayacao matsia. ²³ Pacoaca malriirrinai imatsicanaa shoca jliaji iemacada Diu inaacalre icjoete, njite njaji imjepatacape lriaco, pacoaca namatsicanaa nacayoshó njaji ipeyocape idolo. Piménata capoa Diu iaco, Lrimeenata tsacja pjia corri carroenatsa talricanaatica pjia.'' ²⁴ Njite Saúl iaco Samuél isho: ''Noanjintsa nonaitjaca maatsi; ima nomjeepataca no Minalri inaacalre, njaji picaiterri nosho, nofió capoa naiwana njaji inaiki nonaitja cayoji nanaa capisho nonaitjaca. ²⁵ Panaya, pinaitja nosho matsiacalri, picadaa jliyapaca pioya jliaji nonaitjanda maatsi, njite pino noinai notaitá carro noaca matsiadalri wa Minalri ishó.'' ²⁶ Samuél iaco Saúl isho: ''Corrinatsa nodiá carroca piinai; piménata capoa wa Minalri iaco, Njite wa Minalri imenata pjia corri carroenatsa Iraelnai italricanaaca pjia.'' ²⁷ Samuél icaboco cádanaco lridiá carró lrioya, Saúl jipaacawa lriitacashopao lrinaconda naco njite tserrencani. ²⁸ Niini Samuél iaco lrisho: '' Jliadaaca jliaji, wa MINALRI jitaca pioya pitalricanaatacawa Irael nacó, lriá carro pada isho matsiadalri pjaa pioya. ²⁹ Njite jliaji icadaacada Irael jiidao corri lricashataca, corri tsacja lripadameetaca lriwaopiakje; ima corri catsa atsiacani Lripadameetá carromtja liwaopiakje.'' ³⁰ Njite Saúl iaco Samuél isho: ''Noanjintsa nonaitjaca maatsi, pinaitja nosho matsiacalri mapaimanietatsa njoa napeyajle njaji inaiki aimadan njite njaji caconaaperri Irael ricópe. Pino noinai noacarro matsiadalri Diu isho.'' ³¹ Nini Samuél iawa Saúl jiapodam njite liá matsiadalri Diu isho. ³² Samuél iaco nashó: ''Idee nosho jliaji Agag Amalecitanai italricanaa.'' Agag ioca lriicjaolre lripapí rico tsipalracjape, catiima, lriaco Samuél isho: Opinapa piirroa jiyapawa piomacawa piinoca njoa.'' ³³ Njite Samuél jiepani: ''Pimatseetan sho picadaa jorre njadoanai meenipem, panaya pishotsa mayamica pjia picadaa carró meenipe sho pjidoa. Ikeena Samuél iyoaca pjepadapem jli Agag Diu ipeyajle Gilgal ricó. ³⁴ Samuel iawa ramá ricojle, njite Saúl idiawa lriipana lricojle Guibéa ricó. ³⁵ Njité dalri corrinatsa Samuel idia pia icapa Saúl. iinona Samuel icaolre Saúl icjaote caidalritsa. Njite pia caiwi Diu icaolre ricó lricadaa capoa Saúl Irael italricanaawa.