¹ Irmáns, se algún de vós é descuberto facendo o que non debe, vós que sodes espirituais restaurádeo con dozura. Coidándote de non acabar caendo ti no mesmo. ² Levade uns as cargas dos outros e así cumpriredes a lei de Cristo.. ³ Porque se alguén cre ser máis do que é, a si mesmo se engana. ⁴ Cada un que reflexione sobre as súas propias obras, e daquela terá motivo de estar satisfeito de si mesmo sen mirar aos outros. ⁵ Porque cada un levará cadansúa carga. ⁶ A quen se lle ensine sobre a palabra, que comparta toda cousa boa con quen lle ensina. ⁷ Non vos levedes a engano. De Deus non vos podedes burlar, aquilo que sementedes, iso mesmo recolleredes. ⁸ Porque o que sementa para a súa propia carne, segará destrución. E o que sementa para o Espírito, do Espírito colleitará vida eterna. ⁹ Non nos fartemos de facer o ben, porque ao seu debido tempo segaremos, se non desfalecemos. ¹⁰ Porén, non perdamos a oportunidade de facer ben a todos, especialmente aos da familia da fe. ¹¹ Ollade as grandes letras que vos escribo da miña man. ¹² Todos os que queren quedar ben na carne, fórzanvos a que vos circuncidedes co fin de non ser perseguidos pola causa da cruz de Cristo. ¹³ Porque nen aínda eles cumpren a lei, pero queren gabarse da vosa propia circuncisión. ¹⁴ Pero que non veña eu gabarme en cousa algunha agás na cruz de Cristo, pola que o mundo foi crucificado para min e eu para o mundo. ¹⁵ Porque de pouco vale circuncidarse ou non, senón ser unha nova creación. ¹⁶ E os que vivan segundo esta norma, graza e paz a eles e ao Israel de Deus. ¹⁷ De aquí en diante que ningén me veña amolar con estos asuntos, pois levo no meu corpo as marcas de Xesús. ¹⁸ Irmáns, que a graza do noso Señor Xesús Cristo sexa co voso espírito. Amén.