¹ O a'u o Paulo, o le auauna a Iesu Keriso, ua vala'auina e fai ma aposetolo, ma ua filifilia mo le tala lelei a le Atua. ² Sa ia folafola mai anamua, e ala i ana perofeta i tusitusiga paia, ³ e fa'atatau i lona Atali'i e tupuga mai iā Tavita i la le tino. ⁴ E ala i le Agaga paia; ua ia fa'ailoa ma le mana, o ia o le Atali'i o le Atua, ua toetu mai i le oti; o Iesu Keriso le Alii. ⁵ O ia ua tatou maua ai le alofa tunoa ma le faiva o le aposetolo; e ala i le usiusitai i le fa'atuatua o atunu'u uma ona o lona suafa. ⁶ O totonu o nei atunu'u, o oe ua vala'auina e Iesu Keriso. ⁷ O i latou uma o i Roma, ua alofaina e le Atua ma ua vala'auina e fai ma tagata paia. Ia iai le alofa tunoa ma le filemu mai le Atua le Tamā ma le Alii o Iesu Keriso. ⁸ E muamua ona ou fa'afetai i le Atuā e ala ia Iesu Keriso mo outou uma, ona o lo outou fa'atuatua ua folafolaina atu i le lalolagi atoa. ⁹ O le Atua o lo'u molimau, o ia ou te auauna i ai lo'u agaga, i le tala lelei o lona Atali'i, o lo'o ta'uta'u atu pea outou. ¹⁰ Ou te fa'atoga atu i taimi uma i ou tatalo; ina ia ou manuia nei i le finagalo o le Atua, ina ia ou alu atu ia te outou. ¹¹ Ua ou naunau e vaai ia te outou, ina ia ou avatu o meaalofa fa'aleagaga, ina ia mafai ona fa'amalosi ai outou. ¹² O lenei, ua ou naunau e fa'amalosi ia te outou, e ala i le faatuatua o le tasi i le tasi, o outou ma au foi. ¹³ O lenei le au uso e, ou te lē loto ia outou lē iloa, ou te manatu soo oute alu atu ia te outou (a ‘ua taofia a‘u e o‘o mai i le aso nei), ‘ina ‘ia ‘ou fua mai fo‘i ‘iā te ‘outou, fa‘apei ‘ona ‘ou maua i isi nu‘u ‘ese. ¹⁴ O au o se tagata nofo aitalafu i Eleni ma tagata ese, o e popoto ma e valea. ¹⁵ O lenei, ua ou sauni e talai le tala lelei ia te outou o i Roma. ¹⁶ Auā ou te lē ma i le tala lelei, auā o le mana o le Atua e fa'aola ai tagata uma o ē talitonu, e muamua i tagata Iutaia ma Eleni. ¹⁷ Auā o le amiotonu o le Atua ua fa'alia mai i le fa'atuatua i le fa'atuatua, e pei ona tusia, "O e amiotonu e ola i le fa'atuatua". ¹⁸ Auā o le toasā o le Atua ua fa'aali mai le lagi i e lē amio atua ma e amioletonu, ma tagata amioletonu ua taofi le mea moni. O mea ua iloa i le Atua ua fa'ailoa atu ia te i latou. ¹⁹ Auā ua fa'amalamalamaina i latou e le Atua ²⁰ Talu ona faia o le lalolagi, o ona uiga lē vaaia; o lona mana lea e fa'avavau ma lona natura paia, ua manino lava i le vaai, ua iloatino i mea na ia faia. E leai la se alofaga o ia mea ia te i latou. ²¹ Auā e ui lava na latou iloa le Atua, ua latou lē vivi'i i le Atua, pe fa'afetai atu foi ia te ia. Ae peitai, ua latou valea i o latou manatu ma ua fa'apogisaina o latou loto valea. ²² Ua latou fai mai e popoto, ae ua avea i latou ma e valelea. ²³ Ua latou fesuiai foi le mamalu o le Atua soifua pea ma le fa'atusa o le tagata e fano, ma manu felelei, ma manu vae fa ma mea fetolofi. ²⁴ O le mea lea ua tu'uina atu ai i latou e le Atua i tuinanau o latou loto leaga, latou te fa'aleagaina i o latou lava tino. ²⁵ O i latou lava ua fesuiai le upu moni o le Atua i le pepelo, o e ua tapuai ma auauna i mea na faia, nai lo'o o Ia na faia, ia vi'ia e fa'avavau. Amene. ²⁶ O le mea lea ua tuuina ai e le Atua latou e fa'aleagaina i tuinanau, auā ua fesuiai e o latou fafine le so'otaga e tatau ma le tu e lē masani ai. ²⁷ E fa'apea foi ona tu'ua e le tane le so'otaga ma fafine, ae ua tuinanau atu i le tasi i le tasi. O ia tane ua faia amioga māsiasi ma maua i latou le fa'asalaga e tatau mo mea sesē ua latou faia. ²⁸ Ua latou le talia le iai o le Atua i lo latou iloa, ua ia tuuina atu i latou i le mafaufau leaga, ina ia latou faia mea e lē tatau. ²⁹ Ua fa'atumuina i latou i le amioletonu, ma le amio leaga, ma le matape'ape'a ma le loto leaga. Ua tumu i latou i le matau'a, ma le fasioti tagata, ma le misa, ma le taufa'asese ma le fa'amoemoe leaga. O le faitala lava i latou, ³⁰ ma le ta'uga fa'aleaga, ma le inoino i le Atua, ma le ita, ma le fa'amaualuga, ma le mitamita, ma le faufau ala e fai ai lē leaga; latou te lē usiusitai i matua. ³¹ O i latou e fa'avalea, ma le lē fa'atuatua, ma le leai o se loto, ma le leai o se alofa. ³² Ua latou malamalama i poloa'iga a le Atua, o i latou e faia mea fa'apena e tatau ona oti. Ae e lē gata ina latou faia nei mea, ae ua latou talia foi o isi o loo faia nei mea.