¹ Así que, meus irmáns, amados e arelados, gozo e coroa miña, estade así firmes no Señor, meus amados. ² Rogo a Evodia e a Síntique que sexan do mesmo sentir no Señor. ³ Tamén che pido a ti, fiel compañeiro, que as axudes xa que compartiron as miñas loitas por mor do evanxeo, xunta Clemente e os demais colaboradores meus, que teñen os seus nomes no libro da vida. ⁴ Alegrádevos no Señor sempre. Repítovolo: Alegrádevos! ⁵ Que todas as persoas saiban da vosa bondade. O Señor está preto. ⁶ Por nada esteades anguriados; senón mais ben, dade a coñecer as vosas peticións diante de Deus mediante oración e súplica con acción de grazas en todo. ⁷ E a paz de Deus, que supera todo entendimento, gardará os vosos corazóns e as vosas mentes en Cristo Xesús. ⁸ Polo demais, irmáns, todo o que é verdadeiro, todo o honesto, todo o xusto, todo o puro, todo o amable, todo o que sexa de bo nome, se hai algunha virtude ou algo que merece gabanza, nisto pensade. ⁹ Practicade o que aprendestes e recibistes e ouvistes e vistes en min, e o Deus de paz estará convosco. ¹⁰ Moito me alegei no Señor de que por fin reavivastes o voso interese por min, %que xa o tiñades mais vos faltaba a oportunidade de demostralo. ¹¹ Non o digo porque teña necesidade, xa que aprendín a estar satisfeito co que teño. ¹² Sei vivir na pobreza e sei vivir na prosperidade, en todo e por todo aprendín tanto a estar farto como a pasar fame, a ter dabondo como a padecer necesidade, en todo aprendín o segredo: ¹³ para todo teño forza naquel que me da o poder! ¹⁴ Con todo, fixestes ben en compartir comigo na miña aflición. ¹⁵ E vós mesmos, filipenses, tamén sabedes que ao comezo do evanxeo, despois que saín de Macedonia, ningunha igrexa compartiu comigo no tocante a dar e recibir, senón só vós; ¹⁶ porque tamén a Tesalónica enviastes máis dunha vez para as miñas necesidades. ¹⁷ Non é que ande atrás do que me dades, senón que procuro froito que abunde na vosa conta. ¹⁸ Deste xeito recibín todo e teño de todo con fartura; tendo recibido de Epafrodito o que me enviastes, estou fornecido: recendo agradable, sacrificio aceptable, que prace a Deus. ¹⁹ Meu Deus cubrirá tódalas vosas necesidades, conforme a súa riqueza en gloria en Cristo Xesús. ²⁰ Gloria sexa o noso Deus e Pai por sempre. Amén. ²¹ Saudade a todos os santos en Cristo Xesús. Saúdanvos os irmáns que están comigo. ²² Todos os santos vos saudan, especialmente os da casa de César. ²³ A graza do Señor Xesús Cristo sexa co voso espírito.