¹ Niuki kani hɨkɨtɨkaitɨni tiuyu tsutɨatsie paɨna ta niuki kakaɨyari hatsɨa kanaye miemetɨkaitɨni paɨna niuki kakaɨyari kani hɨkɨtɨkaitɨni. ² Kakaɨyari hatsɨa ikɨ paɨ puti anekai tiu tsutɨarietsie. ³ Mɨkɨ paɨ tinake eriekaku naitɨ ti xuawe katiniuti wewiyani, paɨna tixaɨ kwatiuta wewiya tita muti xuawe xɨka mɨkɨ. ⁴ Mɨkɨ hetsie tukari kanayemiemetɨkaitɨni paɨna mɨkɨ tukari naitɨ kwiepa memutama wa xawatɨriya kani hɨkɨtɨkaitɨni. ⁵ Yɨxakɨta xawatɨriya mu metsike paɨna mɨkɨ kwa ita yuniyaxɨ. ⁶ Xeitɨ uki kaniuti neni kakaɨyari nɨ'arieya, Juan katinitewakaitɨni. ⁷ Mɨkɨ kani nuani tita xatake mɨkɨ xawatɨriya hetsie ti mieme, mɨkɨta naitɨ yuri meteta erienikɨ me'i enieme mɨkɨ. ⁸ Xawatɨriya juan ka hɨkɨtɨkai, mɨkɨta mu nua xawatɨriya hepaɨsta tita xatake. ⁹ Yurikɨ mɨkɨ xawatɨriya kani hɨkɨtɨkaitɨni, naime kwiepa memu tama kani wa xawatɨriyani, ena kwiepa kani nuaximeni. ¹⁰ Mɨkɨ kwiepa kaniu yeikakaitɨ paɨna mɨkɨ yati nake'eriekaku kwie kaniuta wewiyani paɨnata mɨkɨ kwiepa memutama mekwa heiti'ma. ¹¹ Yu iwama wa hatsɨa mu nua, iwamamata mekwa'ita neke'eri. ¹² Merikɨtsɨ ke'ane memita neke'eri, ke'ane yurikɨ hetsiena mete'uta eri, mɨkɨ katinanu pitɨani kakaɨyari niwemama mema kɨne'kɨ. ¹³ Xuriyatsie mɨkɨ mekwa'uti nɨiwaxɨ, paɨna ta waiyari paɨti nake'eriekaku ya kwatiɨ'yɨ, ya'i xeitɨ tewi, pɨta kakaɨyari. ¹⁴ Mɨkɨta niuki wai kanayuyeitɨani paɨna mɨkɨ ta tsata kaniu yeikakaitɨni. Tekani xeiya kemutiuyu hekɨkɨare, kemutiuyu hekɨkɨare xɨka mɨkɨ xeikɨa kakaɨyari hatsɨa heyeyani, yurikɨ paɨna hekɨariyakɨ hɨnetɨ. ¹⁵ Juan katiniuta xata naime mɨkɨ hetsie timieme ipaɨ haitɨ a yeyeuretɨ: "Ke'anetsie mieme ne tiku xaxatakai ikɨ kani hɨkɨtɨni: 'Ke'ane ne utɨa mamie waɨkawa maxi kani tɨrɨkaɨyeni, ne neka'uyeikakaku mɨkɨ kaniu yeikakaitɨniri.'" ¹⁶ Teyu naitɨ tete'anu pine mɨkɨ mɨ hɨnetsie nenimayatsika hetsie nenimayatsika. ¹⁷ Mɨkɨ nɨ'ari muta tuiya moises hetsie. Nenimayatsika paɨna yuritsie ti mieme Jesucristo hetsie kani nuini. ¹⁸ Hatsuaku xeitɨ tewi kakaɨyari kwa xeiyawe. Kakaɨyari yɨ xaɨta niweya, ke'ane yu yeu aurie maka, mɨkɨ hetsiena mieme katinuita xata. ¹⁹ Hikɨta ikɨ kani hɨkɨtɨni juan kemuranayetɨa kepauku judiostsixi hatsɨana mewareye nɨ'a sacerdotes paɨna levitas Jerusalen paitɨ mewareyenɨ'a memita iwawiyakɨ mɨkɨ: "Ke'ane pepɨ hɨkɨ?" ²⁰ Mɨkɨ yatiwaruta'hɨawixɨ tixaɨ kwati'kana pɨta kani waruta'eiya: "Ne Cristo ne kwa hɨkɨ." ²¹ ya umieme mɨkɨmexi menita'iwawiya: "Merikɨtsɨ ekɨ tita peti hɨkɨ? Elias peti hɨkɨ?" Mɨkɨta niuta yɨni: "ne nekwa hɨkɨ." Mɨkɨmexita meniuti yuani: "Profeta ekɨ peti'hɨkɨ?" Mɨkɨta waruta'ei: "Hawaikɨ." ²² Merikɨtsɨ mɨkɨmexi metenita hɨawe: "Ke'ane pepɨhɨkɨ ekɨ? Ya tetewareta hɨawekɨ ke'ane metatse heyenɨ'a. Ke pehaine a hetsie mieme?" ²³ Mɨkɨ niuta yɨni: Ne nekani hɨkɨtɨni xatsika, ma hiwa makumawitsie uyeikatɨ: 'Ta'ukiyari huyeya xekene xɨtseriyani', kepaɨ mɨkɨ profeta Isaias muta'yɨ." ²⁴ Mɨkɨmexi ke'ane memenɨ'ariekai fariseostsixi wa hatsɨa mekani miemetexitɨkaitɨni. ²⁵ Me nita iwawiya mɨkɨmexi paɨna mete nita hɨawe: "Xɨka Cristo ya'i Elias ya'i profeta peka hɨkɨtɨni, titakɨta petiwaruka'ɨya?" ²⁶ Kaniwaruta'eiya Juan ipaɨ tiwara hɨawetɨ: "Ne hakɨ nepuwaruka'ɨya. ²⁷ Merikɨtsɨ xeitɨ xe tsata kaniu yeikani xeme xeka'i mate;mɨkɨ ne'utɨa kana mieni, ne nekwa'anu pitɨarie kakaiya sikere nemɨ xɨnakɨ. ²⁸ "Kewa Juan tiuka hɨyakai, Betania naitɨ ikɨ yakatiniɨ yɨni Jordan akiyaritsie anɨtaɨye paitɨ. ²⁹ Uxa'arieka, Juan kaniu xeiya Jesus hatsɨana amiekame paɨta niuta yɨni: "Memɨ, ma kaniu weni kakaɨyari muxaya mɨkɨ kwiepa memutama wa xɨrikiya kani wata nawairiwani! ³⁰ Ikɨ'iya ne nekani xatakaitɨni: 'Ke'ane ne utɨa mamie waɨkawa maxi kataye akani, mɨkɨ kani hɨkɨtɨkaitɨni ne kuxi neka'uyeikakaku.' ³¹ Ne nekwa'i maikai, ya'umiemekɨ ne hakɨ xeikɨa nekaniwaruka'ɨyakaitɨni mɨkɨ Israel memuta hekɨatsiyarienikɨ." ³² Juan katinuita xata ipaɨ haitɨ: "Espiritu ne nekaniu xeiya yuawitsie wakamiekame kukuru hapaɨ anetɨ paɨnata heimana kana yarɨ. ³³ Ne nekwa'i maiwekai mɨkɨ, perotsɨ ke'ane netseheyenɨ'a hakɨ newaka ɨyanikɨ paɨ ne tiniuta hɨawe: 'Ke'ane hetsie pemi xeiya Espiritu wakamiekame paɨna hetsiena ma yarɨ, mɨkɨ kani hɨkɨtɨni ke'ane Espiritu santotsie waka'ɨya.' ³⁴ ne nekani xeiya paɨna hetsiena ti mieme netiniuta xata kename ikɨ kakaɨyari niweya hɨkɨ." ³⁵ Uxa'arieka tarieka mexi Juan hutame yu discipulos wa matɨa ma uwekaku, ³⁶ Jesus mekaniu xeiya ma'uye miekame, ipaɨta Juan niuta yɨni: "Neuxei kakaɨyari muxaya!" ³⁷ Mɨkɨ meyu hutatɨ discipulo mama meni enieni yamutayɨtsie paɨnata Jesus menanuku weiya. ³⁸ Merikɨtsɨ Jesus ta'aurie aweka kani waru xeiya memiweiyakai ipaɨta tiniwaruta hɨawe: "Tita xete hauye hɨwa?" Mikɨta meteniuta'ani: "Rabi ('ti'ɨkitame' ikɨ tɨtɨ kananɨ yɨneni), kewa pepeye axe?" ³⁹ Katiniwaruta hɨaweta mɨkɨ: "Xena kɨneka xekeneu nieri." Mɨkɨta me'u axɨaka kewa meye axekai; hora decima maye aximekaikɨri, ana hatsɨana meniuyu hayewa mɨkɨ. ⁴⁰ Meyu hutatɨ memu'enana Juan kemutiu'xa paɨnata Jesus memanukuwei Andres xeitɨ katini tewaka, Simon Pedro iwaya. ⁴¹ Mɨkɨ meri yu iwa Simon uka xeiyaka katinita hɨawe: "Mesias teka neka xeiya" (Cristo tɨtɨ ikɨ kananɨ yɨneni). ⁴² Mɨkɨ kani atɨani Jesus hatsɨa. i xeiyaka Jesus tinita hɨawe: "Simon ekɨ peti hɨkɨ, Juan niweya. Cefas ekɨ petinita terɨwariemɨkɨ" (Pedro tɨtɨ ikɨ kananɨyɨneni). ⁴³ Uxa'ariekata kepauku Jesus Galilea muyemiekaitsie, Felipe kaniuka xeiya "Kenenanuku weiya" katinita hɨawe. ⁴⁴ Felipe Betzaida kani kiekametɨkaitɨni, Andres paɨna Pedro wa kiekaritsie. ⁴⁵ Felipe ipaɨ katinita hɨawe Natanael uka xeiyaka: "Tame tekeneika xeiya, ke'ane hetsie mieme nɨ'aritsie mete haka'utɨa Moises paɨna profetatsixi: Jesus kani hɨkɨtɨni Jose niweya Nazaret kiekame." ⁴⁶ Natanaelta tinita hɨawe: "Nazaret kiekariyaritsie aɨmɨ tixaɨ aixɨ ti anetɨ raye newe?" Felipeta tinita hɨawe: "Kena yaka keneu nieri." ⁴⁷ Jesus kaniu xeiya Natanael hatsɨana maye aximekai mɨkɨta hetsiena mieme paɨ niuta yɨni: "Neuxei xeitɨ yuri israelita, tixaɨ itarika hetsiena katika tse'e!" ⁴⁸ Natanaelta tinita hɨawe: "Kepaɨtɨkakuta ekɨ penes mate?" Jesus mita'ei ipaɨ tita hɨawixɨ: "Felipe kuxi ka'atsi tahɨawiwekaku, kepauku xapatɨa pemayekateitsie, ne ne'atsi'uxei." ⁴⁹ Natanaelta tiuta'a: "Rabi, kakaɨyari niweya ekɨ pepɨhɨkɨ! ekɨ Israel itsɨkameya pepɨhɨkɨ!" ⁵⁰ Jesusta tiu'a paɨta niuta yɨni: "Yuri petiuta eri, xapatɨ pe'aye kaikame ne atsi'u xei, ne'a tiuta hɨawixɨkɨ? Waɨkawa maxi petini xeiyamɨkɨ ke'ikɨ." ⁵¹ Paɨ mɨkɨ niuta yɨni:"Yurikɨ nexera hɨawe, mu yuawi hau yepiekame xeme xekani xeiyamɨkɨ paɨna uki niweya hetsie kakaɨyari angelesya mewaka kɨkame paɨna me anuti kɨkame."