¹ من عند بطرس الرسول تاع المسيح يسوع, للمتغربين و المشتتين في بنتس و غلاطية و كبدوكية و اسيا و بيثينية, المختارين من عند الله ² اللي خايرهم الله الآب من قبل و هو العالم بكل شيء, و قدّسهم بالروح باه يطيعوا يسوع المسيح, و رش عليهم الدّم تاعو: ليكم نعمة فايضة و سلام كبير. نحمدوا الله على الرجاء الحي ³ تبارك الله الاب ابو ربنا يسوع المسيح, اللي بالرحمة تاعو لكبيرة ولدنا مرة اخرى في رجاء حي, بالقيامة تاع يسوع المسيح من بين الموتى, ⁴ و لورثة ما تفناش و ما تزولش و ماتفسدش, اللي مخبية في السماوات على جالكم, ⁵ انتوما اللي بالايمان القدرة تاع الله تعس عليكم, للخلاص اللي راح يظهر في اخر الزمان. ⁶ اللي تفرحوا بيه, حتى و اذا انتوما اليوم - اذا كان لابد منو- راح تحزنوا شوية وقت بمحاين متنوعة, ⁷ اللي بيها يتزكى الايمان تاعكم, كيما يعدي الذهب في النار, و ايمانكم اغلى من الذهب الفاني, راح يكون شرف و كرامة و جاه نهار اللي يظهر فيه ربنا يسوع المسيح, ⁸ اللى تحبوه بلا ما شفتوه. و حتى اذا كنتوا ما تشوفوهش بالصح تامنوا بيه, و انتوما فرحانين بفرحة مجيدة ما تتوصفش, ⁹ حتى ن توصلوا نتالوا غاية ايمانكم وهي خلاص نفوسكم. ¹⁰ هذا الخلاص اللي حوسوا و فركتوا عليه لنبياء, و تنبأوا بالنعمة اللي نلتوها انتم اليوم. ¹¹ وحبّوا يعرفوا وقتاه و كيفاه راح تجي هاذي النعمة اللي دلّهم عليها الروح تاع المسيح اللي فيهم, كي شهد لهم في هاذاك الوقت على الاوجاع اللي راح يقاسيها المسيح و الامجاد اللي راح تجي من وراها. ¹² اللي تكشفت لهم موش على جالهم همّا, بالصح كانوا يخدموا فيكم انتوما, بهاذي الامور اللي بينها لكم اليوم واللي وصلتكم لبشارة عليها في الروح القدس المبعوث من السماء. اللي حتى لملايكة تتمنى تشوفها. كونوا قديسين ¹³ على هاذا حلوا مخاخكم مليح و اتولهوا, و اجعلوا رجاكم الكل على النعمة اللي راح تجيكم نهار اللي يظهر يسوع المسيح. ¹⁴ و كيما اولاد طايعين, ما تبعوش الشهوات تاعكم اللي كنتوا تديروا فيها قبل ما تامنوا, ¹⁵ بالصح كونوا قديسين في كلش, كيما القدوس اللي ناداكم. ¹⁶ على خاطر جا في لكتاب: "كونوا قديسين على خاطر انا قدوس". ¹⁷ و اذا كنتوا تقولوا باللي الله اب ليكم و هو اللي يحاسب الناس الكل على اعمالهم كيف كيف ما يشوفش بالوجوه, مالا خافوا الله في زمان غربتكم على لرض. ¹⁸ عالمين باللي فداكم من سيرتكم الباطلة اللي ورثتوها من عند الجدود, موش بالحوايج الفانية كيما الفضة و الذهب, ¹⁹ بالصح بدم كريم, دم لخروف اللي بلا عيب ولا نجاسة, الدم تاع المسيح, ²⁰ اللي خايروا الله قبل ما تتخلق الدنيا, بالصح ظهر على جالكم انتوما في هاذي الزمانات لخّرى, ²¹ و هو اللي جعلكم تامنوا بالله اللي قَوْمو من بين الموتى ومدلو الجاه, و ولى الله هو غاية ايمانكم و رجاكم. ²² نقِيوْ نفوسكم بالطاعة تاع الحق بالروح و بالمحبة لبعضاكم بلا نفاق, حبوا بعضاكم محبة طاهرة خارجة من القلب. ²³ مولودين مرة اخرى, موش من زرع يفنى, بالصح من هاذاك اللي ما يفناش, بالكلمة تاع الله الحية الدايمة. ²⁴ على خاطر: "كل بنادم كي القَّش. و كل جاه بنادم كي نوّار المرجة, القَّش ييْبس والنوار يطيح, ²⁵ اما كلمة ربي تبقى ثابتة دايما". و هاذي هي الكلمة اللي بشرناكم بيها.