¹ O le mea lea, e leai sou alofaga, oe le tagata e faamasino, aua o mea e te faamasinoina ai le isi tagata, e te faasalaina oe lava. Auā o outou o ē faamasino, ua faia lava ia mea. ² Ae peitai ua tatou iloa o le faamasinoga a le Atua e tusa ma le upu moni pe a oo mai i luga o ē fai mea fa‘apenā. ³ Ae mafaufau i le mea lenei, oe le tagata o loʻo faamasinoina i latou o loo faia ia mea e ui lava e te faia ia lava mea. E te sao mai ea i le faamasinoga a le Atua? ⁴ Pe e te manatu faatauvaa ea i le tamaoaiga o lona agalelei, ma lona faasalaga tuai, ma lona onosai? E te le iloa ea o lona agalelei e taʻitaʻia ai oe i le salamo? ⁵ Ae o le maaa tele o lou loto ma lou lē salamō ua e faaputuina lava mo oe le toasā i le aso o le toʻasā, o le aso lea e faaalia ai le faamasinoga tonu a le Atua. ⁶ E taui atu foi e ia i tagata taitoatasi e tusa ma lana amio; ⁷ o ē ua tumau pea i galuega lelei, ua latou saili ai le viiga, ma le mamalu ma le le iu vale. ⁸ Ae peitai o i latou o ē sailia i latou lava, o ē lē usiusitai i le upu moni, ae usiusitai i le amioletonu, e oo mai lava le toasā tele. ⁹ E faaoo mai fo‘i e le Atua le puapuaga i tagata taitoatasi uma o ē amio leaga, e muamua i le Iutaia, atoa ma le Eleni. ¹⁰ Ae o le viiga, ma le mamalu, ma le filemu o le a oo mai ia i latou uma o e faia mea lelei, e muamua i le Iutaia, atoa ma le Eleni. ¹¹ Auā e lē faailoga tagata le Atua. ¹² Auā o i latou uma o ē na agasala e aunoa ma le tulafono, e fano foi i latou e aunoa ma le tulafono; ma o i latou uma o e ua agasala i le tulafono e faamasinoina/faasalaina i latou i le tulafono. ¹³ Auā e lē o ē faalogologo i le tulafono e amiotonu i luma o le Atua, a o ē e anaana i le tulafono e tauamiotonuina. ¹⁴ Auā pe a fai fua e Nuu ese o ē e lē o i ai le tulafono o mea e tusa ma le tulafono, e ui ina le o i ai le tulafono, ua avea i latou ma tulafono ia te i latou. ¹⁵ E ala i lenei mea ua latou faaalia ai o gaoioiga e manaomia e le tulafono ua tusia i o latou loto. O loo molimau foi o latou loto fuatia ifo ia te i latou, ma o latou lava manatu e molia pe faasalaina i latou, ¹⁶ i le aso e faamasinoina ai e le Atua mea lilo a tagata uma, e tusa ma la‘u tala lelei, e ala ia Iesu Keriso. ¹⁷ Ae afai e te fai atu o oe o le Iutaia ma ua e fa‘alagolago i le tulafono ma mitamita i le Atua, ¹⁸ ma ia iloa lona finagalo ma talia le mea e sili ona lelei, auā ua aoaoina oe i le tulafono; ¹⁹ afai foi ua e mautinoa o oe o le taitai o ē tauaso, o le malamalama foi i ē o i le pouliuli, ²⁰ o le aoao i ē valea, o le aoao o tamaiti, ma ua ia te oe i le tulafono le tino o le poto ma le upumoni, e faapefea la ona aafia ai lou olaga? ²¹ O oe o lē ua aoao atu i isi, e te lē aoao ea ia te oe lava? O oe o lē e talai atu i le gaoi, e te gaoi ea? ²² O oe o lē fai mai e lē tatau ona e mulilua, e te mulilua ea? O outou o ē inoino i tupua, ua e faoa ea malumalu? ²³ O oe o lē mitamita i le tulafono, ua e faaleagaina ea le Atua i lou soli o le tulafono? ²⁴ Auā ua upuleagaina le suafa o le Atua i Nuu ese ona o outou, e pei ona tusia. ²⁵ Auā o le peritome e aogā ia te oe pe afai e te usiusitai i le tulafono; ae afai e te soli i le tulafono, ua avea ai lou peritome ma faaleperitomeina. ²⁶ O lenei, afai e tausia e le tagata e lei peritomeina le tulafono, e lē taua ea lona lē peritomeina o le peritomeina? ²⁷ E lē faasalaina ea oe e lē ua lē peritomeina, pe afai na te tausia le tulafono? Auā ua ia te outou le tulafono tusitusia ma le peritome, a ua e soli le tulafono! ²⁸ Auā e lē o ia o se Iutaia e na o le tino; e lē o le peritome foi ua na o le mea i fafo i le tino. ²⁹ A o le tagata Iutaia i le loto, o le peritome o le loto lea, i le Agaga, ae lē o le tusi. O le viiga o se tagata faapena e lē mai tagata ae mai le Atua.