¹ وعلى هاذا يا خاوتي نطلب منكم و نترجاكم في الرب يسوع المسيح, باه تزيدوا تكملوا في السيرة تاعكم كيما تعلمتوا منّا و كيما لازم و ترضَيوْ الله اكثر و اكثر. ² و انتوما تعرفوا الوصايا اللي مدينالكم في الرب يسوع. ³ على خاطر هاذا واش يحب ربي: القداسة تاعكم. تمنعوا ارواحكم من الزنا, ⁴ و كل واحد منكم يعرف كيفاه يصون جسمو بقداسة وكرامة, ⁵ و ما يخليش الشهوة تاع الوثنيين اللي ما يعرفوش الله تسيطر عليه, ⁶ و واحد ما يتعدى على خوه و الا يطمع فيه في هاذا الامر, على خاطر الله ينتقم من جميع هاذي لحوايج كيما قلنالكم من قبل و شهدنا بيه. ⁷ على خاطر ربي ما دعاناش للنجاسة بالصح دعانا للقداسة. ⁸ و اللي يرفض هاذا التعليم ما هوش يرفض انسان, بالصح يرفض الله بذاتو اللي مد لنا ثاني الروح تاعو القدوس. ⁹ و اما لمحبة بين الخاوة مانيش محتاج نكتب لكم عليها, على خاطر انتوما من عند ربي تعرفوا كيفاه تحبوا بعضاكم. ¹⁰ و هاذا الشيء اللي راكم تعملوا فيه للخاوة الكل اللي في مكدونية كاملة. ونطلب منكم تزيدوا منها اكثر و اكثر, و ¹¹ احرصوا باه تعيشوا في هدوء, و كل واحد يهتم بامورو الخاصة, و تكسبوا رزقكم بعرق جبينكم كيما وصيناكم, ¹² باه تكون سيرتكم مليحة قدام الناس اللي خارج لكنيسية, و ما تكونوش محتاجين لحتى واحد. الرجوع تاع الرب ¹³ ما ذابيا يا خاوتي ما يخفاش عليكم هاذا الامر من جيهة اللي ماتوا, باه ما تحزنوش كيما لخرين اللي ما عندهمش رجاء. ¹⁴ على خاطر اذا كنا نامنوا باللي يسوع مات و قام من الموت, هكذاك حتى اللي ماتوا و هما في يسوع, الله راح يقوَّمهم همّا ثاني معاه. ¹⁵ انا نقول لكم هاذا بكلمة الرب: باللي احنا اللي ما زلنا حيين حتى يجي الرب يسوع المسيح, ما نسبقوش اللي ميتين. ¹⁶ على خاطر ربي في ذاتو في وسط الهتاف, و بصوت رايس لملايكات و البوق تاع الله, راح ينزل من السماء و اللي ماتوا في المسيح همّا اللي راح يقوموا لولين. ¹⁷ و من بعد احنا الباقيين كلنا نتخطفوا معاهم في السحاب باه نلاقيو الرب في لهواء, و هكا نكونوا في كل وقت معاه. ¹⁸ على هاذا شجعوا بعضاكم بهاذا لكلام.