¹ Aekonojjae pitsapaina baupayabetsina Booz ekojopa ajarajota. Be epijiyo, Booz pepo pijamondenü ajaraponü yabara pejumaitsinü na imojjoyota. Booz jumaitsi: "najatsia, tajamonaenü na ekatabare." Ajara pa pebi na imojjoyota na ekojopa. ² Nejjata Booz junatana petinitonüanü Diez 10 ponübeje tomara, jumaitsi "jota pa enareje." Ajarapamonae enojopa. ³ Booz jumaitsi imojjoyo pijamanaenü jawabelia; "Noemi, penawiatsiwa Moab nakuajawerena, kanajetaponapona pija parcela ira wajamonaenü Emilu pijawami. ⁴ JJanü najamatabü jjainajü takatsipaebijawa: komuare pamonae pe enaewi jotaje pitabünejewa, pijinatomara pija petirowi pitabünejewa. Itsa jamatabü komuatame, Komuane. Itsa apo komuatiji tsipaemü, aejumatsimure nejjata, yapütaje tsianü, "jjamü komuatsianajü." ⁵ Nejjata Booz jumaitsi: pa matakabi Noemi pekobe werena pabi komuatsiname, yajawa Ruth moabitawa pitsianame pamona pe wekua tüpaewatsi. ⁶ Nejjata mojjoyo pijamonaenü jumaitsi: "jjanü ayapübejeta romuatsija jjanü nejja, tabijianae yeneda jjuabaja jjaunaju jjamü Komurae nijjawa nejja, jjanü neto ayapübeje ta komuatsinejja. ⁷ Jjua ramaje bajayatamije pijakuene Israel tomarataje pakujinae komüatijiyia pijamonae pekobekowujawa, pe nawijatsinejja ata pekobekowujanlana. Pe nawijatsijawata itsajü tejema jewa ata, Pe natajjujjatatsi jawa natujjujonota rajuta itsajiwiyo jowabelia, pakuenia najumetaneje pe jjania jaijawa Israel jawata. ⁸ Booz pijamonaenü imojjoyo jumaitsi: "konuare jjanünejja" penetojju jjatetsijawa, natajjujonoto. ⁹ Nejjata Booz jumaitsi pepiritonü yajawa dajjita jiwi jawabelia: "pajjamü rabaja pataneme ajena ta komuatsi kuene Noemi pekobeta dajjita Quelión, Mahlón: pijajawani. ¹⁰ Ruth moabitawa yabara, Mahlón pijawami: jjanü pitsianajü ta barü ponaponaewa nejja, jjanü pewünü tamatakotsi nejja petüpaenü pekobekowujawa, pewunü pe wererekae yenewa peyapijiwita, pajjamü pajumetane ajena pa baupa jotaje. ¹¹ Dajjita jiwi baupata penübenaewi, petiritowi yajawa jumaitsi: " pajjanü pajumetaniji." Diosonü ejjanae pejonewa nija bo ta pakuenia itsi Raquel, Lea jawabeliata. Powabeje nakueneba beje Israel pija bo. Ne ayainü nejja Efrata jota pa kuenia newunua Belen jota. ¹² Nijabo be Fares pijabo tsane, pakuenia Tamar itajüta Judá, pe itajübi kuenia Diosonü karajutsiana pa pejanawataje. ¹³ Booz pita Rut jawabelia. Pijawa ejjana. Ajara ponü, ajarapowa itajüta penakueto. ¹⁴ Petiriawi Noemi jawabelia jumaitsi "benditonü raja Diosonü, ajena apo kakopatsi nijamonaenü nejawa, pa nakuetoyojo. Newünü jonewa tsane Israel jota. ¹⁵ Jjamü nejja ajaraponü kajamatabü kuene asaü ejjanaena, kayawenonaena nenawerotsiwata, nekopeneyo aitsi, bitso pekajitsipaewa, jjamü nejja ajarapowa siete 7 pajiwi beje matatojjenetsia namatamata, Itaüta eweta ajaraponüyo. ¹⁶ Nejjata Noemi pita penakueto, pemibatota buata eweta ajaraponüyo. ¹⁷ Imojjoyo pejinawanapae wanü wünü ruba, jumaitsi: pejjünato to naitajütatsi Noemi. Ajarapowanü wünüruba Obed. Ajara ponü pajjami Isaí, David pajja. ¹⁸ Aekonojjae, mamonaeje Fares pejjije Fares pajjaje Hezrón. ¹⁹ Hezrón pajjami Ram, Ram Pajjami Aminadab, ²⁰ Aminadab pajjami Naasón, Naasón pajjami Salmón, ²¹ Salmón pajjami Booz, Booz pajjami Obed, ²² Obed pajjami Isaí, Isaí pajjami David.