¹ O le ā la se mea tatou te fai atu ai? E tatau ea ona tatou faaauau pea i le agasala ina ia faateleina ai le alofa tunoa? ² Tau ina ia aua lava neʻi tupu. O i tatou o ē ua oti i le agasala, e fa‘apefea ona tatou ola ai pea? ³ Ua outou lē iloa ea, o i latou uma na papatisoina iā Keriso Iesu, na papatisoina i latou i lona maliu? ⁴ O lenei ua tatanu fa‘atasi o tatou ma ia i le papatisoga i lona maliu. E pei ona toe fa‘atūina mai o Keriso nai ē ‘ua oti i le mamalu o le Tamā, e fa‘apea fo‘i ona tatou sāvavali i le ola fou. ⁵ Auā afai ua faatasia i tatou ma ia i le fa‘atusa o lona maliu, e fa‘apena foi i tatou i lona toetū mai. ⁶ Ua tatou iloa lenei mea, na faasatauroina faatasi ma ia lo tatou tagata tuai, ina ia faaumatia ai le tino o le agasala. Ua tupu lenei mea ina ia lē toe faapologaina i tatou i le agasala. ⁷ O lē ua oti ua ta‘uamiotonuina o ia i le agasala. ⁸ Afai foi ua oti faatasi i tatou ma Keriso, ua tatou taofi, tatou te ola foi faatasi ma ia. ⁹ Ua tatou iloa ua toe tu mai Keriso nai e ua oti, e le toe maliu lava o ia, e le toe pule le oti ia te ia. ¹⁰ Auā o lona maliu, ua tasi lona maliu ona o le agasala mo tagata uma. Ae peitaʻi, o le olaga o loo soifua ai o ia, e soifua lava ia mo le Atua. ¹¹ Ia faapea foi la outou taofi, ua outou oti i le agasala, a ua outou ola mo le Atua iā Keriso Iesu. ¹² O lenei, aua nei pule le agasala i o outou tino auga vale, ina ia outou gauai/usiusitai ai i ona tuinanau. ¹³ Aua nei tuuina atu itūtino o outou tino i le agasala, e fai ma meafaigaluega e fai ai le amioletonu. A ia tuuina atu outou i le Atua, e pei o ē ua fa‘atūina mai le oti i le ola, ma tu‘u atu i le Atua o outou tino e fai ma meafaigaluega e fa‘atatau i le amiotonu. ¹⁴ Aua neʻi faatagaina le agasala e pule iā te outou. Auā ua outou lē i lalo o le tulafono, a o le alofa tunoa. ¹⁵ O lenei, pe faapefea? Pe ua tatou agasala ea ina ua tatou lē nonofo i le tulafono, a o le alofa tunoa? Talosia ia, aua lava nei faapea. ¹⁶ Tou te lē iloa ea, afai tou te tu‘uina atu outou e fai ma pologa, o le auauna outou i lē ua outou usiusitai i ai? O outou o pologa a le agasala, e oo atu i le oti, po o pologa i le usiusitai, e oo atu i le amiotonu. ¹⁷ A ia faafetai i le Atua! Auā sa fai outou ma pologa a le agasala, a ua outou usiusitai ma le loto i le aoaoga na tuuina atu iā te outou. ¹⁸ Ua faasaolotoina outou mai le agasala, ma ua avea outou ma pologa a le amiotonu. ¹⁹ Ou te tautala i upu a tagata ona o le vaivai o outou tino. Auā e pei ona outou tuuina atu o outou tino e fai ma auauna i le amio leaga ma le solitulafono, e iu ai outou i le tele o le solitulafono, e fa‘apea foi ona tuuina atu nei o outou tino e fai ma pologa i le amiotonu e faapaiaina ai. ²⁰ Auā sa aunoa outou ma le amiotonu, ina o auauna outou i le agasala. ²¹ O le ā foi le fua na outou maua i na aso, o mea ua outou māsiasi ai nei? Auā o le iuga o na mea o le oti. ²² Ae o lenei ua faasaolotoina outou mai le agasala ma ua fai ma auauan a le Atua, ua ia te outou o outou fua mo le faapaiaina. O le taunuuga o le ola e faavavau. ²³ Auā o le totogi o le agasala o le oti lea; ao le ola e faavavau, o le mea foaifuaina mai lea e le Atua, i lo tatou Alii o Keriso Iesu